Prezidentə impiçment başladı - vəzifələrini icra edə bilmir...
Hüseyn İbrahimov: “Bütün bunlar onu göstərir ki, hakimiyyət siyasi böhran ərəfəsindədir”
Fransada müxalifət Makrona qarşı impiçmentə başladı. Belə ki, solçuların Tabe Olmayan Fransa Partiyası respublika Prezidenti Emmanuel Makronun impiçment proseduruna başlayıb.
Bu barədə "X" sosial şəbəkəsində partiyanın parlament fraksiyasının rəhbəri Matilda Pano məlumat verib.
“Konstitusiyanın 68-ci maddəsinə uyğun olaraq, prezidentə qarşı impiçment elan edilməsi haqqında qətnamə layihəsi deputatların imzalaması üçün göndərilib. Makron seçicilərin etdiyi seçimə tabe olmaq və hökumətin formalaşdırılmasını sol qüvvələrə həvalə etmək istəmir, buna görə də biz onu kənarlaşdırmalıyıq”, - o yazıb.
Qeyd edək ki, avqustun 26-da Makron Tabe Olmayan Fransanın daxil olduğu solçu Yeni Xalq Cəbhəsi alyansının iqtisadçı Lüsi Kastenin baş nazir vəzifəsinə namizədlik təklifini rədd edib. Konstitusiyanın 68-ci maddəsi Fransa prezidenti öz vəzifələrini yerinə yetirmədiyi təqdirdə səlahiyyətlərinin vaxtından əvvəl dayandırılmasını nəzərdə tutur. Bu, parlamentin qəbul etdiyi qanunları təsdiqləməkdən imtina etməyə də aiddir.
“İmpiçment prosesi o qədər asan olmasa da, Makronun siyasi hakimiyyətinə güclü zərbə olacaq”
Sözügedən məsələ ilə bağlı fikirlərini “Bakı-Xəbər”lə bölüşən İdarəçilik Akademiyasının müəllimi, sosioloq Hüseyn İbrahimov hesab edir ki, bütün bunlar Makron hakimiyyətində siyasi böhranın pik həddidir: “Düzdür, ilk dəfə deyil ki, Fransada Makron hakimiyyətinə etirazlar edilir. Bundan əvvəl həmkarlar təşkilatlarının iştirakı ilə genişmiqyaslı aksiyalar keçirildi. Ondan sonra Fransanın koloniyalarında etiraz aksiyaları alovlandı. Daha sonra proseslərin qanunverici hakimiyyətə sirayət etməsini müşahidə etdik. Məsələ ondadır ki, Makronun partiyasının Avropa Parlamentinə, ondan sonra Fransa Milli Assambleyasına keçirilən seçkilərdə uduzması siyasi böhranı qaçılmaz etdi. Bütün bunlar onu göstərir ki, Makrona olan ehtimad tam tökənib və hakimiyyət siyasi böhran ərəfəsindədir. Bunun da ciddi əsasları var. Əsaslar ondan ibarətdir ki, Makron Fransa xarici siyasətində çox ciddi uğursuzluqlara imza atdı. Faktiki olaraq Fransa bir neçə ölkədən qovuldu. Paralel olaraq Fransanın iqtisadi göstəricilərində də ciddi geriləmələr var. Bütün bunlar azmış kimi, Makronun Ukrayna müharibəsində ölkəsinin iştirak edəcəyi ilə bağlı boş bəyanatları gərginliyi daha da körüklədi. Onun bu çağrışına qarşı həm Avropa İttifaqının bir sıra aparıcı dövlətləri, həm də Fransa ictimayəti, siyasi qüvvələr kəskin mövqe sərgilədilər. Sol qüvvələr yaxşı bilir ki, cəmiyyətdə Makrona olan etimad tükənib. Ona görə də daha konkret proqramlarla çıxış edərək sosial dayaqlarını itirmək istəmirlər. Bu yolda Makronun ciddi əngəl olduğunu nəzərə alaraq, impiçment prosesinə başlayıblar. Düzdür, bu o qədər asan olmasa da, Makronun siyasi hakimiyyətinə güclü zərbə olacaq. Ona görə ki, impiçment üçün parlamentdə digər siyasi qüvvələrin də dəstəyinə ehtiyac var. Baş verənlər onu göstərir ki, Makron həm cəmiyyətdə, həm parlamentdə nüfuzunu itirdiyi üçün dövləti idarə etmək gücündə deyil”.
Vidadi ORDAHALLI
