Rusiyanın son vaxtlar ermənilərə verdiyi "Smerç"lər Azərbaycana bu təhlükəni törədir...
Şair Ramaldanov: “Ermənistanın "Smerç" YARS raketləri ilə təmin olunması nə Azərbaycan, nə də region üçün yaxşı nəticə vəd edir”
Rusiya Ermənistan ordusunu yenidən silahlandıracaq. Bu barədə xarici media məlumat yayıb. Məlumata görə, Moskva İrəvana böyük miqdarda "Smerç" reaktiv yaylım atəşi sistemi (YARS) üçün raketlərin göndərilməsinə başlayıb. Bu, təbii olaraq, Ermənistanın revanşist və təcavüzkar planlarını qızışdırır.
Məlumat üçün bildirək ki, "Smerç" YARS raketləri bir sıra xüsusiyyətlərə malikdir.
Maraqlıdır, "Smerç" YARS raketləri Ermənistan ordusunun əlində olarsa bu hal Azərbaycana qarşı nə kimi təhlükə törədə bilər? "Smerç" YARS raketləri nə dərəcədə təhlükəlidir?
“Yars raketlərinin 12 min kilometrə qədər atış məsafəsi var, daha çox qitələrarası istifadə olunur, düşünmürəm ki, ballistik raket Ermənistana verilsin”
Ehtiyatda olan polkovnik, Qarabağ müharibəsi və Silahlı Qüvvələrin veteranı, hərbi ekspert Şair Ramaldanov “Bakı-Xəbər”ə şərhində bildirdi ki, Rusiyanın Qərb, Hindistan və digər ölkələrin Ermənistanı silahlandırmasına qarşı hansısa addım atacağı istisna olunmurdu. Bu, Rusiyanın maraqlarına uyğun deyildi: “Nə qədər Qərb və ABŞ Ermənistanla hərbi texniki sahədə əməkdaşlıq edəcəksə, bu, regionda həmin ölkələrin təsir mexanizmlərinin artırılması üçün şərait yaradacaq. Belə olduğu halda Rusiyanın məlum addımı atacağı gözlənilirdi. Məlumat üçün bildirim ki, "Smerç" silah vasitələri İkinci Qarabağ müharibəsinə qədər də Ermənistanda olub. Həmçinin, Ermənistan KTMT-nin üzvüdür. Onu da deyim ki, KTMT-nin bütün üzvlərinin planlı şəkildə silahlandırılması planı da var. Bu səbəbdən də Ermənistanın “Smerç" tipli yaylım vasitələri ilə silahlandırılması gözlənilən idi. Ancaq Ermənistanın YARS raketləri ilə təmin olunması elə də inandırıcı görünmür. Çünki YARS Rusiyanın strateji silahlarına daxil olan ballistik raketdir. Məlumat üçün bildirim ki, bu raketin 12 min kilometrə qədər atış məsafəsi var. Daha çox qitələrarası istifadə olunur. Düşünmürəm ki, ballistik raket Ermənistana verilsin”.
Həmsöhbətimiz onu da əlavə etdi ki, Rusiya Ermənistanın təhlükəsizliyinə zəmanətçidir. Etmənistanı ən çox silahlandıran məhz Rusiyadır: “Hazırki şəraitdə Ermənistanın hansısa silahla tımin olunması Azərbaycanın diqqətindən qaça bilməz. Bütün prosesləri Azərbaycan tərəfi izləyir, diqqətdə saxlayır, müəyyən təhlillər aparır: “Prezident İlham Əliyev məlum məsələ ilə bağlı çıxışlarının birində bildirmişdi ki, istər Ermənistan, istərsə də onların havadarları tərəfindən Azərbaycana qarşı təhlükə olarsa ölkəmiz dərhal cavab verəcək”.
Ş.Ramaldanov hesab edir ki, Ermənistanın "Smerç" YARS raketləri ilə təmin olunması nə Azərbaycan, nə də region üçün yaxşı nəticə vəd edir. Hər halda, Azərbaycan ordusu ölkənin ərazi bütovlüyünü təmin etmək üçün, hansısa təxribata cavab vermək üçün daim hazırlıqlıdır. Hər zaman olduğu kimi, Azərbaycanın “dəmir yumruğ”u istənilən təxribata cavab verməyə hazırdır.
Günel CƏLİLOVA
