Erkin Qədirliyə görə saxtakar 6 məntəqə sədrinə cinayət işi açıla bilər...
Şəmsəddin Əliyev: "...Cinayət Məcəlləsinin 161-ci maddəsi ilə cinayət işinin başlanmasına imkan verilə bilər"
REAL partiyası 16 saylı Yasamal İkinci Seçki Dairəsində 6 məntəqənin nəticələrinin ləğvi üçün Dairə Seçki Komissiyasına müraciət edib. Məlum olduğu kimi, bu dairədən REAL-ın namizədi Erkin Qədirli qalıb gəlib.
Erkin Qədirli mətbuata açıqlamasında xəbəri təsdiqləyib. O, 6 seçki məntəqəsi üzrə nəticələrlə bağlı Mərkəzi Seçki Komissiyasına şikayət göndərdiyini bildirib: "Müşahidəçilərim əlimizdə olan səslərin sayılması ilə komissiyanın protokolları arasında uyğunsuzluqlar qeydə aldılar. Dairə seçki komissiyasından mənə verilən protokollarda səs verənlərin sayı şişirdilib.
Görünür bu, seçici fəallığını artırmaq üçün edilib. Səsvermə prosesi və seçki fəallığı ilə bağlı heç bir illüziyam yoxdur. Bəli, mən seçkilərdə qalib gəldim, lakin protokollarda göstərilən üstünlüklə yox".
Deputat 2020-ci il seçkiləri zamanı da eyni hadisəni xatırladıb. Həmin vaxt E.Qədirli şikayət verib və beş məntəqədə səsvermənin nəticələri ləğv edilib.
Millət vəkili onu da bildirib ki, MSK-nın protokollarına əsasən, təmsil etdiyi məntəqələrdə seçki fəallığı 22 faiz təşkil edib, baxmayaraq ki, reallıqda seçicilərin cəmi 14 faizi seçkiyə gəlib.
"Mən Mərkəzi Seçki Komissiyasına müraciət etmişəm ki, həmin məntəqələrdə səsvermənin nəticələri ləğv edilsin", - deyə deputat əlavə edib.
Qeyd edildiyi kimi, E.Qədirli hazırda öz dairəsində ən çox səs toplayan namizəddir, adı qalib kimi siyahıda çıxıb, düzdür, hələ təsdiqlənməyib. Dairədə səsvermənin nəticələrinə görə faktiki liderdir. Amma o, 6 məntəqənin nəticələri ilə bağlı MSK-ya şikayət edib ki, 6 məntəqədə qanun pozuntusu var. O məntəqlərdə səslərinin şişirdildiyini deyir. Tutalım, o 5 səs alıbsa, orda 15 səs yazıblar. Biz bilmirik həqiqət nədir. E.Qədirlinin dedikləri təsdiqini tapsa, yəni məlum olsa ki, o 6 məntəqədə səslərin sayı şişirdilib, həmin 6 məntəqənin sədrlərinə və məntəqə üzvlərinə cinayət işi qaldırılmalıdırmı? Hansı əsaslarla, hansı təfsirlə, hansı maddə ilə cinayət işi qaldırıla bilər?
"Bu sübuta yetirilərsə, məhkəmə tərəfindən həmin şəxslər cərimələnə və yaxud da 2 il müddətində islah işləri ilə cəzalandırıla bilər"
Hüquqşünas Şəmsəddin Əliyev "Bakı-Xəbər"ə bildirdi ki, deputatlığa namizədin belə bir müraciət etməsi təcrübədə nadir rast gəlinən haldır. "Adətən namizədlər şikayət edirlər ki, onlara verilən səslər düzgün hesablanmayıb, seçki dairəsinin, seçki məntəqəsinin təmsilçilərinin səhlənkarlığı ucbatından səsləri məhdudlaşdırılıb, verilən səsləri gizlədiblər və sair. Amma Erkin bəyin müraciəti tamam başqa formadadır. Hörmətlə yanaşmaq lazımdır. Bu bir daha deputatlığa namizədin seçkilərə və seçicilərin fəaliyyətinə obyektiv yanaşmasının təzahürüdür. Yoxlama nəticəsində onun dediyi hallar öz təsdiqini taparsa buna hüquqi qiymət verilməsi mümkündür. Yəni seçki sənədlərinin saxtalaşdırılması, onun xeyrinə səslərin şişirdiləməsi, bilə-bilə səslərin düzgün hesablanmaması, yaxud da səsvermənin başqa tələblərinin pozulması ilə bağlı faktlar aşkar edilərsə onda həmin o 6 seçki məntəqənin sədrlərinə və üzvlərinə qarşı Cinayət Məcəlləsinin 161-ci maddəsi ilə cinayət işinin başlanmasına imkan verilə bilər. Bu, vətəndaşların konstitusion hüquqlarına yönələn hərəkət və ya hərəkətsizlikdir. Buna görə də, müvafiq istintaq orqanları bu maddə ilə cinayət işinə başlasalar həmin qaydaları pozan şəxslərə cərimələr tətbiq edilə bilər, ya da onlar 2 ilə qədər islah işləri ilə cəzalandırıla bilərlər. Amma deyim ki, burada azadlıqdan məhrumetmə cəzası yoxdur. Hazırda qüvvədə olan Seçki Məcəlləsində də vətəndaşların seçki hüquqlarının pozulmasından şikayətə və vətəndaşların seçki hüquqlarının pozulmasına görə məsuliyyət var. Məcəllənin 16-cı fəslində 112 və 116-cı maddələrdə həmin o məsələ ehtiva eidlib"-deyə Ş.Əliyev qeyd etdi.
Hüquqşünasın sözlərinə görə, E.Qədirlinin müraciəti ciddi şəkildə araşdırılmalıdır və əgər bu təsdiqini taparsa qeyd edilən məcəllələrin müvafiq
maddələri ilə cinayət təqibinə başlamaq olar. "Bu sübuta yetirilərsə, məhkəmə tərəfindən həmin şəxslər cərimələnə və yaxud da onlar 2 il müddətində islah işləri ilə cəzalandırıla bilərlər"-deyə Ş.Əliyev vurğuladı.
İradə SARIYEVA
