“3+3” formatı bu bəyanatı verməsə, yaşaya bilməyəcək - rəy...
Hüseyn İbrahimov: “İrəvan belə bir bəyanata imza atmayacaq”
Məlum olduğu kimi, oktyabrın 18-də İstanbulda Azərbaycan, Ermənistan, Rusiya və İranın xarici işlər nazirlərinin (XİN) iştirakı ilə “3+3” formatında xarici işlər nazirlərinin III görüşü keçiriləcək.
Rusiya Xarici İşlər Nazirliyinin sözçüsü Mariya Zaxarova da xarici işlər naziri Sergey Lavrovun görüşdə iştirakını təsdiqləyib: “Biz Sergey Lavrovun planlaşdırılan iştirakını təsdiq edirik”.
Cənubi Qafqazda altıtərəfli əməkdaşlıq formatı (Azərbaycan, Ermənistan, Gürcüstan - Rusiya, Türkiyə, İran) təşəbbüsü 2020-ci ilin sonunda Prezident İlham Əliyev tərəfindən irəli sürülüb. İndiyə qədər keçirilən görüşlərdə yalnız Gürcüstan Rusiyaya görə iştirak etməyib.
Maraqlıdır, sözügedən formatda NATO, Avropa İttifaqı və ABŞ-ın bizim bölgəyə nüfuz etmək səylərinin sülh və regional sabitliyə təhlükə olması barədə birgə bəyanat imzalaya bilərlərmi? Əgər bunu edə bilməzlərsə, bu halda formatın hansı uğurlu gələcəyindən danışmaq olar? Axı Azərbaycan, Rusiya, İran açıq deyirlər ki, regiona kənar qüvvələr burun soxmasın. Ermənistan isə bunun əksini deyir. Elə bu günlərdə Rusiya prezidenti Putin, xarici işlər naziri Lavrov və digər ölkə rəsmiləri bəyan etdilər ki, Qərbin bu bölgəyə nüfuz etməsi böyük təhlükədir. Ancaq Ermənistan parlament sədri Alen Simonyan bu günlərdə deyilənlərin tam əksinə mövqe sərgilədi. Bəyan etdi ki, məsələn, Avropa İttifaqının mülki missiyası bu bölgədə çox şəffaf fəaliyyət göstərir, özünü doğruldur, fəaliyyəti şəffafdır və regiondakı proseslərə kömək edir. Göründüyü kimi, Simonyan tam əks mövqe sərgiləyib.
“Bu isə, təbii ki, platformanın gələcək perspektivinə kölgə salacaq”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, Ermənistan buna imkan verməyəcək: “Məsələ ondadır ki, “3+3” formatında təmsil olunan 5 ölkə - Azərbaycan, Rusiya, Gürcüstan, İran, Türkiyə Qərbin regiona müdaxiləsinə qarşıdır. Əvvəl yalnız 4 ölkə bu mövqedən çıxış edirdisə, artıq Gürcüstan da bu ölkələrə qoşulub. Çünki Gürcüstanla Qərb arasında gərginlik yaşanır. Tbilisi açıq bəyan edir ki, Qərb ölkədə 26 oktyabrda keçiriləcək parlament seçkilərinə müdaxiləyə hazırlaşır, müxalifəti maliyyələşdirir və s. Üstəlik, Gürcüstanla Rusiyanın münasibətləri normallaşmaqdadır. Halbuki, əvvəllər münasibətlər gərgin idi və elə bu səbəbdən Gürcüstan “3+3” formatında keçirilən iki görüşə qoşulmaqdan imtina edib. Bu baxımdan hesab edirəm ki, Gürcüstan İstanbulda keçiriləcək 3-cü görüşə qatılacaq. Həmçinin regiona Qərbin müdaxiləsinə qarşı bəyanata imza atacaq. Ancaq İrəvan belə bir bəyanata imza atmayacaq. Bu isə, təbii ki, platformanın gələcək perspektivinə kölgə salacaq. Belə təəssürat yaranacaq ki, platforma vahid mövqedən çıxış edə bilmir”.
Vidadi ORDAHALLI
