ABB-nin səhmlərini 33 mindən çox investor satın alıb...
Azərbaycan Beynəlxalq Bankının (ABB) səhmlərini 33 min nəfərdən çox investor satın alıb. Trend xəbər verir ki, bu barədə Azərbaycan Beynəlxalq Bankının idarə heyətinin sədri Abbas İbrahimov ABB-nin səhmlərin emissiyası üzrə yekunlara həsr olunmuş brifinqdə bildirib.
"ABB-nin səhmləri ilə bağlı Azərbaycan vətəndaşları üçün məhdudiyyətlərin ləğvi haqqında fərman ölkənin dövlət layihələrinə özəl investisiyaların cəlb edilməsinə yönəlib və bu fərmanın mühüm strateji məqsədləri var. Əsas vəzifələrdən biri vətəndaşların korporativ strukturların idarəsində iştirakını genişləndirmək və ölkəmizdə keyfiyyətli səhmlər bazarının inkişafını dəstəkləməkdir. Biz fəxr edirik ki, dövlətin əsas səhmdar olduğu şəraitdə qarşıya qoyulan məqsədlərə nail ola bilmişik. Sərəncamın məqsədlərinə uyğun olaraq, əsas məqsəd mümkün qədər çox Azərbaycan vətəndaşının ABB-nin səhmlərinə investisiya qoymasını təmin etməkdir", - o bildirib.
Onun sözlərinə görə, səhmdarların sayının artması Azərbaycanın fond bazarlarının inkişafını göstərir və bu, öz növbəsində, iqtisadi inkişafa töhfə verir.
"ABB səhmlərin alımını ənənəvi və rəqəmsal kanallar, həmçinin, digər banklar və investisiya şirkətləri vasitəsilə hamı üçün əlçatan edib. Bu, əslində, hər kəsə açıq olan yeni bir "xalq səhmləri" formasını təmsil edir. Biz tarixi nəticəyə nail olduq - tariximizdə ilk dəfə 33 min nəfərdən çox investor ABB-nin səhmlərini alıb. Bu uğur yerli fond bazarının inkişafında yeni bir mərhələnin simvoludur", - o əlavə edib.
