Paşinyan 28 il əvvəlki Lissabon sammitinə yenidən qayıtdı - məqsədi var...
Ramil Hüseynov: “Onun bunda başlıca məqsədi özünə haqq qazandırmaqdır”
“Bir daha demək istəyirəm ki, Qarabağ nümayəndələrinin çatdırmaq istədikləri formada ermənilərin Qarabağa geri qayıtmaq təsəvvürlərinin real olduğunu düşünmürəm. Bu təsəvvürü formalaşdıran adamlar zamanında eyni məntiqlə Qarabağın (Qondarma DQR-red.) buraxılması haqqında əmr verib, dərhal oranı tərk etmişdilər.
Bunu Ermənistan baş naziri Nikol Paşinyan deyib.
“2023-cü ilin sentyabrında sosial şəbəkədə müxalifət məni ittiham edirdi ki, Qarabağ ermənilərinin oranı tərk etməsinə imkan vermirəm. Hətta indi – bir il keçdikdən sonra belə məni Qarabağ ermənilərinin Qarabağa qayıtmasına imkan verməməkdə günahlandırırlar. Təqdim edilən bu mahiyyət, məncə, Ermənistanın dövlət maraqlarına ziddir. Biz bunu birbaşa deməliyik. Mən parlamentin tribunasından deyirdim ki, 1996-cı il Lissabon sammitindən sonra Qarabağ məsələsi Dağlıq Qarabağın məsələsi yox, Ermənistanın məsələsi oldu. Bu, Ermənistanın dövlətçiliyinin sıfırlandırılması məsələsi oldu. Zamanla mən buna daha çox əmin oluram. Bu problemi indi bəzilərinin dediyi formada təqdim etmək cəhdləri Ermənistanın maraqlarına ziddir” – deyə o bildirib.
Maraqlıdır, Paşinyan Lissabon sammitini gündəmə gətirməklə nə demək istəyir? Bununla o nəyi nəzərdə tutur?
“Qarabağ erməniləri o şərtlə geri qayıda bilər ki, Qərbi Azərbaycandan olan soydaşlarımız geri qayıtsın”
Sözügedən məsələyə aydınlıq gətirən “Yeni Xətt” Siyasi Tədqiqatlar Mərkəzinin rəhbəri Ramil Hüseynov “Bakı-Xəbər”ə açıqlamasında bunu bir sıra amillərlə əlaqələndirdi: “Paşinyan 44 günlük Vətən müharibəsindən sonra bir neçə dəfə Lissabon sammitini gündəmə gətirib. Onun bunda başlıca məqsədi özünə haqq qazandırmaqdır. Çünki revanşist müxalifət onu Qarabağı Azərbaycana “təhvil” verməkdə günahlandırır. Ancaq bu ittihamın reallıqla heç bir əlaqəsi yoxdur. Birincisi, Azərbaycan əsgəri öz canı-qanı bahasına torpaqları azad edib. İkincisi, Paşinyanın belə bir fikri olsaydı 2019-cu ilin avqustinda Xankəndiyə səfəri zamanı “Qarabağ Ermənistndır” deməzdi. Lissabon sammitinə gəldikdə isə, o zaman Ermənistanın dirəniş göstərməsinə rəğmən, sammitdə iştirak edən dövlətlər Qarabağı Azərbaycanın tərkib hissəsi kimi tanıdılar. Qarabağa özünüidarəetmə statusunun verilməsi yalnız Azərbaycanın tərkibində mümkün ola bilərdi. Zatən Azərbaycan o zaman Qarabağa ən yüksək muxtariyyət statusu verməyə hazır idi. Ancaq ermənilər separatçı mövqedən çıxış edərək bununla razılaşmadılar. Nəticədə Azərbaycan illər sonra beynəlxalq hüquqa dayanaraq ərazi bütövlüyünü bərpa etdi. Maksimalist mövqedən çıxış edən ermənilər hər şeyi itirdilər. İndi isə Qarabağa hansısa statusun verilməsindən söhbət belə gedə bilməz. Qarabağ erməniləri o şərtlə geri qayıda bilər ki, Qərbi Azərbaycandan olan soydaşlarımız geri qayıtsın. Paşinyanın reytinqi kəskin aşağı düşdüyü üçün Lissabon sammitini xatırladır ki, onluq bir şey olmayıb. Əsasən buna görə Nikol ara-sıra bu məsələyə qayıdır. Həm də yaxşı bilir ki, ermənilərin Qarabağa dönməsi mümkünsüzdür”.
Vidadi ORDAHALLI
