Paşinyan Azərbaycanla sazişin daha 2-3 maddəsi üzərində oyun qurur - hədəf dəyişməyib...
Əli Orucov: "Azərbaycanın sülh gündəliyinə sadiqliyi və təklifləri aydın və netdir"
Erməni mediasının yaydığı xəbərə görə, İrəvan Bakını COP29-dan əvvəl sülh sazişi imzalamağa dəvət edib. Ermənistan Milli Assambleyasının Xarici Əlaqələr üzrə Daimi Komitəsinin sədri Sarkis Xandanyan deyib ki, Ermənistanın baş naziri Nikol Paşinyan Azərbaycan prezidenti İlham Əliyevə xarici işlər nazirlərinin ikitərəfli görüşünün keçirilməsini, sülh müqaviləsinin bir-iki maddəsinin razılaşdırılmasını, sonra isə Bakıda keçriləcək COP29-a qədər sülh müqaviləsini imzalamağı təklif edib.
Bu, Ermənistan tərəfinin yeni oyunu deyilmi? Birincisi, Ermənistan bu addımı atmaqla özünü sühə can atan, sülhoərvər tərəf kimi göstərir, guya qısa zamanda sülh müqaviləsi bağlamaq istəyir. İkincisi, sülh danışıqlarından Moskvanı kənarda qoymaq amacı var, hərçənd ki, Azərbaycan üçün bunun o qədər də əhəmiyyəti yoxdur. Üçüncüsü, COP29 tədbirindən istifadə edərək, tez-tələsik, yarımçıq sülh müqaviləsi bağlamaq üçün Azərbaycana təzyiq göstərir.
Bu təkliflə Ermənistan daha nələri hədəfləyir?
Bizimlə söhbətində politoloq Əli Orucov bildirdi ki, Ermənilərin də, beynəlxalq ictimaiyyətin də dəfələrlə diqqətinə çatdırılıb ki, yarımçıq sülh müqaviləsi olmur: "Azərbaycan sülh müqaviləsini tam və bütün məsələlərin həll olunmasından sonra imzalamağa hazır olduğunu dəflərlə bəyan edib. Lakin Ermənistan adətinə uyğun olaraq yenə də manipulyasiyalarla məşğuldur və özünü sülhpərvər, konstruktiv təqdim etməkdədir. Ermənistan eyni zamanda Azərbaycanın qəti mövqeyini bilə-bilə, hər dəfə bu mövzunu ortaya atmaqla Azərbaycanı suçlu və sülh istəməyən bir ölkə kimi diqqətə gətirmək istəyir. Elə təəssürat yaratmağa çalışır ki, güya Bakı destruktiv və davakar mövqedədir. Halbuki, sülhü sabotaj edən, təmaslardan qaçan, sürətlə silahlanan və təxribatlara əl atan Ermənistandır.
Ermənistan parlamentinin Xarici əlaqələr daimi komitəsinin sədri Sarkis Xandanyanın erməni mediasına verdiyi açıqlamalar da qeyri-obyektiv və qərəzlidir. Bayaq da vurğuladığımız kimi, Azərbaycanın sülh gündəliyinə sadiqliyi və təklifləri aydın və netdir. İkincisi, istər Londonda keçirilən Avropa Siyasi Brliyinin zirvə görüşündə, istər Rusiyada MDB dövlət başçılarının sonuncu görüşündə və digər platforma və formatlarda Ermənistanın baş naziri N.Paşinyan görüşlərdən qaçıb.
Ermənistanın dövlət büdcəsindən hər il silahlanmaya və silahlı qüvvələrə ayrılan vəsaitin artması, təbii ki, sülpərvərlikdən, dinc yanaşı yaşamaq və əminamanlıq istəklərindən xəbər vermir. Komitə sədri hələ utanmadan Azərbaycanı Ermənisatnala aparılan danışıqları və üzərinə götürdüyü öhdəlikləri icra etməməkdə günahlandırır. Yalan və iftira ilə sülh, qarşılıqlı etimad əldə etmək, təbii ki, mümkün deyil. Sülh müqaviləsinin heç bir hüquqi və siyasi çəkisi olmayacaqsa, həmin sənəd kağız parçasından başqa bir şey olmayacaq. Ermənistan Azərbaycanın ərazi bütövlüyünü və suverenliyini Ana Yasasında və digər normativ hüquqi sənədlərdə tanımayıb, yaxud Qərbi azərbaycanlıların elementar və doğal haqlarına hörmətini ifadə etməyib, vacib humanitar məsələlərin, o cümlədən birinci Qarabağ müharibəsində itkin düşmüş minlərlə soydaşımızın taleyinə aydınlıq gətirmədən, işğal dövründə minalarla və digər partlayıçı qurğularla çirklənirdiyi ərazilərin xəritəsini təqdim etmədən, həmçinin ATƏT MQ qrupu və onun lazlmsız strukturlarının buraxılmasına razlılıq vermədən sülh müqaviləsi bağlamağı tezləşdirmək barədə bəyanatlar verirsə, bu növbəti siyasi oyunbazlıq, ikiüzlülük və riyakarlıqdır. Ermənistanın niyyəti sülhdən qaçmaq, sülhpərvər illüziyalar yaratmaqla beynəlxalq birliyi çaşdırmaq və Azərbaycana qarşı qoymaqdır. Mənim fikrimcə, İrəvan Azəebaycanla sülh bağlamağa, münasibətləri normallaşdırmağa deyil, revanşa hazırlaşır.
Əgər sülh müqaviləsi bağlanacaqsa, burda region ölkələrinin də maraqları yəqin ki, nəzərə alınacaq. Məlumdur ki, Türkiyə və Rusiya Cənubi Qafqaz uğrunda, hər nə qədər mövqelərində yaxınlaşmalar olmasına baxmayaraq, tarixən rəqabətdə olublar. Bura İran da daxildir. Ancaq Türkiyədən fərqli olaraq, nə Tehran, nə də Moskvanın ədalətli və dayanıqlı sülhün əldə edilməsinə maraqlı olduğunu söyləyə bilmərik. İrəvan bu gerçəyi bilir və prosesi uzadır. Çünki İrəvana da sülh lazım deyil. Ona görə də regiona yad, kənar qüvvələri gətirməklə mürəkkəb vəziyyət yaradır. COP29 tədbirinə bir çox güclər öz maraqları prizmasından yanaşır. Halbuki, bu, məhdud siyasi maraqların fövqündə duran, planetimiz üçün vacib olan tədbirdir və diqqətlər də planetimizin xilasına yönəlməlidir".
Dəniz NƏSİRLİ
