Lavrov hələ Paşinyana belə hücum etməmişdi...
İbrahim Rüstəmli: “Rusiyada belə bir əminlik var ki, dəhlizə FTX-nin nəzarət etməsi məsələsində İrəvan güzəştə getməz”
“Paşinyan Qarabağ üzrə üçtərəfli razılaşmaları sabotaj edir”. Bunu Rusiya xarici işlər naziri Sergey Lavrov Rusiyanın “Birinci Kanalı”na açıqlamasında deyib.
“Təəssüf ki, Ermənistanın Sünik bölgəsindən (Zəngəzur) keçən kommunikasiyalara gəlincə, altında baş nazir Paşinyanın imzası duran sazişi sabotaj edən məhz Ermənistan rəhbərliyidir. Belə bir mövqenin məntiqinin nə olduğunu anlamaq çox çətindir. Amma mən əminəm ki, üçtərəfli görüşlər çərçivəsində, üçtərəfli sənədlərdə qoyulan təməl tam şəkildə aktual olaraq qalır. Moskva Ermənistanla Azərbaycan arasında sülh müqaviləsinin tezliklə bağlanmasının və kommunikasiyaların açılmasının tərəfdarıdır. Biz sülh müqaviləsinin tezliklə bağlanmasının tərəfdarıyıq”, – Lavrov deyib.
“Ona görə də Lavrov çox sərt tonda Paşinyanı belə ittiham edir”
Sözügedən məsələni “Bakı-Xəbər”ə şərh edən hərbi ekspert İbrahim Rüstəmli hesab edir ki, Lavrovun bu dərəcədə Paşinyana qarşı sərt mövqe sərgiləməsi Zəngəzurdan keçən yola nəzarət məsələsində İrəvanın sərgilədiyi mövqe ilə bağlıdır: “Məsələ ondadır ki, 10 noyabr 2020-ci ildə əldə edilən üçtərəfli razılaşmada bununla bağlı konkret maddə var. Razılaşmanın 9-cu bəndində deyilir ki, Azərbaycanı Naxçıvanla birləşdirən yola Rusiya Federal Təhlükəsizlik Xidməti nəzarət edəcək. Ermənistan bir müddət prosesi uzadaraq bundan yayındı. Daha sonra Qərbin dəstəyi ilə Ermənistan açıq şəkildə buna qarşı çıxır. Bildirir ki, ərazisindən keçən yola özü nəzarət etmək istəyir. Bu da Rusiyanı məyus edir. Ermənistanın Qərbə yaxınlaşması fonunda Moskvada belə bir qənaət var ki, İrəvan bu məsələdə güzəştə getməyəcək. Çünki praktiki olaraq Paşinyan hakimiyyəti Rusiya ilə bütün körpüləri mərhələli şəkildə yandırır. FTX-nin həmin yola nəzarət etməsi həm də o deməkdir ki, Rusiya Orta Dəhlizə nəzarət edəcək. Çünki Zəngəzur dəhlizi bu dəhlizin əsas halqası olacaq. Qərb də maraqlı deyil ki, Çindən, Orta Asiyadan gələn nəqliyyat marşrutlarına Rusiya hansısa formada nəzarət etsin. Bu baxımdan Rusiyada belə bir əminlik var ki, dəhlizə FTX-nin nəzarət etməsi məsələsində İrəvan güzəştə getməz. Ona görə də Lavrov çox sərt tonda Paşinyanı belə ittiham edir. Bu, həm də Ermənistana bir təzyiqdir. Çünki Azərbaycan bu məsələyə qarşı deyil. Bizim üçün əsas olan odur ki, Naxçıvana maneəsiz gediş-gəliş təmin edilsin. Əsas odur ki, Çindən, Orta Asiyadan gələn yüklər Zəngəzur dəhlizi vasitəsilə dünya bazarına çıxarılsın”.
Vidadi ORDAHALLI
