Əliyevin "COP atəşkəsi" təşəbbüsünü dəstəkləyən dövlətlərin sayı xeyli artacaq...
Aydın Mirzəzadə: “COP29 öncəsi Azərbaycanın atəşkəs təklifi dünyanın diqqətini cəlb edir”
Məlum olduğu kimi, Prezident İlham Əliyev COP-öncəsi tədbirin iştirakçılarına müraciət ünvanlayıb. Müraciətdə bir sıra məsələlərlə bağlı fikir bildirilib. O cümlədən, COP atəşkəsi məsələsinə də toxunulub.
Qeyd edək ki, COP Atəşkəsi Qlobal təşəbbüsünə 127 dövlət qoşulub. Bu, Prezident İlham Əliyevin təşəbbüsü ilə COP tarixində ilk dəfədir ki, irəli sürülüb. İlk dəfədir ki, COP-lar tarixində hərbi fəaliyyətin iqlimə zərər vuran, emissiya yaradan bir fəaliyyət kimi təsbit olunması və buna görə də qlobal atəşkəsin elan olunması barədə qərara gəlinib və belə təşəbbüs irəli sürülüb. Ehtimal edilir ki, bu təşəbbüsə qoşulan dövlətlərin sayı hələ artacaq. Maraqlıdır, dövlətlərin sayca çoxluğu təşəbbüsün uğurlu olmasına necə təsir edə bilər?
“Artıq 127 ölkə dünyanı müharibəsiz, qarşıdurmasız görmək istəyir, bu say daha da artacaq”
Millət vəkili Aydın Mirzəzadə “Bakı-Xəbər”ə şərhində bildirdi ki, Azərbaycan Prezidentinin təşəbbüsü qısa zamanda dünya ölkələrinin üçdə-ikisi tərəfindən dəstək qazanıb: “Xatırladım ki, Azərbaycan Qoşulmama Hərəkatına sədrlik edərkən bir sıra təşəbbüslər irəli sürdü və onların çoxu reallaşdı. Göründüyü kimi, Azərbaycan dünya birliyində gedən proseslərdə çox pozitiv rol oynayır və dünya tərəfindən dəstəklənir. Hesab edirəm ki, COP29 konfransına qədər Azərbaycan tərəfindən bu tip bir neçə təşəbbüs irəli sürüləcək. Hərbi əməliyyatların dayandırılması isə məsələlərin sülh yolu ilə həllinə böyük dəstək olacaq. Məlumdur ki, artıq 127 ölkə dünyanı müharibəsiz, qarşıdurmasız görmək istəyir. Bu say daha da artacaq. COP29 tək ekoloji məsələlərə deyil, eyni zamanda, sülh, əməkdaşlıq, mehriban qonşuluğu təbliğ edən dəyirmi masaya çevrilə bilər”.
Millət vəkili hesab edir ki, COP29 öncəsi Azərbaycanın atəşkəs təklifi dünyanın diqqətini cəlb edir: “Arzuolunandır ki, bu təşəbbüs bütün dünya ölkələri tərəfindən dəstəklənsin. Azərbaycanın sülhpərvərliyi növbəti dəfə öz təsdiqini tapdı”.
Günel CƏLİLOVA
