Azərbaycana gətirilən düyü tona 15 dollar bahalaşıb
Akif Nəsirli: “Yerli düyü istehsalını inkişaf etdirmək üçün stimullaşdırıcı addımlar artmalıdır”
Ölkəyə idxal olunan düyünün qiyməti artıb. Bu barədə Dövlət Gömrük Komitəsi məlumat yayıb. Məlumatda bildirilir ki, bu ilin yanvar-avqust aylarında Azərbaycana 50 milyon 39 min dollar dəyərində 48 min 130 ton düyü idxal olunub.
Yəni düyünün 1 tonu 104 dollara ölkəyə gətirilib. Ötən ilin eyni dövründə isə 36 milyon 685 min dollar dəyərində 41 min 38 ton düyü idxal edilib. Həmin vaxt isə 1 ton düyünün idxalı 89 dollara başa gəlib.
Qeyd edək ki, Azərbaycan düyü tələbatını idxal hesabına ödəyir. Daxildə də düyü istehsal edilsə də, tələbat idxal hesabına ödənilir.
Maraqlıdır, yerli düyü istehsalı necə inkişaf etdirilməlidir?
“Düyünün bahalaşma səbəbi düyü istehsalçısı olan Hindistanın dünya bazarına tətbiq etdiyi rüsumun artması ilə bağlıdır”
Liberal İqtisadçılar Birliyinin sədri Akif Nəsirli “Bakı-Xəbər”ə açıqlamasında bildirdi ki, düyünün bahalaşma səbəbi düyü istehsalçısı olan Hindistanın dünya bazarına tətbiq etdiyi rüsumun artması ilə bağlıdır: “Bu da dünya bazarında düyünün satış qiymətinin artmasına səbəb olur. Yaranmış vəziyyət istər-istəməz Azərbaycana da təsir edir. Beləliklə, düyünün qiyməti artmaqda davam edir”.
Ekspertin sözlərinə görə, ölkəmizdə də düyü istehsal olunur. Əsasən, cənub zonasında düyü yetişir. Lakin daxili istehsal yetərli səviyyədə deyil: “Daxili istehsal ölkənin təxminən 20 faizini təmin edir. Danılmaz faktdır ki, hökumət bu sahəni stimullaşdırır, subsidiya verir. Ancaq bu sahədə görülən işlər kifayət etmir. Hesab edirəm ki, yerli düyü istehsalını inkişaf etdirmək üçün stimullaşdırıcı addımlar artmalıdır. Elə işlər görülməlidir ki, ölkə tələbatının təxminən 50-60 faizi yerli istehsal hesabına təmin olunsun, idxaldan asılılıq azalsın. Hesab edirəm ki, hökumət bu istiqamətə diqqət göstərməlidir, müəyyən dəyişiklik olunmalıdır. Fermerlər daha çox stimullaşdırılmalıdır ki, ölkə daxilində düyü istehsalı artsın. Buna şərait yaradılmalıdır”.
Günel CƏLİLOVA
