Albaniyada Vatikan tipli “Bektaşi dövləti” qurulur - baş nazir detalları açıqladı...
Albaniyanın paytaxtı Tiranada müsəlman bektaşi icması üçün Romadakı Vatikana bənzər cırtdan dövlətin yaradılması planlaşdırılır. Bu barədə “The New York Times” qəzeti Albaniyanın baş naziri Edi Ramaya və bektaşi sufi ordeninin dini lideri Baba Mondi kimi tanınan Edmond Brahiməyə istinadən yazıb.
Rama dini dözümlülüyü təşviq etmək üçün bektaşilərə “Vatikan tipli” bir anklav vermək istədiklərini deyilb.
Yeni dövlətin məqsədinin Albaniyanın qürur duyduğu tolerant İslam anlayışını təbliğ etmək olduğunu bildirən Rama deyib ki, "bu xəzinəni, yəni dini tolerantlığı qorumalı və heç vaxt gözardı etməməliyik.
Rama, planla bağlı yalnız bir neçə ən yaxın köməkçisinin məlumatlı olduğunu və ABŞ kimi NATO müttəfiqlərinin məlumatlandırılmadığını bildirib.
Paytaxt Tiranada qurulacaq və "Bektaşi Ordeni Suveren Dövləti" adlandırılan bir quruluşun planlarını yaxın vaxtlarda açıqlayacağını bildirən Rama, sözügedən strukturun qurulmasının zaman alacağını bildirib. Baş nazir deyib ki, yeni qurulan dövlətin ordusu, sərhədçiləri və məhkəməsi olmayacaq, pasport rəngi yaşıl olacaq. Kimlərin pasport ala biləcəyi kimi məsələlər isə işlənəcək. Onun sözlərinə görə, bunun mülkiyyət məsələsi deyil, mənəvi məsələdir. Ehtimal olunur ki, gələcək şəhər-dövlət ərazisində spirtli içkilərdən istifadəyə icazə veriləcək, qadınlardan hicab taxmaq tələb olunmayacaq və istədiklərini geyinməyə icazə veriləcək, heç bir həyat tərzi resepti tətbiq edilməyəcək.
Qurulması planlaşdırılan yeni dövlətin dünyanın ən kiçik ölkəsi olan Vatikanın yalnız dörddə biri böyüklüyündə olacağı bildirilir.
Albaniyadakı son siyahıyaalmaya görə, təxminən 2 milyon 400 min əhalinin təxminən 115 minini bektaşilər təşkil edir.
TAHİR
