99-cu dairədə nə baş verir - alternativlərin bir çoxu Fatma Yıldırıma qarşı...
![Image](/uploads/posts/2024-08/fatma-yildirim.webp)
99 saylı Bərdə Seçki Dairəsindən YAP-ın deputatlığa namizədi Fatma Yıldırımın 4 partiyadan rəqibləri var. Ancaq buna baxmayaraq, o çox arxayın davranış nümayiş etdirir.
VI çağırış Milli Məclisin deputatı olmuş Fatma Yıldırımın bu seçkidə rəqibləri KXCP üzvü Şahin Əhmədov, VHP üzvü Murad Hüseynov, AXP üzvü Mübariz İsmayılov və Ümid Partiyası üzvü Rəfail Tağızadədir. Alternativlər arasında, həmçinin, iki bitərəf namizəd var – Güllü Abbaszadə və Cəlal Quliyev.
Məlumata görə, Fatma Yıldırım nə seçicilərlə görüşür, nə sosial şəbəkədə təbliğatını aparır.
Dairədəki fəziyyət və xüsusilə də Fatma Yıldırımın belə arxayınçılğının səbəbi ilə bağlı digər namizədlər nə düşünür?
Qeyd edək ki, bu məsələyə aydınlıq gətirmək üçün Fatma Yıldırımın özü ilə əlaqə saxlamaq istədik, ancaq gün ərzində ona etdiyimiz zənglərə cavab verən tapılmadı. KİV-də və İnternet resurslarında Fatma Yıldırımın seçki qərargahı barədə məlumata rast gəlmədik ki, heç olmasa ora ilə əlaqə saxlayıb, suallarımıza cavab alaq.
Rəfail Tağızadə: “Ab-hava onu göstərir ki, insanlarda “keçən dəfə seçilibsə, bu dəfə də seçilə biləcək” təsəvvürü yaradılıb”
Ümid Partiyasının namizədi olan, partiyanın Məşvərət Şurasının sədri Rəfail Tağızadə “Bakı-Xəbər”ə açıqlamasında bildirdi ki, Fatma Yıldırımın davranışları və seçki taktikasında bir arxayınçılıq nəzərə çarpır: “Görümən budur ki, Fatma xanım daha çox hakimiyyət resurslarına arxalanır. Yerli hskimiyyət nümayəndələri də ona dəstək verirlər. Ab-hava onu göstərir ki, insanlarda “keçən dəfə seçilibsə, bu dəfə də seçilə biləcək” təsəvvürü yaradılıb. Bəli, biz də onun çox aktiv təbliğat apardığını görmürük. Xüsusilə də mediada onun təbliğatına rast gəlmirik. Yerlərdəki görüşlərə gəldikdə isə, arabir hansısa kənddə görüşü olur, bu da formalizm üçündür. Mən daimi olaraq Bakıda yaşayıram, amma bir həftədən çoxdur ki, Bərdədə təbliğatımla məşğulam. Bu dairədən digər siyasi partiyaıarın nümayəndələrinin də namizədlikləri qeydə alınıb. Əslində, qızğın seçki marafonu müşahidə olunmalıdır”.
Şahin Əhmədov: “Fatma Yıldırım özünü deputat yerini bronlamış kimi aparır”
Sözügedən dairənin digər namizədi, KXCP təmsilçisi Şahin Əhmədov da Fatma Yıldırımın apardığı qəribə və arxayın seçki taktikasından danışdı: “Nədirsə, çox arxayındır. Hamıya deyir ki, qalib o olacaq. Arada bir yanındakı 3-5 nəfərlə gedib hansısa kənddə kiçik görüş keçirir. Bizim maddi vəziyyətimiz çətin olduğu üçün çox görüş keçirə bilmirik. Hansı görüşə gedirsə, rayonun imkanlı adamları onu müşayiət edir. Yəqin ki, yerli hakimiyyət bunu təşkil edir. Onun keçirdiyi bir görüşdən video var. Arxasında kəndin bələdiyyə sədri durub. Mənə elə gəlir ki, Fatma Yıldırım özünü deputat yerini bronlamış kimi aparır”.
Məhəmmədəli QƏRİBLİ