Əliyev İrəvanla sülh üçün 2 çox vacib şərti Blinkenə xatırlatdı...
Ramil Hüseynov: “Sözügedən məsələ Azərbaycan üçün prinsipial əhəmiyyət kəsb edir”
“Azərbaycanın səyləri nəticəsində bölgədə beynəlxalq hüquqa əsaslanan yeni reallıqlar yaranıb”. Bu barədə Prezident İlham Əliyev ABŞ Dövlət katibi Entoni Blinkenlə telefon danışığı zamanı bildirib.
Telefon danışığı zamanı Prezident Əliyev Ermənistanla Azərbaycan arasında sülh müqaviləsinin təşəbbüskarının da məhz ölkəmiz olduğunu qeyd edərək, bu müqavilənin imzalanması üçün Ermənistanın öz Konstitusiyası və digər qanunverici aktları əsasında Azərbaycana qarşı olan ərazi iddialarına son qoymasının, həmçinin keçmişin qalığı olan ATƏT-in Minsk qrupu və onunla bağlı olan bütün təsisatların fəaliyyətinə son qoyulmasının vacibliyini vurğulayıb. Sərhədlərin delimitasiyası məsələsinə toxunan Prezident İlham Əliyev ikitərəfli proses çərçivəsində əldə olunmuş müsbət nəticələri qeyd edib və Əsasnamə əsasında bu prosesin aparılacağını bildirib.
“Ən azından, Ermənistan hüquqi baxımdan öhdəlik götürməlidir ki, həmin maddə 2027-ci ildə...”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, bu, Azərbaycanın prinsipiallığının göstəricisidir: “Bu bir daha onu göstərir ki, sözügedən məsələ Azərbaycan üçün prinsipial əhəmiyyət kəsb edir. Ona görə də Azərbaycan bu məsələdə qətiyyətli mövqedən çıxış edir. Çünki bunu şərtləndirən faktorlar var. Məsələ ondadır ki, Ermənistan öz Konstitusiyasını dəyişmədən sülh sazişi imzalansa, bu, dayanıqlı olmayacaq. Kim zəmanət verir ki, sabah başqa qüvvələr hakimiyyətə gələndən sonra sülh sazişinin Konstitusiyaya zidd olduğu tələbini ortaya atmayacaqlar? Ermənistan Ali Soveti 1989-cu ulin dekabrında Qarabağın bu ölkəyə birləşdirilməsinə dair qanunsuz qərar qəbul edib. Düzdür, o vaxt SSRİ-nin müvafiq qurumları Ermənistanın qərarını qanunsuz hesab etdilər. Ancaq fakt odur ki, Ermənistanın 1990-cı ildə qəbul etdiyi Müstəqillik Bəyannaməsində həmin qərara istinad var. Ona görə də bu, Konstitusiyadan çıxarılmalıdır. Yaxud da Ermənistan hüquqi baxımdan öhdəlik götürməlidir ki, həmin maddə 2027-ci ildə keçiriləcək referendumda Konstitusiyadan çıxarılacaq. Problem ondadır ki, Ermənistan hakimiyyəti belə bir öhdəliyi də üzərinə götürmək istəmir. Birləşmiş Ştatlar isə hər vəchlə sülh sazişinin tez imzalanmasına çalışır. Ancaq yaxşı olardı ki, Blinken Ermənistan Konstitusiyasından Azərbaycana yönəlik ərazi iddialarının çıxarılmasını tələb etsin. O cümlədən, onsuz da bir səmərəsi olmayan ATƏT-in Minsk qrupunun saxlanılmasının heç bir əhəmiyyəti yoxdur. Formal olaraq bu qurumun mövcudluğu kimə lazımdır ki? Ona görə də Minsk qrupunun mövcudluğuna son qoyulmalıdır. Bütün bunlardan sonra sülh sazişi imzalana bilər”.
Vidadi ORDAHALLI
