Ukrayna cəmiyyətində Azərbaycana qarşı anlaşılmaz kin-küdurət başlayıb...
Elşən Həsənov: “Rəsmi Kiyev dərhal və təxirəsalınmaz tədbirlər görərək, hazırkı rəzilliyi dayandırmalıdır”
Ukraynadakı sosial media fəalları, daha doğrusu hakimiyyətin uzantıları xalqı SOCAR-ı boykot etməyə çağırır. Səbəb isə Azərbaycan Neft Şirkətinin Rusiyanın "Gazprom" şirkəti ilə əməkdaşlığı genişləndirməsidir.
Rusiya-Ukrayna müharibəsi başlandığı andan etibarən "SOCAR" Ukraynadakı bütün yanacaqdoldurma məntəqələrində təcili yardım və Fövqəladə Xidmət maşınlarını pulsuz yanacaqla təmin etməyi öhdəsinə götürdü.
Bu barədə ilk məlumatı elə Ukrayna prezidenti Vladimir Zelenski vermişdi.
Bu addım Azərbaycanın humanizm prinsiplərini rəhbər tutduğunu göstərirdi. Bu prinsiplərdən yola çıxaraq Azərbaycan Ukraynaya dərmanlar və tibbi avadanlıqlar göndərdi, özü də dəfələrlə.
Baxmayaraq ki, Vətən müharibəsi zamanı Ukraynadan heç bir dəstək görməmişdik. Belə olan halda Ukraynanın Azərbaycan Dövlət Neft Şirkətini qınamağa haqqı çatırmı və belə kampaniya ilə nəyə nail olmaq istəyirlər? Bir də Ukrayna cəmiyyətini qıcıqlandıran Azərbaycandakı hansı addımlar ola bilər və bunun Putinin Bakı səfəri ilə bir əlaqəsi varmı?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, hər şey Rusiya Prezidenti Vladimir Putinin ölkəmizə səfərindən sonra başladı: ”Söhbət Ukrayna mediası və sosial şəbəkə seqmentindəki anti-Azərbaycan ritorikasından gedir. İstər-istəməz düşünürsən: Azərbaycan Ukraynaya münasibətdə hansı yanlış addım atıb ki, tənələrlə üzləşir? “Qazprom”la anlaşmaya görə Azərbaycanın SOCAR şirkətinə qarşı kampaniyaya başlamaq absurddur. Ukrayna, Rusiya ilə müharibəyə baxmayaraq, öz ərazisindən Rusiya qazının tranzitini dayandırmadı və bunun üçün pul aldı. Müharibələr tarixində belə hal olmayıb. Bu gün hətta Kursk vilayətindəki Sudja qazölçmə məntəqəsi ukraynalıların nəzarətinə keçdikdən sonra da qaz tranziti davam edir. Məhz Ukrayna və Aİ Azərbaycandan qazın Ukraynadan keçməklə Avropaya nəqli üçün “Qazprom”la əməkdaşlıq etməsini istəyib. Azərbaycanın buna ehtiyacı yoxdur.
Azərbaycan Avropaya qaz nəqlini artırıb. Ölkəmizlə Avropa İttifaqının ayrı-ayrı qurumları arasında mövcud istiqamətdə razılaşmalar var. Yəni Avropa qışda Azərbaycan qazı hesabına donmayacaq ki, Ukraynanın Rusiyaya qarşı mübarizəsinə dəstək versin.
Yəni Azərbaycan özünün maraqları çərçivəsində, üçüncü tərəfə ziyan vurmadan hər bir dövlətlə normal münasibətlərini saxlayır. Tutaq ki, bunu Ukrayna mediası və sosial şəbəkə seqmenti anlamır. Bəs ölkənin hakimiyyəti necə? Həmin SOCAR müharibə zamanı Ukraynada humanitar fəaliyyət gerçəkləşdirib? Digər tərəfdən, Azərbaycandan ölkəyə müxtəlif təyinatlı yardımlar da göstərilib. Bunu minnət kimi demirik. Ölkəmiz bəşəri dəyərlərə sədaqət xəttinə söykənib. Amma bizim heç kəsə borcumuz yoxdur. O cümlədən, Ukraynaya da. Elədiklərimizi də borc kontekstində görmürük.
Azərbaycan hakimiyyəti də, elə bütövlükdə cəmiyyəti də Ukrayna ilə dostluğa sadiqdir. Yaxşı olar ki, ölkənin mütərəqqi dairələri bunu əsas götürsünlər. Əsas götürsünlər və Azərbaycana qarşı bu iyrənc kampaniyanı sakit izləməsinlər. Ən əsası, rəsmi Kiyev dərhal və təxirəsalınmaz tədbirlər görərək, hazırkı rəzilliyi dayandırmalıdır”.
Məhəmmədəli QƏRİBLİ
