"Avtobus zolaqlarına cərimə üzündən girə bilmirik, yolda isə sərnişini düşürə bilmirik" - sürücülər müşkül durumda...
Bakıda ictimai nəqliyyat növü olan avtobusların rahat hərəkət etməsi, yaranan tıxacın qarşısının alınması məqsədilə xüsusi avtobus zolaqları yaradılıb. Avtobus zolağına daxil olan digər nəqliyyat vasitələrinin sürücüsü İnzibati Xətalar Məcəlləsinə görə 100 AZN cərimə olunur.
Lakin bu qadağa bəzi problemlər də yaradıb. Belə ki, taksidən istifadə edən sərnişinlər mindikləri və ya avtomobildən enəcəkləri ünvanı yolqırağı göstərdikdə taksi də onları avtobus zolağına daxil olmadan yolun ortasında düşürür. Bu üsuldan təkcə taksi sürücüləri yox, digər şəxsi avtomobil idarə edənlər də istifadə edir. Bu da qəza şəraitinin yaranmasına səbəb olaraq sərnişinlərin həyatını təhlükəyə atır.
Bu problemlə bağlı sosial şəbəkədə narazılıq edən sürücülərin sayı artır.
Sürücülər sosial şəbəkədə narazılıq edərək bildirir ki, avtobus zolaqlarına daxil olmaq mümkün deyil, çünki cərimə yazılır: “Bu səbəbdən sərnişin düşürmək istədikdə yolun ortasında saxlamalı oluruq. Sərnişinin yolun hərəkət hissəsində maşından enməsi çox təhlükəlidir. Avtobus zolaqlarından da avtobusların nə zaman və hansı sürətlə gələcəyi məlum deyil. Bu yaxınlarda bir xanım maşından düşdükdə avtobus vurmuşdu.
Avtobuslar üçün zolaqlar olsa da, onlar digər nəqliyyat vasitələri üçün yoldan istifadə edirlər. Səbəbini isə yol kənarında olan ağaclarla əlaqələndirirlər. Budaqlar avtobusa mane olduğu, həmçinin zərər yetirdiyi üçün həmin yola daxil ola bilmirlər. Əgər zolaq istifadə olunmayacaqsa, nə üçün çəkilib?"
Bu tipli şikayətlərə sosial şəbəkədə çox rast gəlmək olar. Avtobus zolaqlarının çəkilməsi nəqliyyatın intensivliyi baxımından gözəl addımdır, lakin özü ilə bu cür problemlər də gətirir. Bu problem necə həll olunmalıdır?
Aslan Əsədov: “Hazırda avtobus zolağına digər avtomobillərin daxil olması cərimə ilə nəticələnir”
Nəqliyyat üzrə ekspert Aslan Əsədov “Bakı-Xəbər”ə açıqlamasında bildirdi ki, hazırda avtobus zolağına digər avtomobillərin daxil olması cərimə ilə nəticələnir:“Ötən il, avtobus zolağının çəkildiyi ilk mərhələlərdə təklif irəli sürmüşdük ki, qanuni taksi fəaliyyəti ilə məşğul olanlar sərnişinin düşüb-minməsi üçün avtobus zolağına daxil olsunlar. Burada müəyyən qanunauyğunsuzluqlar oldu. Ona görə də vəziyyətin əvvəlki kimi, qarışıq olmaması üçün birmənalı olaraq heç kimə icazə verilmədi, hətta bunun cəriməsi 100 manata qədər qaldırıldı. Əvvəl 40 manat idi. Bu problemin həlli üçün gələcəkdə müəyyən işlər görülə bilər. Sui-istifadə hallarına yol verilməzsə, hərəkətə mane olunmazsa, gələcəkdə bəzi tətbiqlər tətbiq edilə bilər. Hələlik yaxın zamanlarda bunun tətbiq olunması gözlənilmir. Hazırda avtobus zolağına girilərsə 100 manat cərimə ödənilməlidir”.
Fərid Həşimov: “Elə bir qayda olmalıdır ki, həm sürücülər əziyyət çəkməsin, həm də sərnişinlər, birtərəfli düşünülməməlidir”
Nəqliyyat eksperti Fərid Həşimov “Bakı-Xəbər”ə açıqlamasında bildirdi ki, sərnişini düşürmək və yaxud götürmək üçün avtobus zolağına girən avtomobil sürücüsünü də 100 manat cərimə gözləyir: “Avtobus zolağına digər nəqliyyat vasitələrinin girişinə qadağa qoyulmasında məqsəd ictimai nəqliyyatın rahat hərəkətinə daha geniş imkan yaratmaqdır. 100 manat cərimədən yayınmaq üçün bəzi sürücülər sərnişini çox zaman yolun ortasında düşürür. O maşınların heç də hamısı taksi deyil. Kimisi qohumunu, kimisi tanışını yolda düşürtmək məcburiyyətində qalır. Belə olan halda sürücü 100 manat cərimə olunmamaq üçün yolun ortasında sərnişini düşürür. Bu hal isə sərnişinin həyatını risqə atır. Elə bir qayda olunmalıdır ki, həm sürücülər əziyyət çəkməsin, həm də sərnişinlər. Birtərəfli düşünülməməlidir”.
Günel CƏLİLOVA
