Suverenliyimizi tanımayan ölkələrə “Azərbaycanın dostu” deyilməyəcək - müasir meyar...
Ramil Hüseynov: “Yeni xarici siyasət kursunda bu ölkələrlə əməkdaşlığa xüsusi önəm verilir”
“Əsas meyar ölkələrin bizim suverenliyimizin bərpasına olan münasibətidir, daha başqa uzağa getmək lazım deyil”. Bunu Prezident İlham Əliyev VII çağırış Milli Məclisin ilk iclasındakı çıxışında deyib.
Ölkə başçısı bildirib ki, Azərbaycanın suverenliyini tanıyanlar bizim dostumuzdur: “Bizi kim dəstəkləyib, suverenliyimizin bərpa edilməsində kim təbrik edib? Bu, bizim dostlarımızdır. Buna qarşı kim çıxıb və kim çıxır? Bunlar bizə dost ola bilməzlər. İşğal dövründə bu, o qədər də aydın deyildi. Yəni bizim üçün aydın olsa da, geniş ictimaiyyət üçün aydın deyildi. Çünki vaxtilə xarici təbliğat Azərbaycanda o qədər kök salmışdı, özü də bir mənbədən yox, bir neçə mənbədən. Bir-biri ilə rəqabət aparan xarici qüvvələr və ölkələr çalışırdılar ki, Azərbaycanda ictimai fikirdə söz sahibi olsunlar. İstəyirdilər ki, onların əlaltıları vasitəsilə bizim media məkanında istənilən təxribatı ortaya ataraq, vəziyyəti öz xeyrinə dəyişdirsinlər. Yəni belə cəhdlər çox olub, amma güclü iradə və xalqımızın birliyi buna imkan verməyib. Bu gün də bu davam edir. Ona görə yenə də deyirəm, çox sadə meyarlar var. Kim bizimlə Qarabağın Azərbaycana qaytarılmasına sevinirsə, o, bizim dostumuzdur, qardaşımızdır. Kim bundan məyus olub və kim bu gün yenidən separatçılara ürək-dirək vermək istəyir, kim onları xarici ölkələrə dəvət edir, kim onlara vizalar verir, kim bizə qarşı müxtəlif alətlər vasitəsilə qarayaxma kampaniyası aparır, o, necə bizim dostumuz ola bilər?”.
Bütün bu deyilənlərin fonunda, demək olarmı ki, Azərbaycanın yeni xarici siyasət meyarı formalaşır?
“Bunun əlamətlərindən biri də Azərbaycanın BRIKS təşkilatına üzv olmaqla bağlı müraciət etməsidir”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, bu qənaətə gəlmək üçün yetərincə əsas var: “Məsələ ondadır ki, həqiqətən də Azərbaycan ərazi bütövlüyünü, suverenliyini tam təmin edəndən sonra xarici siyasətinə yenidən baxır. Bunun əlamətlərindən biri də Azərbaycanın BRIKS təşkilatına üzv olmaqla bağlı müraciət etməsidir. Azərbaycan Şərq ölkələri ilə əməkdaşlığın dərinləşməsinə xüsusi önəm verir. Çünki bu ölkələrin Azərbaycanın suverenliyinə, ərazi bütövlüyünə dəstəyi birmənalıdır. Bəzi Avropa ölkələri kimi, sözdə bir cür, əməldə başqa cür deyil. Məsələn, Qərb postsovet məkanı ölkələrində separatçılara münasibətdə birmənalı mövqedən çıxış etmirdi. Gürcüstanda, Moldovada, Ukraynada separatçı qurumlara münasibətdə daha sərt və birmənalı mövqe sərgiləyirdi. Ancaq əfsuslar olsun ki, ərazilərimiz 30 il işğal altında olanda Qarabağdakı erməni separatçılara bu cür münasibət bəslənilmədi. Tam əksinə, ATƏT-in Minsk qrupunun həmsədrləri regiona səfər edəndə onlarla ayrıca görüşürdülər. Qarabağı separatçı bölgə kimi yox, “tanınmamış respublika” kimi təqdim edirdilər. Bütün bunlar yaxın tarixdə baş verib. Azərbaycan ərazilərini işğaldan azad edəndən sonra bir sıra Avropa ölkələri sevinmədilər, tam əksinə, məyus oldular. Məhz ondan sonra onların əsl maskası düşdü. Bunlar Fransa, Niderland, Belçika və digər ölkələrdir. Azərbaycana qarşı müxtəlif parlamentlər, qurumlar səviyyəsində ədalətsiz qərarlar qəbul edildi. Ancaq bundan fərqli olaraq, Orta Asiya və bir sıra digər ölkələr ərazi bütövlüyümüzün təmin edilməsinə sevindilər. Prezident İlham Əliyevə bununla bağlı təbrik məktubları ünvanladılar. Çin kimi böyük bir dövlət müstəqilliyimizdən üzübəri Azərbaycanın ərazi bütövlüyünə birmənalı dəstək verir. Ona görə də yeni xarici siyasət kursunda bu ölkələrlə əməkdaşlığa xüsusi önəm verilir”.
Vidadi ORDAHALLI
