Livana İsrail-ABŞ təcavüzü Rusiyanın Ukraynaya müdaxiləsinə dünyanın baxışlarını dəyişəcək...
Rəşad Bayramov: “Bu, hardasa Rusiyanın maraqlarına xidmət edir”
Məlum olduğu kimi, Rusiya-Ukrayna müharibəsi 3 ilə yaxındır davam edir. İsrailin timsalında da Yaxın Şərqdə eskalasiya genişlənməkdədir. Söhbət ondan gedir ki, Rusiyanı Ukraynaya təcavüz etməkdə, beynəlxalq hüququ pozmaqda ittiham edirlər. Xüsusən ABŞ Rusiyanın bu addımına qarşıdır.
Bu tərəfdən də İsrail Livanı bombalayır və quru əməliyyatlarına hazırlaşır. Birləşmiş Ştatlar da İsraili dəstəkləyir.
O baxımdan, İsrailin bu hərəkətinin Qərb tərəfindən dəstəklənməsi Rusiyanın Ukraynaya müdaxiləsinə dünyada münasibətin dəyişməsinə necə təsir edə bilər? Çünki istər-istəməz müqayisə aparılır. Necə yəni, İsrail ABŞ-ın dəstəyi ilə Livana təcavüz edə bilir, Rusiya Ukraynaya təcavüz edə bilməz? Yəni bu, beynəlxalq hüququn artıq müxtəlif dövlətlərin əlində mənasız bir şeyə çevrildiyini nümayiş etdirir. Düzdür, həm Rusiyanın Ukraynaya, həm də İsrailin Livana təcavüzü doğru deyil. Ancaq bu iki məsələyə münasibətdə Qərb müxtəlif standartlardan çıxış edir. Bir tərəfdən Rusiya ittiham edilir, o biri tərəfdən İsrailin hücumu dəstəklənir. ABŞ-ın İsraili dəstəkləməsi Rusiyanın Ukraynaya hərbi təcavüzünə dünyada münasibətin dəyişməsində necə rol oynaya bilər?
“Həm Ukraynaya diqqət azalır, həm də beynəlxalq hüquqa münasibətdə inam sarsılır”
Sözügedən məsələni “Bakı-Xəbər”ə şərh edən AMİP Mərkəzi Şurasının sədri Rəşad Bayramovun fikrincə, Qərb hər zaman özünün siyasətində və atdığı addımlarda ikili standartlarla çıxış edib: “Bu yeni deyil və illərdir belədir. Hər zaman belə olub. Yəni Qərb bu və ya digər hadisəyə qiymət verərkən yalnız öz maraqları baxımından çıxış edib. Təkcə İsrailin Livana hücumu timsalında deyil, digər məsələlərdə də bu özünü göstərib. Azərbaycan öz ərazi bütövlüyünü təmin edərkən Qərbin buna necə ikili standartlardan yanaşdığını yaxşı bilirik. Nəticə etibarı ilə Ukrayna öz ərazisində separatçı rejimlərə qarşı mübarizə aparanda bütün dünya tərəfindən dəstəkləndi. Azərbaycan separatçı rejimlərə qarşı mübarizə aparanda az qala bütün dünya bizim əleyhimizə qalxmışdı. Yəni bu ikili standartlar hər zaman mövcud olub və bundan sonra da olacaq. Çünki dünya artıq nə beynəlxalq hüquqla, nə obyektiv ədalətli qərarların qəbulu ilə idarə olunur. Dünya çox dəyişib və təəssüf ki, kim güclüdürsə o da haqlıdır prizmasından yanaşılır bütün məsələlərə. ABŞ-ın İsraili dəstəkləməsi fonunda dünyada Rusiyanın Ukraynaya təcavüzünə dəstək artmayacaq. Ancaq istənilən halda, belə ikili yanaşma beynəlxalq hüququ sarsıdır. Bu, hardasa Rusiyanın maraqlarına xidmət edir. Həm Ukraynaya diqqət azalır, həm də beynəlxalq hüquqa münasibətdə inam sarsılır. Düzdür, dünyanın hər yerində belə qaynar nöqtələr var. Ancaq İsrailin Livana hücumuna münasibətdə belə ikili yanaşma öz fəsadlarını göstərəcək. Bütün bunlar dünyanın təhlükəsizlik sistemində çatlar yaradır”.
Vidadi ORDAHALLI
