Dəmiryolu var, qatarlar işləmir - Binə və Maştağaya bu pisliyi kim edir...
İlqar Hüseynli: “Mövcud olan sərnişin və nəqliyyat sıxlığı bir müddət sonra daha kəskin formada özünü göstərəcək”
2007-ci ilə qədər Xəzər rayon Binə qəsəbəsinə, Sabunçu raron Maştağa qəsəbəsinə və ətraf yaşayış massivlərinə elektrik qatarları işləyirdi. O vaxtdan həmin qatarların sözügedən qəsəbələrə işləməsi dayandırılıb. Hətta Maştağada elektrik qatarları üçün nəzərdə tutulan dəmir yolunun bir hissəsi sökülüb. Halbuki, 28 May metrosunda qatara oturub rahat və tıxacsız o qəsəbələrə getmək olurdu.
O vaxtdan həmin qəsabə sakinləri, xüsusən də dərslər başlayandan sonra it zülmü ilə şəhərə gedib-gəlir. Halbuki, həmin marşrut olsaydı, bu həm sərnişin sıxlığının tənzimlənməsinə müsbət təsir göstərərdi, həm də qismən tıxacların azalmasına gətirib çıxarardı.
Maraqlıdır, hazır dəmir yolu ola-ola niyə bu qəsəbələrə qatarların hərəkəti bərpa edilmir? Niyə Binə qəsəbəsi sakinləri şəhərə gəlməkdən ötrü 3 marşrut dəyişməlidir?
Məsələ ilə bağlı Azərbaycan Dəmir Yolları Qapalı Səhmdar Cəmiyyətinin mövqeyini öyrənməyə çalışsaq da, bu mümkün olmadı.
“O baxımdan Binə, Maştağa və digər qəsəbələrə elektrik qatarlarının işləməsi tezliklə bərpa edilməlidir”
Sözügedən məsələ ilə bağlı “Bakı-Xəbər”ə açıqlama verən ekspert İlqar Hüseynli bununla bağlı bir sıra məqamlara toxundu: “Ümumiyyətlə, bu istiqamətdə müəyyən işlər görülüb. Məsələn, Bakıdan Sumqayıta və digər istiqamətlərə elektirik qatarlarının işləməsi bərpa edilib, yeni xətlər çəkilib. Bir sözlə, bu istiqamətdə xeyli müasirləşdirmə işləri görülüb. Ancaq təəssüflər olsun ki, Binə, Maştağa, Sabunçu istiqamətində elektrik qatarları fəaliyyət göstərmir. Baxmayaraq ki, həmin istiqamətlərdən şəhərə böyük axın var. Həmin istiqamətlərdə qatarların işləməsi çox vacib idi. Çünki şəhərə nisbətən uzaq məsafədə yerləşən qəsəbələr var və üstəlik, orada yaşayanların sayı son illər kəskin şəkildə artıb. Əslində şəhər marşrutunun, şəhərdaxili nəqliyyat xidmətinin yaxşılaşdırılması, eyni zamanda vətəndaşların rahatlığının təmin edilməsi baxımından elektrik qatarlarının müxtəlif istiqamətlərdə işləməsi çox vacib və əhəmiyyətli məsələdir. Onsuz da Bakının sərnişin və nəqliyyat axınında ciddi sıxlıq var. Paytaxta axın böyük olduğu üçün getdikcə bu problem özünü daha çox göstərir. Həm metro stansiyalarının sayının artırılması, həm şəhərətrafı elektrik qatarlarının şaxələndirilməsi bu baxımdan səmərəli effekt verə bilər. O baxımdan hesab edirəm ki, Binə, Maştağa və digər qəsəbələrə elektrik qatarlarının işləməsi tezliklə bərpa edilməlidir. Xətlər, dayanacaqlar yenilənməlidir. Nəzərə almaq lazımdır ki, paytaxt əhalisi artmaqdadır. Hazırda mövcud olan sərnişin və nəqliyyat sıxlığı bir müddət sonra daha da kəskin formada özünü göstərəcək. Ona görə də buna hazır olmaq lazımdır. Bu da ictimai nəqliyyatın şaxələndirilməsindən keçir. Bu elə bir sahədir ki, mütləq bura dövlət qayğısı olmalıdır. Dövlətin imkanı var ki, bununla bağlı xərcləri öz üzərinə götürsün. Ona görə də təcili olaraq bu yöndə bərpa işlərinə qərar vermək lazımdır”.
Vidadi ORDAHALLI
