Azərbaycanın yeni silahı "Turan"ın adı təsadüfənmi seçilib?...
Emin Həsənli: “Azərbaycanın istehsal etdiyi silahın adının “Turan 1” olması təsadüfi deyil, bu ad türk birliyini özündə ehtiva edir”
Azərbaycanın istehsal etdiyi, şərti adı “Turan 1” olan silah ilk dəfə “ADEX-2024” 5-ci Yubiley Azərbaycan Beynəlxalq Müdafiə Sərgisində nümayiş etdirilir. Bununla bağlı “Ush Security” şirkətinin nümayəndələri məlumat yayıb.
Məlumat üçün bildirək ki, silah yerli mühəndislər tərəfindən hazırlanıb və 2024-cü ildə istehsal olunub. Çəkisi 3 kiloqram 600 qram olan silahın vuruş məsafəsi 1000 metr, daraq tutumu 30 gülləlikdir. Müasir sistem orijinal standartlara uyğun olaraq hazırlanıb və sərgidə ilk dəfə nümayiş olunur.
Qeyd etdiyimiz kimi, Azərbaycanın istehsal etdiyi silah “Turan 1” olaraq adlanıb. Maraqlıdır, bu ad təsadüfənmi seçilib?
“Azərbaycan dövlətinin özünün silah istehsal etməsi qürurvericidir, istehsal olunan silahlara da önəmli adlar verilir”
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli “Bakı-Xəbər”ə şərhində bildirdi ki, Azərbaycan dövlətinin özünün silah istehsal etməsi qürurvericidir. İstehsal olunan silahlara da önəmli adlar verilir: "Xatırladım ki, Azərbaycan istehsalı olan silahlardan birinin adı "istiqlal" idi. Həmçinin, Mübariz İbrahimovun adını daşıyan "Mübariz" snayper tüfəngini də misal çəkə bilərəm. Onlarla silah var ki, həmin vasitələrin hər birinin mənası var. Azərbaycanın istehsal etdiyi silahın adının “Turan 1” olması təsadüfi deyil. Bu ad türk birliyini özündə ehtiva edir. Türk Dövlətləri Təşkilatının yaradılması, türk dövlətləri ilə mədəni, siyasi, elmi və hərbi sahədə əməkdaşlıq getdikcə dərinləşir. Hesab edirəm ki, gələcəkdə Turan ordusu olacaq. Onu da deyim ki, Turan istiqamətində Azərbaycan dövləti bir çox işlər görür. O üzdən bu silaha “Turan 1” adının verilməsi təsadüfi görülməməlidir. Azərbaycan dövlətinin Türk Birliyinə nə qədər önəm verdiyini ölkə başçısı İlham Əliyev də dilə gətirib, eyni ailənin nümayəndələri olduğumuzu bildirib. Bu istiqamətdə əlaqələrin genişləndirilməsi üçün həm qardaş Türkiyə, həm də Qazaxıstan, Özbəkistan, Qırğızıstan, Türkmənistan və digər türkdilli ölkələrlə əməkdaşlıq daha da güclənir. Bununla yanaşı, Şimali Kipr Türk Cumhuriyyəti ilə də əlaqələr qurulur”.
Həmsöhbətimiz onu da əlavə etdi ki, Azərbaycanın istehsal etdiyi “Turan 1” silahının ilk dəfə “ADEX-2024” 5-ci Yubiley Azərbaycan Beynəlxalq Müdafiə Sərgisində nümayiş etdirilməsi ölkəmizin gücünü, nüfuzunu göstərir. Müasir silahların istehsal edilməsi, əlaqələrin qurulması, ikitərəfli və ya çoxtərəfli münasibətlərin olması əhəmiyyətlidir. Həmçinin, istehsal edilən silahların idxal edilməsi Azərbaycan dövləti üçün vacibdir. Müasir silahlarla ordunu təmin etmək dövlət maraqlarına xidmət edir: “Məlumdur ki, Qarabağ müharibəsində də Azərbaycan müasir silahlardan istifadə etdi. Bu kimi faktlar onu deməyə əsas verir ki, Azərbaycan ordusu dünyanın ən güclü ordularından biridir”.
Günel CƏLİLOVA
