Stano Ermənistanın sülhə mane olmaq siyasətini açıq dəstəklədi...
Ramil Hüseynov: “Stanonun riyakarlığı Avroittifaqın regionla bağlı apardığı siyasətin göstəricisidir”
Federal Təhlükəsizlik Xidmətinin (FTX) direktoru Aleksandr Bortnikov Astanada MDB xüsusi xidmət orqanlarının rəhbərlərinin iclasında bəyan edib ki, Ermənistan sülh sazişinin imzalanmasını gecikdirir. Bortnikovun fikrincə, Qərb BMT sülhməramlılarını regionda yerləşdirməyə çalışır, bu da faktiki olaraq maskalanmış NATO kontingenti olacaq:
“Biz də görürük ki, Ermənistan sülh sazişini imzalamaq istəmir, prosesi gecikdirir. Reallıq bundan ibarətdir”.
Ancaq bütün bunlara baxmayaraq, Avropa İttifaqının xarici siyasət və təhlükəsizlik məsələləri üzrə ali nümayəndəsinin sözçüsü Peter Stano yenə də Ermənistanın tərəfini saxlayaraq İrəvana haqq qazandırır. Stano Bortnikovun bəyanatını yalan və manipulyasiya adlandırıb. Yənu bu o deməkdir ki, guya Ermənistan sülh sazişinin imzalanmasında maraqlıdır. Yaxşı, sülh sazişini Ermənistan imzalamaq istəyirsə, o zaman niyə imzalamır? Bu həmin Stanodur ki, bu günlərdə Ermənistanın silahlanmasına haqq qazandırıb. Bəyan edib ki, bu, Ermənistanın suveren hüququdur. Deyib ki, biz heç vaxt Azərbaycanın silahlanmasına irad tutmamışıq. Halbuki, Ermənistan təcavüzkar ölkə olduğu üçün belə bir hüquqa malik deyil. O baxımdan Ermənistanın silahlanmasının qanuni xarakter daşıması ilə Azərbaycanın silahlanmasının qanuni xarakter daşımasını eyniləşdirmək olmaz. Bütün bunlar fərqli məsələlərdir.
“Maraqlıdılar ki, sülh olmasın, gərginlik davam etsin və onlar bundan öz mənafeləri üçün istifadə etsinlər”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Stanonun bu riyakarlığı Avroittifaqın regionla bağlı apardığı siyasətin göstəricisidir: “Stano və onun kimi digər Avropa İttifaqı rəsmiləri bilavasitə Ermənistanı təhrik edirlər. Sanki Ermənistan məğlub olmuş ölkə deyil. Məgər biz bilmirik ki, Aİ müşahidə missiyası Ermənistana niyə yerləşdirilib? Missiyanın guya Ermənistan-Azərbaycan sərhədində sülhə töhfə vermək üçün fəaliyyət göstərdiyi barədə deyilənlər sadəcə gözdən pərdə asmaq üçündür. Missiyanın əsl məqsədi regionla bağlı kəşfiyyat məlumatları toplamaq, Rusiyanı Ermənistandan çıxarmaq və Qərbin orada hərbi baxımdan təmsilçiliyini leqallaşdırmaqdır. Rusiya kəşfiyyatı da bütün bunların fərqindədir. Çünki Azərbaycanla Ermənistan arasında sülh sazişi imzalanarsa, məntiqi baxımdan Aİ missiyasının fəaliyyətinə heç bir zərurət qalmır. Yəni avtomatik olaraq onlar Ermənistanı tərk etməlidilər. Onsuz da iki ölkə arasında birbaşa təmaslar var və bunun nəticəsi olaraq Azərbaycan-Ermənistan sərhədinin 12 kilometri delimitasiya olunub. Sülh sazişindən sonra bu proses daha da sürətlənə bilər. Ona görə də belə vəziyyət Aİ-yə və qurumda əsas söz sahibi olan Fransaya sərf etmir. Bu səbəbdən maraqlıdılar ki, sülh olmasın, gərginlik davam etsin və onlar bundan öz mənafeləri üçün istifadə etsinlər. Aİ sülhdə maraqlı olsaydı, bununla bağlı Ermənistana təzyiq göstərərdi”.
Vidadi ORDAHALLI
