Qarabağ erməniləri Ermənistandan da qaçır - Paşinyan izahı yanlış verdi...
Şakir Ağayev: “Paşinyan Azərbaycana şər atmaqdansa, onların köçüb getməsinin səbəblərini Ermənistanın daxilində və özünün apardığı siyasətdə axtarmalıdır”
Ermənistanın Baş naziri Nikol Paşinyan növbəti bir yalanla gündəmi məşğul etməyə çalışır. O, könüllü şəkildə Qarabağdan çıxıb Ermənistana köçən ermənilərin bu ölkəni də tərk etməsinin səbəblərinə absurd don geydirməyə cəhd edir. Eyni zamanda Ermənistanın Baş naziri onları xaricə getməməyə, mühacirət etməməyə, Ermənistan vətəndaşlığı almaq üçün dövlətə müraciət etməyə çağırıb.
Paşinyan deyib ki, xaricə köçüb getmək istəyən ermənilərin böyük bir hissəsi sülh olmadığı üçün övladlarının orduda xidmət etməsini istəməyən insanlardır.
Paşinyan iddia edir ki, Qarabağdan Ermənistana getmiş ermənilərin Ermənistandan köçüb başqa yerlərə, xarici ölkələrə getmək istəməsinin səbəbi, guya onların müharibədən qorxmasıdır. O deyib ki, o ermənilər sülh olmadığına görə müharibədən qorxduqlarına üçün Ermənistanı kütləvi şəkildə tərk edirlər.
Əslində isə onların Ermənistandan köçüb getməyinin səbəbi başqadır. Məlum olduğu kimi, Ermənistanda yaşayışın acınacaqlı, təminatın pis olması, eyni zamanda onlara etimadsız və etinasız yanaşmanın mövcud olması üzündən bu ermənilər çıxıb getmək istəyirlər. Həmçinin bu ölkədə iqtisadi çətinlik, onların evlə təmin olunmamaları kimi faktlar da var ki, bu da onların köçüb getmələrinin əsl səbəbidir. Bəzi ermənilər orada evlə təmin olunsa da, böyük əksəriyyət çox acınacaqlı durumda yaşayır, ordan-burdan aldıqları ianələr hesabına dolanırlar. Bu da gerçəklikdir ki, Qarabağdan Ermənistana, ordan da xarici ölkələrə köçüb gedən ermənilərin çoxu vaxtilə torpaqlarımız işğalda olanda ayrı-ayrı xarici ölkələrdən aldadılaraq bizim ərazilərdə məskunlaşdırılmışdlar, indi də gəldikləri yerlərə qayıtmaq istəyirlər.
Amma Paşinyan onların Ermənistandan qaçmasının əsl səbəblərini gizlədir və bunu gətirib müharibəyə bağlayır ki, müharibə vəziyyətidir, sülh müqaviləsi yoxdur və guya Azərbaycan müharibəyə hazırlaşır, ermənilər də müharibədən qorxaraq Ermənistandan qaçırlar. Paşinyan ortaya belə bir absurd iddia atıb.
“Qarabağdan köçüb getmiş ermənilərin Ermənistanı kütləvi şəkildə tərk etməsinin real səbəblərini Paşinyan gizlədir”
Məsələyə şərh verən “Novoye vremya” qəzetinin baş redaktoru Şakir Ağayev “Bakı-Xəbər”ə “Paşinyan, ümumiyyətlə, bir-birinə zidd bəyanatlarla çıxış edir. O, burdan deyir, Qarabağdan köçən ermənilərin “özləri razılaşıblar”, ordan “Azərbaycanla sülh müqaviləsi bağlamaq istəyirəm”, başqa tərəfdən “müharibə olacaq” deyir. Birincisi, Azərbaycan heç bir müharibəyə hazırlaşmır və sülh müqaviləsi bağlamağa da hazırdır. Faktdır ki, sülh müqaviləsinin imzalanmısını saxlayan, ləngidən, şərtləri qəbul etməyən Paşinyandır. Paşinyan bununla dünya ictimaiyyətinə Azərbaycanı bir aqressiv ölkə kimi təqdim etmək niyyətindədir. O, dünyanı inandırmağa çalışır ki, Ermənistanı daha çox silahlandırmalıdır, guya Azərbaycan tərəfdən təhlükə var. Bununla da Ermənistanın militarist siyasətinə haqq qazandırmaq və Qarabağdan köçüb getmiş ermənilərdən də bir oyuncaq vasitə kimi istifadə etmək istəyir. Qarabağdan köçüb getmiş ermənilərin Ermənistanı kütləvi şəkildə tərk etməsinin real səbəblərini Paşinyan gizlədir. Halbuki, bunun əsl səbəbi orada onların heç bir statusunun olunmamasıdır, işlə təmin edilməməsidir, yaşayış təminatlarının aşağı olmasıdır. Belə deyək, Ermənistanda günü-gündən sosial-iqtisadi vəziyyətin ağırlaşması, onların çətin duruma düşməsi erməniləri vadar edir ki, gedib Rusiyada, Avropa ölkələrində yaşasınlar. Həm də onlar “qaçqın” statusu almaq istəyirlər ki, işləmədən də təminatları olsun. Bu əsl erməni xislətidir”-deyə bildirdi.
Ş.Ağayevin qeyd etdiyinə görə, onların Ermənistanı tərk etməsinə Paşinyan bu cür absurd don geydirməklə dünyanı aldatmaq isəyir ki, guya Azərbaycan müharibəyə hazırlaşır və onlar da qorxduqları üçün gedirlər. Ş.Ağayev hesab edir ki, əslində Paşinyan bununla ermənilərə yaşayış təminatı qazanmaq istəyir. “Mənə elə gəlir ki, Paşinyan Azərbaycana şər atmaqdansa onların köçüb getməsinin səbəblərini Ermənistanın daxilində və özünün apardığı siyasətdə axtarmalıdır. Bir daha deyirəm ki, Azərbaycan heç bir müharibəyə hazırlaşmır, Azərbaycan nüfuzlu beynəlxalq tədbirlərə hazırlaşır. Qarşıdan COP29 gəlir.
Azərbaycan dövləti dəfələrlə bəyan edib ki, heç bir dövlətə qarşı ərazi iddiası yoxdur, o cümlədən də Ermənistana qarşı.
Ermənistandan fərqli olaraq, Azərbaycanın konstitusiyasında nə Ermənistana, nə də başqa dövlətlərə ərazi iddiaları var. Ona görə də, Paşinyan özünün sülh müqaviləsi bağlamamasını ört-basdır edir və bunu Azərbaycanın üzərinə qoymağa çalışır. Sübüt etmək istəyir ki, guya Azərbaycan sülh müqaviləsini Ermənistana qarşı ərazi iddiasında çıxış etmək üçün bağlamaq istəmir. Bu da tamamilə absurddur. Paşinyan iddia edir ki, guya Azərbaycan Ermənistana 200 kvadrat kilometr ərazi qaytarmalıdır. Təbii ki, bu da absurddur. Azərbaycanda heç bir Ermənistan torpağı yoxdur. Ermənistan insanların yaxşı yaşamağını istəyirsə, zəhmət çəkib kommunikasiyaları açmalıdır, istər Azərbaycan, istərsə də Türkiyə ilə ticari əlaqələri genişləndirməlidir. Paşinyan bunu da etmir. Bununla da Ermənistanın vəziyyətini daha da çətinləşdirir. Yəni bütün problemlər bunun başındadır” - deyə Ş.Ağayev qeyd etdi.
İradə SARIYEVA
