Ölkəmizə 21 milyon dollardan artıq ət idxal olunub - öz istehsalımız hardadır...
Akif Nəsirli: “Əhalinin qırmızı ətə olan ehtiyacı bu gün daha çox idxal hesabına ödənilir”
Azərbaycanın ətlə təminatında idxaldan asılılıq artır. Açıqlanan statistik rəqəmlərə əsasən, 2024-cü ilin yanvar-iyul aylarında Azərbaycana 30 min 722 ton ət idxal edilib. Dövlət Gömrük Komitəsinin statistikasına görə, bu həcmdə ətin dəyəri 68 milyon 543 min ABŞ dollar təşkil edib. Bunlar, ötən ilin eyni dövrü ilə müqayisədə həcm baxımından 6 min 490 ton (26,7 faiz), dəyər baxımından isə 21 milyon 602 min ABŞ dolları (46 faiz) çoxdur.
Məlumat üçün bildirək ki, Rusiya, Gürcüstan və Qazaxıstandan ölkəmizə ət idxal olunur. Maraqlıdır, Azərbaycanın ətlə təminatda idxaldan asılılığın artması hər hansı bir təhlükə yaradırmı?
“Azərbaycan çoxsaylı məhsullar üzrə idxaldan asılılığa malikdir, bu da ölkənin milli təhlükəsizlik məsələsinə təhdid sayılır”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, bütün məhsullar üzrə idxaldan asılılıq müəyyən risqlər yaradır. Ancaq Azərbaycan çoxsaylı məhsullar üzrə idxaldan asılılığa malikdir. Bu da ölkənin milli təhlükəsizlik məsələsinə təhdid sayılır: “Məlumat üçün deyim ki, 2015-ci ildən etibarən ətin idxalının artması prosesi start götürüb. Həmin ildən etibarən bütün örüş sahələri, yonca altında olan sahələr ləğv edilərək pambığa verildi. Bu tendensiya digər qurumların əl-ayağını açdı. Bələdiyyə və digər qurumlar örüş sahələrini öz məqsədlərinə uyğun olaraq satdı və ya icarəyə verdilər. Bununla da ölkədə heyvandarlıq sıxışdırılmağa başladı. 2018-ci ildən isə ölkədə olan heyvan sayı azaldı. 2018-ci ildən sonra isə ət yavaş-yavaş bahalaşmağa başladı. Heyvan sayının azalması ildən-ilə davam etdi. 2022-ci ildən başlayaraq ətin qiyməti bahalaşmağa başladı. Payıza doğru ətin satış qiyməti yenidən artacaq. Bu da bazarda ətin qıt olması ilə bağlıdır. Tələb çoxdur, təklif isə azdır”.
Həmsöhbətimizin sözlərinə görə, kənd yerlərində örüş yeri olmadığından, heyvanlar ancaq tövlələrdə bəslənilir: "Bu da məhsulun maya dəyərini artırır. Təbii ki, əksər kənd adamları da rəqabətə tab gətirə bilmədilər, heyvanlarını dəyər-dəyməzinə satdılar. Nəticədə istehsal ciddi şəkildə azaldı. Ona görə də əhalinin qırmızı ətə olan ehtiyacı bu gün daha çox idxal hesabına ödənilir. Bu sahəni dirçəlmək üçün örüş sahələri heyvandarlıqla məşğul olanların özünə qaytarılmalıdır. Həmçinin, işğaldan azad olunmuş ərazilərin imkanlarından da istifadə edilməlidir. Həmin torpaqlar minadan təmizlənəndən sonra heyvandarlıqla məşğul olmaq üçün şərait yaradılmalıdır. Ümid edirəm ki, işğaldan azad edilən ərazilərdə fermerlərin heyvandarlıqla məşğuliyyəti inkişaf etdiriləcək”.
Günel CƏLİLOVA
