Bizə vasitəçi lazım deyil - Əliyev kimlərə mesaj verdi...
Rəşad Bayramov: “Burada söhbət təkcə ABŞ və Fransadan getmir”
“Kim nə istəyir desin, vasitəçilər də bizə lazım deyil. Düzdür, indi bəzi vasitəçilik təkliflərinə biz etiraz etmirik, sadəcə olaraq, siyasi nəzakət naminə. Ancaq əslində, bizə vasitəçi lazım deyil”. Bunu Prezident İlham Əliyev VII çağırış Milli Məclisin ilk iclasındakı çıxışında deyib.
Ölkə başçısı bildirib ki, biz Ermənistanla dövlət sərhədinin delimitasiyasını vasitəçilərsiz etdik: “Sadəcə olaraq, onlara bildirdik ki, Qazax rayonunun dörd kəndi bizə qeyd-şərtsiz qaytarılmalıdır və bunu son dəfə mən bu ilin fevral ayında demişəm. Hesab edirəm ki, bu sözlər çox tutarlı oldu və ondan sonra heç bir vasitəçisiz, heç bir qeyd-şərtsiz Qazaxın dörd kəndi, - hansı ki, işğal altında idi, - bizə qaytarıldı. Beləliklə, biz nəinki delimitasiyanı, hətta demarkasiyanı da başlamışıq. Ona görə danışıqlarda da bizə heç bir vasitəçi lazım deyil. Ermənistan da buna bel bağlamasın. Ümumiyyətlə, heç kimə bel bağlamasın”.
Maraqlıdır, Prezidentin “bizə heç bir vasitəçi lazım deyil” açıqlaması ilk növbədə hansı ölkələrə mesajdır?
“Həm də Rusiya və zaman-zaman vasitəçilik təşəbbüsü ilə çıxış etmək istəyən ayrı-ayrı...”
Sözügedən məsələyə aydınlıq gətirən AMİP Mərkəzi Şurasının sədri Rəşad Bayramov “Bakı-Xəbər”ə açıqlamasında bununla bağlı bir sıra məqamlara toxundu: “Burada söhbət istənilən vasitəçi olmaq istəyən dövlətdən gedir. Məlumdur ki, Azərbaycanın bu gün Ermənistan qarşısında qoyduğu əsas tələblərdən biri Konstitusiya dəyişikliyidir. İkinci tələb ATƏT-in Minsk qrupundan imtina etməkdir. Çünki Minsk qrupunun praktiki olaraq fəaliyyəti mövcud deyil. Söhbət Ermənistanın da həmin qurumdan imtina etməsindən gedir. Ancaq Ermənistan buna getmək istəmir. Heç şübhəsiz, bu, təsadüfü deyil. Çünki bunu İrəvana məsləhət bilən ölkələr var. Bu da ondan irəli gəlir ki, bəzi dövlətlər Azərbaycanla Ermənistan arasında vasitəçi olmaq istəyir. Bu minvalla hər iki dövləti təzyiq altında saxlamaq istəyən dövlətlər var. Cənab Prezident də konkret olaraq bütün tərəflərə mesaj verdi. Burada söhbət təkcə ABŞ və Fransadan getmir. Həm də Rusiya və zaman-zaman vasitəçilik təşəbbüsü ilə çıxış etmək istəyən ayrı-ayrı beynəlxalq qurumlara da konkret mesaj vermiş oldu. Açıq şəkildə bildirdi ki, biz bu və ya digər şəkildə hansısa ölkənin və ya qurumun vasitəçiliyinin tərəfdarı deyilik. Təbii ki, ayrı-ayrı ölkələr, birliklər Azərbaycanla Ermənistan arasında aparılan danışıqlara stimul vermək üçün ev sahibliyi edə bilər. Ancaq bu heç bir halda onların da danışıqlar masasında oturub öz şərtlərini ortaya qoyması demək olmamalıdır. Çünki ortada vasitəçi varsa, o zaman onun konkret maraqları var. Belə olan halda Azərbaycan və Ermənistan maraqlarından başqa, vasitəçinin də maraqları nəzərə alınmalıdır. Bu da həm vaxt itkisidir, həm də tərəfləri maraqların uzlaşmasından yayındırır. O baxımdan ortada konkret fakt var. Fakt ondan ibarətdir ki, biz sərhədlərin delimitasiyası və demarkasiyası prosesinə hər hansı kənar vasitəçi olmadan başladıq. Nəticə etibarı ilə çox qısa vaxt ərzində müsbət nəticələr əldə etdik. Bu onu göstərir ki, tərəflər kənar müdaxilə və vasitəçi olmadan daha rahat dil tapa bilirlər. Düzdür, Ermənistan uzun müddətdir ikitərəfli danışıqlardan yayınır. Bu da Ermənistanın müstəqil ölkə ola bilməməsindən irəli gəlir. İrəvan Ermənistan maraqlarından deyil, ayrı-ayrı güclərin maraqlarından çıxış edir. Azərbaycan tərəfinin hər hansı vasitəçidən imtinası nəticə etibarı ilə Ermənistanı da məcbur edəcək ki, danışıqlar masası arxasında təkbaşına otursun”.
Vidadi ORDAHALLI
