ABŞ ATƏT-in Minsk Qrupuna münasibətini dəyişdi - Ermənistan bunu da uduzur...
![Image](/uploads/posts/2024-08/1724163840_departament-abs.webp)
Məhəmməd Əsədullazadə: “Birləşmiş Ştatların belə mövqe sərgiləməsi praqmatik siyasətə söykənir”
Birləşmiş Ştatlar Azərbaycan və Ermənistanla hər iki ölkənin məqbul hesab edəcəyi istənilən formatda əməkdaşlıq etməyə hazırdır. Bunu ABŞ Dövlət Departamenti ATƏT-in Minsk Qrupunun gələcəyi və sülh prosesində ABŞ-ın rolu ilə bağlı sualları cavablandırarkən bildirib:
“ABŞ hökuməti Ermənistan və Azərbaycanın davamlı və layiqli sülh sazişi əldə etmək səylərini dəstəkləyir. Biz hər iki tərəflə tərəflərin razılığa gələ biləcəyi və irəliləyiş əldə edə biləcəyi istənilən formatda işləməyə hazırıq”.
Onu da qeyd edək ki, belə bir mövqe Bakının ATƏT-in Minsk Qrupunda iştirakdan imtina etməsi fonunda səslənib. Belə ki, Bakı biıdirib ki, uzun müddətdir davam edən Qarabağ münaqişəsi, nəhayət həll olundu, bununla əlaqədar qrupun vasitəçilik rolü öz aktuallığını itirdi. O baxımdan belə məlum olur ki, artıq Dövlət Departamenti ATƏT-in Minsk Qrupu çərçivəsində danışıqlar prosesinin saxlanmasını prinsipial hesab etmir. Yəni artıq Minsk Qrupunun saxlanılması məsələsində Ermənistan ABŞ-ın dəstəyini itirir.
“Bu o deməkdir ki, hansısa dövlətin iştirakı olmadan Bakı-İrəvan danışıqları davam etdirilməlidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Birləşmiş Ştatların belə mövqe sərgiləməsi praqmatik siyasətə söykənir: “O cümlədən, Azərbaycanın maraqları ilə üst-üstə düşür. Azərbaycan Minsk Qrupunun buraxılmasını istəyir və bu çərçivədə hansısa danışıqların aparılmasını ümumiyyətlə mümkünsüz hesab edir. Çünki artıq Azərbaycanla Ermənistan arasında Qarabağ münaqişəsi deyilən bir şey yoxdur. Məsələ Azərbaycanın öz suverenliyini bərpa etməsi ilə başa çatıb. ABŞ da bunu dərk edir və reallığa uyğun olaraq belə mövqe sərgiləyir. Məhz Vaşinqtonun Azərbaycanla Ermənistan arasında ikitərəfli danışıqlara üstünlük verməsi bunun göstəricisidir. Vaşinqton maraqlıdır ki, Azərbaycanla Ermənistan öz aralarında olan problemləri ikitərəfli qaydada həll etsinlər. Çünki belə formada keçirilən danışıqlar daha effektivdir, nəinki həmsədrlərin vasitəçiliyi ilə keçirilən hansısa danışıqlar. Otuz ilə yaxın Minsk Qrupunun həmsədrliyi ilə keçirilən danışıqların necə səmərəsiz olduğunu biz yaxşı bilirik. Bu, həm də o deməkdir ki, ABŞ Ermənistanı Azərbaycanla sülh prosesinə təşviq edir. Ermənistan artıq Minsk Qrupunun buraxılması istiqamətində Azərbaycan tərəfinin tələbini qəbul edir. Bu tələblə ilk olaraq Azərbaycan çıxış edib. Ona görə də bütün tərəflər Minsk Qrupunun buraxılmasını rəsmən qəbul etməli və buna imza atmalıdır. Bununla bağlı birgə bəyanat verilməlidir. Azərbaycanın şərti bundan ibarətdir. Məhz Vaşinqtonun belə mövqe sərgiəməsi o anlama gəlir ki, Azərbaycanın şərti qəbul olunur. Vaşinqtonun belə mövqe sərgiləməsi Azərbaycanın maraqlarına cavab verir. Bu o deməkdir ki, hansısa dövlətin iştirakı olmadan Bakı-İrəvan danışıqları davam etdirilməlidir. Bizə də bunun Vaşinqton tərəfindən dəstəklənməsi lazım idi”.
Vidadi ORDAHALLI