Taksi şirkətləri sürücüdən alınan haqqı 17 faizdən 25-ə qaldırdılar...
Aslan Əsədov: “Taksi şirkətlərinin faizi qaldırması gediş haqqının artmasına səbəb ola bilər”
Taksi operator şirkətlərinin yaradılması vətəndaşların və sürücülərin işinin asanlaşdırılmasına hesablansa da, son illərdəki fəaliyyətləri heç də ürəkaçan deyil. Bir çox sürücülər və sərnişinlər davamlı olaraq bu şirkətlərin işindən narazı qalırlar.
Məlumdur ki, Azərbaycanda bir aydan çoxdur taksilər yeni qaydalarla fəaliyyət göstərir. Rəqəmsal inkişaf və nəqliyyat nazirinin müavini Rəhman Hümmətov mətbuata açıqlamasında taksi xidməti ilə bağlı tənzimləmələrdən sonra xidmət keyfiyyətinin yüksəlməsinin müşahidə edildiyini deyib. Məlumata görə, taksi xidməti göstərən şirkətlər sürücülərdən aldıqları faizlərin miqdarını qaldırıblar. Belə ki, əvvəllər sürücülər qazanclarının 17 faizini şirkətə ödəyirdisə, artıq 25 faizini ödəməli olur. Belə olduqda isə, təbii ki, onların da qazancı azalır.
Taksi şirkətləri niyə faizi qaldırdılar? Bu hal gediş haqqına təsir edəcəkmi?
“Bu hal, daha çox, nəqliyyat vasitəsini idarə edən sürücünün yükünü artıra bilər”
Nəqliyyat eksperti Aslan Əsədov “Bakı-Xəbər”ə açıqlamasında bildirdi ki, şirkətlər faizləri qaldırmağa məcbur qalıblar: "Əvvəl şirkətlərin əlavə xərcləri olmurdu deyə, çox faiz tələb etmirdilər. Amma indi digər rüsumlar tətbiq olunur. İcazələrin alınması, texniki məsələlər, rüsumların ödənməsi xərclərin çoxalmasına gətirib çıxardı. Yeni qaydalar isə əlavə xərc deməkdir. Ola bilsin ki, o xərcləri qarşılamaq üçün taksi şirkətləri qiymət artımına gedib. Bu səbəbdən də şirkətlər faiz dərəcəsini artırmağa məcburdur. Ümumiyyətlə, taksi şirkətləri öz xərclərini gəlir üzərində qurduğu üçün sürücülərdən tutulan faizləri 17-dən 25-ə qaldırdılar”.
Ekspert hesab edir ki, taksi şirkətlərinin faizi qaldırması gediş haqqının artmasına səbəb ola bilər. Qiymət artımı zamanla hiss olunacaq: “Bu hal daha çox nəqliyyat vasitəsini idarə edən sürücünün yükünü artıra bilər. Bu qərar insanların sosial vəziyyətinin pisləşməsinə gətirib çıxarır. Bu həm taksi sürücülərinə, həm də taksi xidmətlərindən istifadə edən istehlakçılara aiddir”.
Günel CƏLİLOVA
