Dünya Qarabağda erməni cinayətlərinə hələ də susur
44 günlük Vətən müharibəsinin nəticələri dövlətimizin gücünü, xalqımızın mübarizə əzmini, sarsılmaz həmrəyliyini bütün dünyaya nümayiş etdirdi. Azərbaycan möhtəşəm qələbə qazanmaqla tarixi ədalətin və ərazi bütövlüyünün bərpasına nail oldu.
Məsələ ondadır ki, ölkəmiz tarixi Zəfəri ilə mühüm geostrateji reallıqlar yaradıb. Bu reallıqlar regionda dayanıqlı sülhün, etibarlı təhlükəsizliyin və perspektiv çoxtərəfli əməkdaşlığın təmin olunması üçün həm unikal, həm də universal imkanlar formalaşdırır.
Müharibə dövründə Ermənistan beynəlxalq hüququn prinsiplərini pozub
Nəzərə almaq lazımdır ki, İkinci Qarabağ Müharibəsində təcavüzkar Ermənistan beynəlxalq hüququn norma və prinsiplərini dəfələrlə pozub. Ermənistan həmçinin “Silahlı münaqişələr zamanı mülki şəxslərin müdafiəsinə dair” 1949-cu il Cenevrə Konvensiyasının tələblərini də heçə sayaraq dinc əhaliyə qarşı terror əməllərini davam etdirib. 27 sentyabr - 10 noyabr 2020-ci il tarixləri ərzində Ermənistan Silahlı Qüvvələri tərəfindən vurulan zərbələr nəticəsində azərbaycanlı dinc əhalinin sıx yaşadığı rayon və şəhərlərin ərazisinə 30 minə yaxın mərmi və 227 raket atılıb. Döyüş meydanında məğlub duruma düşən Ermənistan davamlı şəkildə Gəncəyə, Mingəçevirə, Tərtərə, Bərdəyə, Qəbələyə və digər yaşayış məntəqələrimizə raket hücumları edərək müharibə və insanlıq əleyhinə cinayətlər törədib. Mülki şəxslərimizin çoxsaylı əmlakına ciddi ziyan vurulub, yaşayış evləri, çoxmənzilli yaşayış binaları, qeyri-yaşayış sahələri dağıdılıb. Bütövlükdə, Ermənistanın törətdiyi müharibə cinayətləri dünya ictimaiyyətinə bir neçə istiqamətdə çatdırılıb. Prezident İlham Əliyev yüksək tribunalardakı çıxışlarında, bütün görüşlərində, beynəlxalq səviyyədə aparılan danışıqlarda birmənalı şəkildə bunu ortaya qoyur. Aparılan araşdırmalar, ekspert rəylərini ortaya qoymaqla ermənilərin Azərbaycana təzminat ödəməsi məsələsi gündəlikdədir. Ermənilər bilməlidir ki, onlar Azərbaycan ərazisində törətdikləri vəhşiliklərə, iqtisadi, siyasi, hərbi və digər cinayətlərə görə cavab verəcəklər. Xüsusən də 44 günlük Vətən müharibəsi dövründə Prezident İlham Əliyevin dünyanın 30-a yaxın aparıcı media orqanına verdiyi müsahibələr informasiya müharibəsində olduqca önəmli rol oynadı. Erməni yalanlarının, vandalizm aktlarının ifşası baxımından həmin müsahibələrin önəmi böyükdür.
Beynəlxalq təşkilatlar, YUNESKO buna öz münasibətini bildirməyib
O da məlumdur ki, torpaqlarımız azad ediləndən sonra bir sıra məsələlər faktlarla ortaya çıxdı. Məlum oldu ki, işğal dövründə erməni vandallar nəinki yaşayış evlərini, dini, tarixi abidələri də məhv ediblər. Ekologiyaya ciddi ziyan vurublar. Bununla bağlı ciddi faktlar olsa da, hələ də beynəlxalq təşkilatlar, YUNESKO buna öz münasibətini bildirməyib. Azərbaycandan dini ibadətgahların qorunmasını tələb edən bu qurumlar, erməni vandalizmi ilə bağlı faktlara mövqe bildirmirlər. Halbuki, Azərbaycan ərazilərini işğaldan azad edəndən sonra bir sıra təşkilatlar, dövlət rəsmiləri haray saldılar ki, Qarabağda dini ibadətgahlar, kilsələr qorunmalıdır, onlar guya təhlükə altındadır. Halbuki, həmin abidələrin ermənilərə heç bir dəxli yoxdur. Həmin abidələr qədim Alban abidələridir. Onlara da Azərbaycan sahib çıxır.
Avropa, ABŞ təşkilatlarının Azərbaycana baxışında ikili standartlar var
Sözügedən məsələ ilə bağlı fikirlərini “Bakı-Xəbər”lə bölüşən tarix elmləri doktoru, professor Məhərrəm Zülfüqarlı bununla bağlı bir sıra məqamlara toxundu: “Erməni vandallarının abidələri dağıtması, ekologiyaya ziyan vurması, kəndlərimizi, dini abidələrimizi viran qoymasına münasibət olmadığına görə, onlar özlərini daha azğın aparırlar. Biz bunu belə izah etməliyik ki, bütün o təşkilatların ikili yanaşması var. Yəni həmin təşkilatlar ikili standartlardan çıxış edirlər. Problem ondadır ki, onların da siyasi təəssübkeşliyi var. Üstəlik, burada xristian təəssübkeşliyi faktoru var. Ona görə də biz bilməliyik ki, ermənilər hansı cinayəti törədirlərsə, onların qərbdə havadarları var. Əvvəllər Osmanlı imperiyası dövründə Qərb Osmanlıya necə münasibət bəsləyirdisə, indi Türkiyəyə də həmin münasibət bəslənilir. Türkiyəyə necə münasibət bəslənilirsə, Azərbaycana da həmin münasibət sərgilənir. Azərbaycan Alban kilsələrini bərpa edir, onlara öz abidəmiz kimi baxırıq. Ancaq təəssüflər olsun ki, buna da əks reaksiya verirlər. Ona görə də bilməliyik ki, hansı təşkilat olmasından olmayaraq Avropa, ABŞ təşkilatlarının Azərbaycana baxışında ikili standartlar var. Necə deyərlər, ermənilərə doğma münasibət, bizlərə isə ögey münasibət var. Ona görə də Azərbaycanın erməni vandallığı ilə bağlı etdiyi müraciətlər kağız üzərində qalır, buna hansısa reaksiya verilmir. Ancaq Azərbaycan gücləndikcə bizim səsimizi eşitməyə məcburdular. Çünki dünya gücə bağlıdır. Gücün varsa səninlə hesablaşacaqlar. Gücün yoxdursa hesablaşmayacaqlar. Məlum olduğu kimi, 2020-ci ildə 44 günlük Vətən müharibəsində biz bunu sübut etdik. Ona görə də erməni vandalizmini sübut etmək üçün gücümüzü artırmalıyıq. Ermənilər kəndləri, tarixi abidələri, məscidləri ona görə viran qoyublar ki, Qarabağla Azərbaycanın digər əraziləri arasında bufer zona yaratsınlar. Çünki heç kim sonradan gəlib orada yaşaya bilməsin. Ona görə ki, ermənilər gec-tez ərazilərimizin azad ediləcəyini bilirdilər. Bütün bunları Qərb bizdən də yaxşı bilir. Sadəcə, ikili standartlar səbəbindən görməzdən gəlirlər”.
Vidadi ORDAHALLI
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
