Tramp Ermənistana dəstəyi dayandıracaq - ABŞ-ın erməni diasporu qorxuya düşüb...
Qulamhüseyn Əlibəyli: “Ermənilərin Trampa qəzəbi aydın görünür”
ABŞ-dəki erməni diasporunun rəhbərlərinin fikrincə, noyabrda keçiriləcək prezident seçkilərində qalib gələcəyi təqdirdə Donald Tramp Vaşinqtonun Ermənistana dəstəyini dayandıracaq.
“The National Interest” jurnalında dərc edilən “Ermənistan və ABŞ-da seçkilər. Ermənistan Rusiyanın arxa bağçasında ABŞ üçün platsdarm ola bilər” adlı məqalədə məhz bundan danışılır.
ABŞ-dəki erməni diasporunun nümayəndələri hesab edirlər ki, Donald Tramp seçkidə qalib gəlsə, Vaşinqtonun Ermənistana hazırkı dəstəyi dayanacaq. Əgər demokratların namizədi Kamala Harris qalib gəlsə, onda ABŞ Azərbaycanla münasibətləri saxlasa da, indiki kursa sadiq qalaraq Ermənistanla əməkdaşlığı dərinləşdirə bilər: “Ermənistanın təhlükəsizlik sistemi Rusiyadan ayrılaraq ABŞ-a meyl edir. Bu dəyişiklik ABŞ-nin bu il iyunun 11-də Ermənistanla münasibətləri strateji tərəfdaşlıq səviyyəsinə yüksəltməsində ən dəqiq şəkildə öz əksini tapıb”.
Bir sözlə, ermənilər Trampın seçilməsini qəti istəmirlər.
“Onlar çalışır ki, ona olan qəzəblərini Harrisin seçilməsinə kömək etməklə, dəstəkləməklə çıxsınlar”
Sözügedən məsələni “Bakı-Xəbər”ə şərh edən sabiq millət vəkili, hüquqşünas Qulamhüseyn Əlibəyli hesab edir ki, ABŞ bir qədər sabit xarici siyasət kursuna malik olan dövlətdir: “Prezidentlər bu formalaşmış sabit xarici siyasət kursuna müəyyən cüzi dəyişikliklər edə bilərlər. Ancaq əsaslı və köklü dəyişikliklər etmək üçün illər uzunu fəaliyyət göstərmək lazımdır. Ona görə də, prezidentin kimliyindən asılı olaraq, erməni lobbisi çalışır ki, həmin o formalaşmış xarici siyasət kursu çərçivəsində Ermənistan, ermənilər üçün müəyyən üstünlük qazanmış olsunlar. “The National Interest” jurnalında dərc edilən “Ermənistan və ABŞ-da seçkilər. Ermənistan Rusiyanın arxa bağçasında ABŞ üçün paltsdarm ola bilər” adlı məqalədə də məsələ məhz bu şəkildə qoyulur. Məsələ belə qoyulur ki, ermənilər Birləşmiş Ştatlar üçün Rusiyaya qarşı bir plasdarm rolunu oynaya bilərlər. Təxminən ermənilərin növbəti dəfə satışa çıxarılması prosesi gedir. Bunu ABŞ-da da başa düşürlər. Ona görə də ermənilərdən bir alət kimi istifadə etməyə çalışırlar. Birgə hərbi təlimlərin keçirilməsi, hərbi sursatın Ermənistana daşınması həmin siyasətin tərkib hissəsidir. Bugünkü gündə prezidentin kim olmağından asılı olmayaraq, Tramp və ya Harrisin prezident seçilməyindən asılı olmayaraq xarici siyasət kursunda ciddi dəyişiklik gözləmirəm. Yəni Ermənistana və Azərbaycana münasibətdə bu gün davam edəcək siyasətdə ciddi bir dəyişikliyin olacağı ehtimal olunmur. Düzdür, ermənilər yenə çalışacaqlar ki, yeni seçilmiş prezidentdən öz maraqları üçün istifadə etsinlər. Tramp bir dəfə prezident oldu, amma onun dövründə ermənilər Ermənistan üçün xüsusi imtiyaz əldə edə bilmədilər. Ona görə də onların Trampa qəzəbi aydın görünür. Onlar çalışır ki, Trampa olan qəzəblərini Harrisin seçilməsinə kömək etməklə, dəstəkləməklə çıxsınlar. Bunun müqabilində Harrisdən hansısa imtiyazlar qoparmaq istəyirlər. Ancaq bu o demək deyil ki, hər şey Ermənistanın istəklərinə uyğun olacaq”.
Vidadi ORDAHALLI
