“Azdrama”da Əlif Cahan - Ziya Ağa münaqişəsi - “qudurdanda belə olur"...
Azərbaycan Dövlət Akademik Milli Dram Teatrı ölkənin baş teatrı olduğu üçün burada baş verən ən kiçik bir hadisə belə ictimaiyyət tərəfindən müzakirə edilir. Onu da qeyd edək ki, bu teatr yaradıcılıq uğurları ilə paralel olaraq, vaxtaşırı həm də orada yaşanan qalmaqallarla gündəmə gəlir.
İndiyə qədər “Azdramada” yüzlərlə olay, aktyor-rejissor qalmaqalları baş verib, aktyorlarla rəhbərlik arasında problemlər yaşanıb, aktyorların bir-biri ilə intriqaları olub. Bunlar sirr deyil, hər kəsin bildiyi bir məsələdir. Qalmaqaldan danışmışkən onu da əlavə edək ki, son günlər bu teatrla bağlı müxtəlif qalmaqallı fikirlər mövcuddur, bu haqda sosial şəbəkələrdə də kifayət qədər məlumatlara rast gəlmək mümkündür. Mətbuata görə, aylar əvvəl teatrdan işdən çıxarılmış aktyor Corc Qafarovun baş rejissor Mehriban Ələkbərzadə barədə dedikləri gündəm olub. O, rejissoru aktyorlara qarşı sərt və kobud davranmaqda ittiham edib.
Bu ilin iyununda Akademik Milli Dram Teatrında görkəmli aktyor Ağahüseyn Cavadovun 120 illik yubileyi zamanı da qalmaqal yaşandığı mətbuatda bildirilir. Belə ki, yubiley tədbirində mərhum aktyorun qohumları ilə teatr rəhbərliyi arasında qalmaqal yaranıb. Yubileyin, sərəncama əsasən, geniş şəkildə və teatrın səhnəsində keçirilməsi nəzərdə tutulsa da, bu belə olmayıb. Məlumatlı mənbə mətbuata bildirib ki, rəhbərliyin göstərişinə əsasən, tədbirin səhnədə deyil, foyedə keçirilməsi Ağahüseyn Cavadovun qohumlarının etirazına səbəb olub. Bundan sonra mədəniyyət ocağının süpürgəçiləri və digər texniki işçilər də mərasimə cəlb olunublar ki, daha "sanballı" ab-hava yaransın. Amma bundan sonra vəziyyət bir qədər də dramatikləşib. Qohumlar teatrın rəhbərliyinə "heç olmasa ayrılan pulu yubileyə sərf edərdiniz, qonaqlar dəvət edərdiniz, belə yubiley kimə lazımdır?!" - deyərək teatrı tərk ediblər. Bu fikirlər də mətbuatda yer alıb.
Bu günlərdə isə teatrda növbəti qalmaqal baş verib. Bu barədə yerli medaiada ilginc məlumatlar yer alıb.
Mətbuatın yazdığına görə, bir neçə gün əvvəl “Azdramada” rejissor işləmiş və hazırda xaricdə yaşayan Əlif Cahan öz sosial şəbəkə hesabında teatrın aktyorlarından biri, Ziya Ağanın səsini yayıb.
Ziya Ağa həmin səs yazısında öyünərək nazirliyə və bəzi rəhbər işçilərə ünvanlı nalayiq ifadələr işlədib. Əlif Cahan bu səsi yayaraq, "işçiyə tərəfkeşlik edəndə, qudurdanda belə olur" - deyərək şərh edib.
Cavid Zeynallı: “Ziya Ağanın öz ərizəsinə əsasən əmək müqaviləsinə xitam verilib”
O da bildirilir ki, bu məsələ ilə bağlı tearda iclas keçirilib və aktyorla bağlı tədbir görülüb. Məsələ ilə bağlı Azərbaycan Dövlət Akademik Milli Dram Teatrının mətbuat xidmətinin rəhbəri Cavid Zeynallı ilə əlaqə saxladıq. C.Zeynallı “Bakı-Xəbər”ə açıqlamasında teatrda qalmaqal baş verdiyini təsdiqləməsə də, amma bildirdi ki, aktyor Ziya Ağa artıq bu teatrda işləmir. “Ziya Ağanın öz ərizəsinə əsasən əmək müqaviləsinə xitam verilib”-deyə C.Zeynallı bildirdi. Amma Ziya Ağanın hansı səbəbdən işdən çıxmaq barədə ərizə yazdığını açıqlamadı. Geniş açıqlama vermək istəməyən müsahibimiz “Bizim cavab ancaq budur”-dedi.
O, həmçinin qeyd etdi ki, teatrda işlər öz axarında davam edir: “Teatrda yaradıcı həyat qaydasında və ən yüksək şəkildə davam edir. Kollektiv üç gün əvvəl Sankt-Peterburqdan böyük bir festivaldan qayıdıb. "İblis və..." tamaşasının premyerası Aleksandrinski Teatrında olub. Bu, çox ciddi hadisədir.
Hazırda yeni tamaşalar üzərində iş gedir. Heç bir qalmaqal, narahatlıq yoxdur”.
Bəzi məlumatlara görə, Ziya Ağanın Əlif Cahan tərəfindən yayılan səs yazısı teatrda hay-küy yaradıb və rəhbərlik aktyorun işdən çıxarılması məsələsini qoyub. Aktyorun “Azdramadan” uzaqlaşdırılması barədə qərar isə teatrda yeni mövsümün açılışı münasibətilə keçirilən iclasda verilib. Mətbuata görə, iclasda səs yazısı yayılan Ziya Ağanın məsələsi qaldırılıb və o, işdən azad edilib.
Ziya Ağa: “İndi çəkilişdə olduğum üçün danışmaq imkanım yoxdur”
Baş verənlərlə bağlı aktyor Ziya Ağanın da mövqeyini öyrənmək istədik. Ziya Ağa “Bakı-Xəbər”ə “Mən hazırda çəklişdəyəm, danışa bilmirəm. Sizi başa düşürəm, açıqlama almaq istəyirsiniz, amma indi çəkilişdə olduğum üçün danışmaq imkanım yoxdur. İmkan tapan kimi özüm sizinlə əlaqə saxlayaram. Mənim fikirlərimə yer vermək istədiyiniz üçün çox sağ olun, sizinlə əlaqə saxlayaram”-deyə bildirdi.
Ziya Ağa bildirdi ki, baş verənlərlə bağlı açıqlama verəcək, amma vaxtını demədi. Gözləyək, aktyorun açqılaması gələr və məsələnin mahiyyəti aydın olar.
Aktyor geniş açıqlama verərsə, onu da yayacağıq.
Leyla QARAXANLI
