Bakıdan Holland müstəmləkəçiliyinə zərbə kimi gediş - Saziş imzalandı...
Azər Həsrət: “Bonayre adasındakı xalqlar öz səslərini dünyaya çatdırmaq üçün Bakı Təşəbbüs Qrupunun imkanlarından istifadə etmək istəyir”
Məlum olduğu kimi, Niderlandın müstəmləkəçiliyi altında olan Bonayre adasının nümayəndə heyəti Bakıda səfərdədir. Bonayre adasının rəhbərliyi adanın "C24" layihəsinə əlavə edilməsi üçün BMT-yə oktyabr ayında qətnamə təqdim etməyi planlaşdırır. Nümayəndə heyətinin Azərbaycana səfərdə məqsədi kolonializmdən əziyyət çəkən ölkə və xalqların azadlıq mübarizəsini dəstəkləyən BTQ ilə əməkdaşlıq etməkdir.
Qeyd edək ki, avqustun 23-də Bakıda Niderlandın müstəmləkəçiliyi altında olan Bonayre adasının vətəndaş cəmiyyəti təşkilatları ilə Bakı Təşəbbüs Qrupu (BTQ) arasında əməkdaşlıq haqqında saziş imzalanıb.
“Bakı Təşəbbüs Qrupu ilə Bonayre adasının vətəndaş cəmiyyəti təşkilatları ilə sazişin imzalanması onlar üçün ümid işiğıdır”
Bu sazişin əhəmiyyəti haqqında fikir bildirən siyasi şərhçi Azər Həsrət baki-xeber.com-a şərhində bildirdi ki, uzun illərdir, inkişaf etmiş Qərb dövlətlərinin müstəmləkəsi olan xalqların hüquqları haqqında heç kim danışmaq istəmirdi: “Onlar bu və ya digər formada səslərini dünyaya çatdırmaq istələr də, Qərbin nəzarətində olan aparıcı media orqanları bu xalqların səsinə səs vermirdi və beləliklə onlar illərdir ki, müstəmləkə şəraitində yaşamağa məcbur olurdu. Bakı Təşəbbüs Qrupu yarandıqdan sonra Azərbaycan bu kimi məsələlərlə məşğul olmağa başladı. Bu qrupun yaranması müstəmləkə altında olan xalqlar üçün nəfəslik oldu. Onlar artıq hiss etməyə başladılar ki, hansısa bir ölkə, qurum bu xalqların səsini, problemini qlobal səviyyədə çatdırmağa hazırdır. Məlumdur ki, Azərbaycan Fransanın müstəmləkələri ilə bağlı davamlı tədbirlər keçirir, dünyaya səs salır. Təbii ki, Niderlandın müstəmləkəçiliyi altında olan Bonayre adasındakı xalqlar da bundan xəbərdar olub, öz səslərini dünyaya çatdırmaq üçün Bakı Təşəbbüs Qrupunun imkanlarından istifadə etmək istəyir”.
Ekspert hesab edir ki, Bakı Təşəbbüs Qrupu ilə Bonayre adasının vətəndaş cəmiyyəti təşkilatları ilə sazişin imzalanması onlar üçün ümid işiğıdır. Bu saziş sayəsində onlar müstəmləkəçilikdən qurtula biləcəklərinə inanmağa başlayıb: “Xatırladım ki, bu xalqlar əvvəlki illərdə də öz səslərini eşitdirmək istəyiblər, mübarizə aparıblar. Ancaq aparıcı media qurumları Qərb dövlətlərinin nəzarətində olduğu üçün onların səsinə səs verən olmayıb. Bakı Təşəbbüs Qrupu həmin xalqların səsini dünyaya çatdırmağı bacarır və bu işi mütəşəkkil qaydada təşkil edir. Bu səbəbdən də onlar Azərbaycanla saziş imzalayıb. Azərbaycan müstəmləkə zülmündən əziyyət çəkənlərə yardım əli uzadır və onlara lazım olan köməyi göstərir”.
Günel CƏLİLOVA
