Ermənistanda Aİ missiyasının buraxılması vaxtı yetişdi...
Elşad Həsənov: “Aİ missiyası Azərbaycanın tələbini yerinə yetirməli və fəaliyyətini dayandırmalıdır”
Hazırda tərəflər arasında (Ermənistan ilə Azərbaycan) reqlament razılaşdırılıb. Razılaşmaya uyğun olaraq zəmin və çərçivə yaradılır ki, delimitasiya prosesi aparılsın. Qarşılıqlı anlaşma şəraitində proses bundan sonra da ikitərəfli əsasda davam edəcək. Sərhədlərin delimitasiya prosesi sırf ikitərəfli xarakter daşıyır.
Bu fikirləri jurnalistlərə açıqlamasında Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev söyləyib.
Daha sonra Prezident köməkçisi bunları qeyd edib: “Prosesin iki dövlət arasında sülh, qarşılıqlı anlaşma şəraitində gedişatını nəzərə alaraq hesab edirik ki, artıq Avropa İttifaqının sərhəd missiyasının Ermənistan tərəfdən Azərbaycan sərhədi yaxınlığında fəaliyyət göstərməyinə ehtiyac yoxdur. Bu missiyanın da fəaliyyətinə xitam verilməsinin zamanı yetişib”.
Aİ missiyası ilə bağlı bu təklif yerində qaldırılmış bir təşəbbüsdür. Məsələ ondadır ki, sözügedən missiya 2022-ci ilin sonlarında 2 aylıq yaradılıb. Sonra 2023-cü ilin yanvarında missiyanın fəaliyyət müddəti 2 ilə qaldırıldı. Bu isə o deməkdir ki, gələn ilin yanvarında missiyanın müddəti başa çatır. O zaman bu missiyanın müddətini uzatmağa nə ehtiyac var? Həm də bu, əlavə gərginlik mənbəyinə çevrilir. O üzdən, missiya buraxılmalı və vaxtı uzadılmamalıdır.
“Qarşı tərəf nəzərə almalıdır ki, Aİ-nin kəşfiyyat fəaliyyəti ölkəmizdə qıcıq yaradır və regionda gərginlik risqini artırır”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov da hesab edir ki, Aİ missiyasının mövcudluğuna heç bir ehtiyac yoxdur: “Avroittifaq missiyasında təmsil olunanların sayı əvvəl 40 nəfər olmaqla yaradıldı. Sonra onların sayı 100 nəfərə çatdırıldı. Onların tərkibi əsasən fransız və almanlardan təşkil olunmuşdu. Sonra missiyanın həm müddətini, həm də sayını artırdılar. Hətta onların sayının 1500 nəfərə çatdırılması gündəmə gətirildi. Digər ölkələrdən də Ermənistana müşahidəçilər göndərildi. Bu sırada Kanada xüsusi canfəşanlıq göstərirdi. Müşahidəçilər guya sərhəddə gedən prosesləri izləməli idilər. Guya onlar sərhəddə münaqişələrin olmaması üçün dəstək göstərəcəkdilər. Ancaq məlum oldu ki, missiyanın tərkibi keçmiş kəşfiyyatçılardan ibarətdir. Hətta Fransanın keçmiş generallarından biri sərhədə gələrək binoklla Azərbaycan ərazisini müşahidə edirdi. Bir sözlə, Aİ missiyasının əsas məqsədi Azərbaycan ərazisi barədə kəşfiyyat məlumatları toplamaq və sonra təxribat işləri aparmaq idi. Buna sübut Çexiya vətəndaşının minalanmış ərazini keçərək Azərbaycana daxil olması idi. Düzdür, o saxlanılaraq həbs edildi, amma onun bu addımı təsadüfi deyildi. Baxın, mülki vətəndaşlar minaya düşür, amma xaricdən gələn vətəndaş minalanmış sahəni şox asanlıqla keçir. Çünki müşahidə missiyası bu yöndə ona yardım edib. Digər tərəfdən, Aİ missiyası təkcə Azərbaycana qarşı yox, Rusiya və İrana da qarşı kəşfiyyat fəaliyyəti ilə məşğuldur. Ona görə də bu missiyanın fəaliyyəti ilin sonunda dayanmalıdır. Prezidentin köməkçisi Hikmət Hacıyevin tələbi tamamilə əsaslıdır. Ermənistan anlamalıdır ki, bunların verdiyi effekt çəkilən xərcdən qat-qat azdır. Yəni ziyanlıdır. Qarşı tərəf nəzərə almalıdır ki, Aİ-nin kəşfiyyat fəaliyyəti Azərbaycanda qıcıq yaradır və bu da regionda gərginlik risqini artırır. Bu baxımdan Aİ missiyası Azərbaycanın tələbini yerinə yetirməli və fəaliyyətini dayandırmalıdır. Nəzərə almaq lazımdır ki, iki ölkə sülh sazişini imzalamağa yaxındır”.
Vidadi ORDAHALLI
