Hindistan ordumuzda İsrailin məşhur LORA raketlərinə qarşı ermənilərə “Pralay” raketləri satacaq...
Ramil Məmmədli: “Pralay” raketlərinin LORA-lara qarşı effektiv olacağını düşünmürəm”
Hazırda Hindistan Ermənistanın "Pralay” raketlərinin tədarükü ilə bağlı müraciətinə baxır. Bu barədə “İndian Defense Research Ving” nəşri yazıb.
Nəşr bunun Azərbaycanın İsrailin LORA sistemindən istifadə etməsi ilə bağlı ola biləcəyini yazıb: “İyun ayından Ermənistan “Pralay” raketlərinin tədarükü ilə bağlı Hindistana müraciət edib. Ermənistan İsrail Aerospace Industries tərəfindən hazırlanmış və Azərbaycanın aldığı LORA raketlərinə qarşı mübarizə aparmaq üçün “Pralay” almaq istəyir. Lakin Raket Texnologiyalarına Nəzarət Rejiminin üzvü olduğu üçün Hindistan 300 km və ya daha çox mənzilli və faydalı yükü 500 kq və ya daha çox olan raketlərin ixracına nəzarət etməlidir. Bu baxımdan, Dehli “Pralay” raketini Ermənistana uyğunlaşdıraraq, onun uçuş məsafəsini azaltmalıdır. Hindistan Ermənistanın “Pralay”ın tədarükü ilə bağlı tələbini qəbul etsə də, saziş hələ bağlanmayıb. Bununla belə, sövdələşmə tezliklə bağlana bilər, çünki Hindistanın təminatları sürətli razılaşmanın mümkünlüyünə işarə edir”.
Qeyd edək ki, “Pralay” kvazi ballistik, qatı yanacaqla işləyən “yer-yer” raketidir. 500 km mənzilə sahibdir.
“Ermənistan Hindistandan bu raketləri alsa belə, hansısa üstünlük qazana bilməyəcək”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, Ermənistan Hindistandan “Pralay” raketlərini alsa belə, hansısa üstünlük qazana bilməyəcək: “Məlum olduğu kimi, bir sıra ölkələr Ermənistanı silahlandırmağa girişiblər. Məqsəd revanşistləri körükləməkdir. “Pralay” raketlərinin LORA-lara qarşı effektiv olacağını düşünmürəm. LORA raketləri uçuş trayektoriyasına görə ballistikdir, ancaq raketdən müdafiə sistemlərindən yayınmaq üçün proqramlaşdırılmış və ya ixtiyari manevrlər edə bilir. Bu səbəbdən onu kvaziballistik raket də adlandırırlar. Raket həm GPS sistemi, həm operator tərəfindən idarə edilə bilər. Dörd konteynerdən ibarət buraxılış qurğusu adi yük maşınının və ya treylerin şassisində yerləşdirilir. LORA raketləri 44 günlük Vətən müharibəsində mühüm rol oynayıb. Belə ki, erməni ordusunun Şuşa şəhərində yerləşən qüvvələri gücləndirmək məqsədi ilə istifadə etdiyi, Laçın şəhəri yaxınlığında Həkəri çayının üzərindəki körpünün partladılmasında LORA kompleksindən istifadə edilib. Bu raketlər tez-tez təkmilləşdirilir. Hava hücumundan madafiə vasitələrindən yayınmaq üçün modernləşdirilir. Proqram təminatında və elektron vasitələrdə yeniliklər edilir. Bu baxımdan düşünmürəm ki, Hindistan istehsalı olan “Pralay” raketləri ilə LORA-ları vurmaq mümkün olsun. Hər halda, bu raketlər “Petriot” hava hücumundan müdafiə kompleksləri qədər güclü və funksional deyil”.
Vidadi ORDAHALLI
