“Freedom House" hələ də "DQ"-ni Azərbaycandan ayrı təqdim edir...
Rauf Zeyni: “Biz bu siyasəti qətiyyətlə pisləyirik və heç vaxt da qəbul etməmişik”
“Freedom House”un son hesabatında etnik separatizmin dəstəklənməsi üzə çıxır. Problem ondadır ki, 2023-cü il hesabatında “Dağlıq Qarabağ” Azərbaycandan ayrıca, əlahiddə qurum kimi qiymətləndirilir.
Beləliklə, ABŞ-ın son bir il ərzində Azərbaycana qarşı həyata keçirdiyi təxribatçı siyasət “Freedom House” tərəfindən hazırlanan hesabatlarda da öz əksini tapır. ABŞ Ermənistan–Azərbaycan münasibətlərinin “tənzimlənməsində” hansı maxinasiyaları tətbiq edirsə, “Freedom House” da “demokratik azadlıqlar indeksi”ndə eyni siyasəti təqib edir. “Dağlıq Qarabağ”ı əlahiddə subyekt kimi göstərməklə, Azərbaycanın ərazi bütövlüyünə qəsd edir. Ən acınacaqlısı odur ki, hesabatda “Dağlıq Qarabağ” təkcə ərazi baxımından deyil, həm də “demokratik azadlıqlar” konteksində Azərbaycandan qoparılır. Hesabatda Azərbaycan “qeyri-azad”, “Dağlıq Qarabağ” isə “yarımazad” ərazi kimi dəyərləndirilərək, Ermənistanla eyniləşdirilir.
Bu beynəlxalq təşkilat faktiki olaraq separatizmi dəstəkləyir. Buna necə baxmaq olar?
Milli Qeyri Hökumət Forumunun prezidenti Rauf Zeyni “Bakı-Xəbər”ə açıqlamasında bildirdi ki, başçılıq etdiyi təşkilat ABŞ Dövlət Departamentinə 2009-cu ildə etiraz bəyanatı göndərib: “Azərbaycan Respublikasının razılığı, icazəsi olmadan qondarma “Dağlıq Qarabağ “rejiminə 8 milyon dollar vəsait ayırmalarına etiraz etdik. Bu, illik davam edirdi və onunla əlaqədar olaraq bizə rəsmi cavab yazıblar. Hələ o illərdən biz yaxşı bilirdik ki, Azərbaycan müstəqilliyi əldə edəndən sonra ABŞ Azərbaycana, regiondakı ölkələrə qarşı, bütövlükdə Cənubi Qafqazla əlaqədar olaraq hansı ikili standartları tətbiq edir və bu siyasət necə, hansı səviyyədə formalaşdırılır. ABŞ-da güclü erməni lobbisinin olduğu da bəlli idi. Bütün bunlarla bərabər 2004-cü ildə məşhur diaspora sədrimiz Tomris Azəri yaxşı bir müsahibə vermişdi və bu müsahibədə qeyd etmişdi ki, əgər siz ABŞ Konqresində lobbiçilik baxımından kiməsə yüz min dollar versəniz, onlar sizin sözünüzü deyəcək. Başqa şəxslər yüz iyirmi min dollar versə, onların sözünü deyəcək. Çünki ABŞ-da lobbiçilik rəsmiləşdirilib və hər hansı bir formada onu maaliyyələşdirməyə icazə verilib. Ən maraqlısı da odur ki, adi bir nəzərlə baxanda ABŞ-ın dünya üçün təhdid və təhlükə olduğunu görmək mümkündür. Azərbaycanı ittiham etmək üçün beynəlxalq təşkilatlar vasitəsilə hansı sifarişlərin verilməsi, beynəlxalq ictimaiyyətə çaşdırılması, Azərbaycan haqqında mənfi imicin yaradılması, hansı sanksiyaların verilməsi, beynəlxalq təşkilatların vasitəsilə qərəzli hesabatların verilməsi, bunların hamısı məlumdur. Biz təşkilat olaraq, 25 ildir ki, bu məsələlərə etiraz edirik, bəyanat veririk. Bizim verdiyimiz bəyanata yalnız bir dəfə cavab verilib, onu da mən sizə göndərirəm. Burdan da bir çox məsələlər aydın olur. Biz etiraz etmişik ki, qondarma “Dağlıq Qarabağ” rejiminə Azərbaycanın razılığı olmadan hər il 8 milyon dollar yardım edilməsi yolverilməzdir. Onlar isə həmin dediyimiz ikili standartlara uyğun cavab göndəriblər. Yəni ABŞ-ın dünyada, regionda, o cümlədən bizim ölkəmizdə apardığı siyasət,bir çox məqsədlərlə yaratdığı beynəlxalq təşkilatlar, o təşkilatlar vasitəsi ilə bir çox dövlətlərə, xalqlara qarşı atdığı addımlar məlumdur. Biz bu siyasəti qətiyyətlə pisləyirik və heç vaxt da qəbul etməmişik. Sadəcə, dəfələrlə bəyanat verməyimizə baxmayaraq, bu sistemdə o istiqamətdə ABŞ heç bir dəyişiklik, heç bir yenilik etməyib. Mən düşünürəm ki, biz ABŞ-la da, dünyanın digər ölkələri ilə də qarşılıqlı faydalı əməkdaşlıq etməyə maraqlıyıq. Sadəcə olaraq, dünyada demokratiyaya, demokratik, hüquqi, beynəlxalq münasibətlər dəyərlərinə çox yüksək tələbkarlıqla iddialı olan bir dövlət kimi, ABŞ birinci növbədə özü bu qaydalara əməl etməlidir. Təəssüflər olsun ki, ABŞ - la əlaqədar bir çox məsələlər var ki, onlardan məlumatsızdır. Biz dünyada mövcud olan beynəlxalq insan hüquqlarından danışırıqsa, ABŞ özü insan hüquqları konvensiyasının bir çox maddələrinə qoşulmayıb və beynəlxalq sənəd kimi qəbul etməyib. Ona görə də, ABŞ istədiyini edir, daimi dostu və daimi düşməni yoxdur. Sadəcə, öz maraqları var. Azərbaycan dövləti olaraq, biz də öz milli maraqlarımıza uyğun hərəkət etməliyik”.
Məhəmmədəli QƏRİBLİ
