Bu da müsəlman İordaniya - erməninin "Arsax filmini" "Oskara" təqdim etdi...
Mətləb Salahov: “İordaniyalı rejissor humanizm dəyərlərinə belə bağlıdırsa, niyə Qarabağda ermənilərin dəmir borulara doldurub öldürdükləri azərbaycanlı körpələr barədə film çəkmir?”
Çox təəssüflər olsun ki, erməni yalanlarının toruna bəzən müsəlman ölkələri də düşə bilir. Ermənilərin saxtakarlıq, şər şəbəkəsi İordaniya kimi ölkələrə qədər uzanır.
Ermənistan mediası belə bir məlumat yayıb ki, İordaniya “Oskar”a təqdim etmək üçün “Artsax” haqqında sənədli film seçib.
Yazırlar ki, İordaniya 97-ci Akademiya Mükafatlarında “Ən Yaxşı Beynəlxalq Film” kateqoriyasında təqdim edilmək üçün erməni-iordaniyalı rejissor Sareen Hairabedianın "Mənim şirin torpağım” sənədli filmini seçib.
Sənədli film “amansız müharibənin” ortasında olan “Artsaxda” diş həkimi olmaq arzusunda olan 11 yaşlı Vrejedən bəhs edir. Separatçılığı alovlandırmağa xidmət edən və erməni terroruna haqq qazandırmağa çalışılan sənədli filmin qəhrəmanı kimi 11 yaşlı uşağın seçilməsi təsadüfi deyil. Bu, Azərbaycanı qaralamaq, “işğalda” suçlamaq üçün seçilən bir vasitədir ki, guya Azərbaycan erməniləri Qarabağdan zorla çıxarıb, onlara hansısa “zorakılıq” edib. Siz bir ifadəyə baxın, “münaqişə yenidən başlayanda Vrej, ailəsi və xalqı müharibədə məğlub olduqdan sonra viran olmuş vətənlərinə qayıtmaq üçün qaçır. Vrej yeni sərt reallıqla qarşılaşarkən və gələcək döyüşlərə hazırlaşarkən ümidlərinin və aldığı travmaların ağırlığı ilə mübarizə aparır”. Görün, bunlar nə qədər uydurma məsələlər düzüb-qoşurlar. Elə qələmə verirlər ki, guya Qarabağ bunların dədə-baba torpağıdır.
Yazırlar ki, film Nyu-Yorkda yaşayan erməni əsilli erməni rejissor Hairabedianın debüt filmidir və onun HBO kanalı üçün bir neçə mükafat qazanmış 40 dəqiqəlik “Biz hələ bitməmişik” sənədli filmindən sonra çəkilir.
“Mənim şirin torpağım” filminin premyerası bu ilin əvvəlində Sheffield DocFest-də baş tutub və daha sonra bir neçə festivalda, o cümlədən iyul ayında Əmman Beynəlxalq Film Festivalında nümayiş olunub və burada “Ən Yaxşı Sənədli Film” Münsiflər Heyəti Mükafatını və Ən Yaxşı Bədii Ərəb sənədli filmi üçün “FIPRESCI” Mükafatını qazanıb. Müsəlman ölkəsi saxta erməni iddiası əsasında çəkilən filmə bu qədər mükafat verib və indi də onu “Oskar” mükafatına təqdim etməyə hazırlaşır.
Bu da müsəlman ölkəsinin erməni təəssübkeşliyidir. İordaniya “Arsax” haqda çəkilən düzməcə filmi “Oskar”a təqdim etməkdənsə, erməni yalanlarına heyran olmaqdansa gözlərini açıb hadisələrə baxsın, reallığın nə olduğunu bilsin. Bu necə müsəlman ölkəsidir ki, müsəlman qardaşının haqlı davasının əleyhinə çəkilən filmi bu qədər dəyərləndirir? Müsəlman həmrəyliyi harda qaldı? 30 il torpaqlarımızı işğalda saxlayıb məscidlərimizdə donuz saxlayan ermənilərin əməllərini niyə görmək istəmir?
Ekspertlər hesab edirlər ki, Azərbaycanın Mədəniyyət Nazirliyi, Kino qurumları İordaniyaya müraciət etməli və gerçəklik barədə məlumat verməlidir, eyni zamanda da filmin yığışdırılmasını, “Oskar”a təqdim edilməsini dayandırmağı tələb etməlidir.
“Həqiqət ondan ibarətdir ki, onları şüara çevirdikləri “İslam dəyərləri” deyil, öz maraqları düşündürür”
Jurnalist-ekspert Mətləb Salahov “Bakı-Xəbər”ə şərhində bildirdi ki, İordaniyanın bu addımı təəssüf doğurur və ermənipərəstliyin bir nümunəsidir. M.Salahov bildirdi ki, erməni dostluğu müsəlman həmrəyliyini üstələyirsə, hansı din qardaşlığından danışmaq olar? “Öncə diqqəti bir məsələyə yönəltmək istərdim. Dünyada hər kəs, xüsusilə İslam dövlətlərində yaxşı bilirlər ki, Azərbaycan İslam Həmrəyliyi üçün ən çox səy göstərən, bu istiqamətdə mühüm addımlar atan ölkədir. Xüsusilə İslam dövlətləri arasında mədəni əlaqələr baxımından Azərbaycan dövlətinin gördüyü işlər daha effektli və nəticə gətirəndir. Amma min dəfə təəsüflər olsun ki, bəzi İslam dövlətləri təcavüzkar Ermənistanla “mehriban dostluq diplomatiyası” adı altında əlaqələr qurur, hətta bunu əndazəsini aşmaq şəklində reallaşdırırlar. Diqqət edək: ən yaxın qonşuluğumuzdakı islam dövlətindən başlamış ən uzaq müsəlman ölkəsinə qədər bəzi ölkələr təcavüzkar Ermənistanı bağrına basıb əməkdaşlıq edir”-deyə bildirdi.
M.Salahov qeyd etdi ki, hətta rəsmi İrəvanın daima Avropa institutlarında İslam əleyhinə kəskin mövqe sərgilədiyini bilə-bilə bunu edirlər. “Sual olunur: 30 illik işğal dövründə işğal altında qalan Azərbaycan torpaqlarındakı məscidləri, ibadət yerlərini, İslam mədəniyyətinə aid olan tarixi abidələri vəhşicəsinə məhv edən Ermənistan deyilmi? Məgər müsəlman ölkələrində bilmirlər ki, ermənilər bizim yarıdağılmış məscidlərdə heyvan, donuz, inək saxlayıblar? Bu, müsəlman aləminə edilən təhqir deyilmi? - Əlbəttə gözəl bilirlər. Sadəcə həqiqət ondan ibarətdir ki, onları şüara çevirdikləri “İslam dəyərləri” deyil, öz maraqları düşündürür.
Gələk iordaniyalı rejissorun qondarma “artsax”da müharibə ortasında qalan, “əzabkeş” obrazında təqdim etdiyi 11 yaşlı Vrej barədə çəkdiyi 40 dəqiqəlik filmə. Əgər iordaniyalı rejissor humanizm dəyərlərinə bu şəkildə bağlıdırsa, niyə Xocalıda ermənilər tərəfindən dəmir boruların içinə doldurularaq öldürülən, anasının gözü qarşısında şişə çəkilən, tonqalda yandırılan azərbaycanlı körpələr barədə cəmi 10 dəqiqəlik film çəkmir? 11 yaşlı Vrejdən fərqli olaraq, ana qucağındakı 5-6 aylıq südəmər azərbaycanlı körpələr öz doğma yurd yerində, isti ocaqlarında erməni vəhşiləri tərəfindən analarının gözləri qarşısında qətlə yetiriliblər. Guya İordaniya Film Festivallarında əyləşənlərin, “erməni humanizminə” göz yaşı tökən yaradıcı müsəlman rejissorların bütün bunlar barədə məlumatları yoxdur? Əlbəttə var. Erməni diasporunun və öz içlərindəki erməni sevdasının diqtəsi ilə müsəlman məscidlərini heyvan yaylağına çevirmiş bir ölkəyə əl uzadanların imanı olmur”-deyə müsahibimiz bildirdi.
İradə SARIYEVA
