Azərbaycana donuz əti idxalı artıb - "halal"a donuz əti vurulur" iddiaları…
Bu ilin yanvar-iyul ayları ərzində Azərbaycana xarici ölkələrdən 860,7 ton dondurulmuş donuz əti idxal olunub. Məlumat üçün bildirək ki, ötən ilin eyni dövründə ölkəyə builkindən daha az – 645,8 ton dondurulmuş donuz əti idxal edilmişdi.
Açıqlanan statistik rəqəmlərdən də bəlli olur ki, idxal edilən donuz ətinin həcmi artıb. İdxalın artması isə müzakirələrə səbəb olub. Bəzi sosial şəbəkə istifadəçiləri iddia edir ki, halal adı altında əhaliyə satılan sosis və kolbasalara da donuz əti vurulur.
Maraqlıdır, donuz ətinin ölkəmizdə daha çox istifadə edilməsinə səbəb nədir?
Elşad Məmmədli: “Kolbasalar, sosiskalar və bir sıra ət məmulatları məhz donuz ətindən hazırlanır"
Iqtisadçı Elşad Məmmədli “Bakı-Xəbər”ə şərhində bildirdi ki, donuz ətinin istehlakının artmasına bir sıra amillər təsir edir: “İlk növbədə, kəskin sürətlə artan inflyasiya pul ifadəsində olan bütün məhsulların istehlakının artmasını göstərir. Lakin bu o demək deyil ki, fiziki göstəricilərdə də artım var. İnflyasiyanın dolayı təsirlərindən biri də ənənəvi olaraq yüksək tələbata malik olan mal, qoyun və toyuq ətləri üzrə qiymətlərin artmasıdır. Bu baxımdan istehlakçıların müəyyən hissəsi alternativ ət növləri axtarmağa başlayır və nəticədə donuz ətinə tələbat da artır. Nəzərə almaq lazımdır ki, ənənəvi olaraq donuz ətinə tələbatın az olması ölkədəki qiymətinin daha ucuz olmasına səbəb olurdu. İstehlakçılar ucuz ətə üz tutmaq nöqteyi-nəzərindən donuz əti almağa üstünlük verirlər. Sözsüz ki, bu hal neqativdir. Digər məqam ondan ibarətdir ki, donuz ətindən müxtəlif məmulatların hazırlanmasında istifadə olunur. Kolbasalar, sosiskalar və bir sıra ət məmulatları məhz donuz ətindən hazırlanır".
Eyyub Hüseynov: “Donuz əti digər sahələrdə də istifadə edilə bilər, bu ət təkcə kolbasa hazırlamaq üçün deyil”
Azad İstehlakçılar Birliyinin sədri Eyyub Hüseynov hesab edir ki, sosial şəbəkələrdə səsləndirilən iddialar yanlışdır: “Halal sertifikatı verilmiş markalar kolbasa və ya sosislərə donuz əti qarışdırmır. Məlumat üçün deyim ki, Qida Təhlükəsizliyi Agentliyi bu məsələyə ciddi nəzarət edir. Donuz əti digər sahələrdə də istifadə edilə bilər. Bu ət təkcə kolbasa hazırlamaq üçün deyil. Nəzərə almaq lazımdır ki, son bir ildə ölkəmizdə kolbasa istehsalı artıb”.
Günel CƏLİLOVA
