Məşhur "BNA" Bakıda taksi dayanacaqlarını necə ləğv etdisə, hələ də bərpa oluna bilmir...
Fərid Həşimov: “Taksi dayanacaqlarının yaradılması mütləqdir”
Bu gün Bakının ictimai nəqliyyat sistemində problemlər var. Bir çox avtobuslar düzgün fəaliyyət göstərmir, intervallarında problemlər mövcuddur, dayanacaqlara gec çatırlar.
Məsələn, insanlar düşünür ki, 60 qəpik verib gec gələn, yolda bir neçə dəfə dayanan avtobusla getməkdənsə, “manatlıq” taksi ilə getmək daha yaxşıdır. Ancaq bir müddətdir ki, Bakıda “manatlıq” taksilər ləğv olunub. "Manatlıq" taksilərin əsas toplanma yeri olan metronun "20 Yanvar" stansiyasının ətrafı həmin taksilərdən təmizlənib. Lakin taksilərin ərazidən yığışdırılması bir sıra problemlər də yaradıb. Ərazidən daha çox Sumqayıt istiqamətinə gedən taksiləri indi sərnişinlər dörd gözlə axtarır. Taksi sürücüləri isə avtomobillərini harada gəldi saxlayır və harda gəldi dayanmamaqdan ötrü onlar üçün taksi dayanacağının yaradılmasını təklif edirlər.
Xatırladaq ki, bir neçə ilə əvvəl Bakı şəhərində onlarla taksi dayanacağı vardı. Lakin Bakı Nəqliyyat Agentliyi həmin taksi dayanacaqlarını ləğv etdi. Ötən illərdə yeni taksi dayanacaqlarının yaradılacağı barədə anonslar verilsə də, hələ də yaradılmayıb.
Məlumat üçün bildirək ki, taksi parkının yenilənməsi barədə hökumətin müəyyən etdiyi yeni qaydalar 1 iyuldan qüvvəyə minib. Lakin taksi dayanacağı ilə bağlı problem hələ də həll olunmayıb.
“Bakı daha bir möhtəşəm tədbirə - COP29-a ev sahibliyi edəcək, şəhərə gələcək on minlərlə qonaq daha çox taksi xidmətindən yararlanmaq istəyəndə pis vəziyyətdə qalacağıq”
Nəqliyyat eksperti Fərid Həşimov “Bakı-Xəbər”ə şərhində bildirdi ki, taksi dayanacaqlarının yaradılması mütləqdir: “Taksi dayanacaqlarının yaradılması üçün dünya ölkələrinin təcrübəsindən istifadə etmək olar. Həmin ölkələrdə nəqliyyat vasitəsi çox olsa da sıxlıq yoxdur. Xarici ölkələrdə taksi dayanacaqları olur. Onlayn taksi sifarişi verməyən sərnişin taksi dayanacağına yaxınlaşaraq bu xidmətdən istifadə edir. Bizdə isə vəziyyət olduqca bərbaddır. “Koroğlu” və ya “20 Yanvar” metrostansiyanın yaxınlığında dayanan taksiləri indi sərnişinlər əl-əl axtarır. Marşrut sayı azdır, taksi yoxdur, camaat evinə necə getsin? Bunu fikirləşmək lazımdır. Qadağan etməzdən əvvəl çıxış yolu, əncam tapılmalıdır, sonra icra edilməlidir. Bizdə birinci qadağan edirlər, qara camaat saatlarla yolda qalır, nə vaxtsa bir çarə taparlar. Məlumat üçün deyim ki, bir müddət əvvəl AYNA yeni taksi dayanacaqlarının yaradılacağı barədə anons verdi. Lakin icraat yoxdur. Nəzərə almaq lazımdır ki, 2 aydan sonra Bakı daha bir möhtəşəm tədbirə COP29-a ev sahibliyi edəcək. O zaman şəhərə gələcək on minlərlə qonaq daha çox taksi xidmətindən yararlanmağa çalışacaq. Bəs, onda qonaqların bu ehtiyacları necə ödəniləcək? Bu kimi məsələləri də nəzərə almaq lazımdır”.
Günel CƏLİLOVA
