18 mindən çox erməni Qərbi Zəngəzuru tərk etdi - "Zəngəzur oyunu" bitir...

İbrahim Rüstəmli: “Ermənilərin Qərbi Zəngəzuru tərk etməsinin real səbəbləri var, onlar bu torpağın onlara aid olmadığını bilirlər” 

Ermənilər Qərbi Zəngəzur bölgəsini kütləvi şəkildə tərk edir. “Qraparak” nəşri Ermənistan Statistika Komitəsinə istinadən Zəngəzur bölgəsindəki əhalinin sayının sürətlə azaldığını yazır: 

“Statistik məlumatlara görə, ötən ilin iyul ayından bu ilin iyul ayının 1-nə qədərki dövrdə Zəngəzur bölgəsinin əhalisi 18 min nəfər azalıb. Bunun 12 mini şəhər, 6 mini isə kənd əhalisidir. Təkcə Teğ kəndini min sakin tərk edib, bu kəndin əhalisinin sayı cəmi 6 mindir”.

Nəşr qeyd edir ki, ermənilər sərhəd bölgələrini sürətlə tərk edir. Ermənistan Statistika Komitəsi də təsdiqləyir ki, son bir ildə Qərbi Zəngəzurda əhalinin sayı 18 min nəfər azalıb.

Əhali ordan niyə qaçır? Bu, erməni blefi ola bilərmi? Doğrudanmı, ermənilər ordan çıxır, çıxırlarsa motiv nədən ibarətdir? 

“Dərk edirlər ki, uzun illər başqasının  evində-eşiyində oturublar və çıxıb getmək lazımdır”   

Hərbi ekspert İbrahim Rüstəmli “Bakı-Xəbər”ə bildirdi ki, Qərbi Zəngəzurda bir sıra Qərb dövlətlərinin, Fransanın və ABŞ-ın xüsusi maraqları var və onlar burada yeni oyunlar qurmağa niyyətləniblər. Fransa, ABŞ kimi Qərbin, Avropanın bir sıra hegemon dövlətləri bütün dünyaya demokratiyadan, ədalətdən, insan haqlarından dərs keçməyə iddialıdırlar, amma bu ölkələrin özləri insan haqlarını, ədalət prinsiplərini ən çox pozan dövlətlərdir. Ermənilərin Zəngəzurdan köçməsi barədə yayılan məlumata gəlincə, İ.Rüstəmli bildirdi ki, bu, reallığın mənzərəsidir. “Hazırda İrəvanda yaşayan ermənilərin də böyük əksəriyyəti etiraf edir ki, Qərbi Zəngəzur Azərbaycan torpağı olub və burda qədimlərdən azərbaycanlılar yaşayıb. 

Biz digər dəstəkçi fakt da dilə gətirə bilərik ki, İrəvan da Azərbaycan torpağı olub, 1918-ci ildə ermənilərə dövlət qurulması üçün bu ərazi onlara verilib və sair. Söhbət burada nədən gedir? Artıq ermənilər reallığı istəsələr də, istəməsələr də qəbul etməyə başlayırlar. Belə düşünürəm ki, Azərbaycan özünün güclü iqtisadiyyatı, güclü Silahlı Qüvvələri, güclü siyasi xətti ilə ermənilərə zorla da olsa başa saldı ki, reallıqla barışmalısınız, Qərbi Zəngəzuru tərk etməlisiniz. 

Bilirsiz ki, əvvəlki dövrlərdə İlham Əliyevin, Vladimir Putinin və Nikol Paşinyanın iştirakı ilə Moskvada üçtərəfli danışıqlar keçirildi. Kapituliyasiyada Qərbi Zəngəzurla bağlı məsələ var ki, bu məsələ reallaşmalıdır. Ermənilər uzun müddət Rusiyaya söykəndilər, 44 günlük Vətən savaşınmda Rusiya onlara kifayət qədər dəstək də göstərdi. Bəziləri deyir ki, Rusiya müharibə vaxtı əlini Ermənistanın üzərindən çəkdi. Xeyr, belə deyildi. Rusiya onlara lazımı qədər maddi və hərbi yardım etdi, texnika, silah-sursat baxımından köməklik göstərdi, bircə siyasi dəstək vermədi. Rusiyanın da Ermənistana siyasi dəstək verməməsinin səbəbi Paşinyanın Qərbyönümlü siyasət yürütməsi ilə bağlıdır. Paşinyanın hakimiyyətə Corc Soros Fondunun dəstəyilə gəldiyi məlumdur. Nazirlərin 80 faizindən çoxu da Soros Fondunun nümayəndələridir. İstəsə də, istəməsə də, Paşinyan Qərbə meyl etməlidir, çünki onun hakimiyyətə gəlişinin arxasında Qərb amili, Qərb pulu, Fransa və ABŞ dayanır. Ancaq indiki reallıq var. Bu reallıq Paşinyan tərəfindən də bir neçə dəfə səsləndirilib. İndi ermənilər artıq Qarabağı unudublar, çünki Qarabağın onlara heç bir aidiyyəti yoxdur. Bilirsiz ki, Gülüstan və Türkmənçay müqavilələrindən sonra ermənilər İran və Türkiyə ərazisindən Qarabağa köçürüldü, hərəsi də Qarabağda yerin altına bir daş basdırdı ki, guya ora onların tarixi torpağıdır. Amma reallıq tamamilə başqadır. Bu reallığı biz indiki Ermənistan ərazisinə də etap edə bilərik. Bu ərazilər də Azərbaycana məxsus olan torpaqlardır.

Sadə ermənilərin yeganə məqsədi öz qınlarına çəkilib sakit şəkildə yaşamaqdır”. 

İ.Rüstəmli qeyd etdi ki, Azərbaycan Cənubi Qafqazda yeni geosiyasi reallıq yaradıb, bunun tələbləri həddən artıq sərtdir, amma zaman-zaman, göründüyü kimi, ermənilər bu geosiyasi reallıqlarla barışmağa məcburdurlar. İ.Rüstəmlinin sözlərinə görə, amma bu reallıqla barışmayan Avropa və Qərb dövlətləri var ki, onlar Ermənistan üzərində nəzarəti gündən-günə möhkəmləndirməyə çalışırlar. O qeyd etdi ki, bir müddət əvvəl ABŞ hərbiçiləri ilə Ermənistan hərbiçilərinin birgə təlimləri həyata keçirildi, Şuşaya, Zəngəzura yaxın ərazilərdə uçuşlar ediblər və sair. “Bu cür addımlar atan Fransanın və ABŞ-ın Ermənistana ürəyi yanmır. Onların tək və əsas məqsədləri Ermənistanda öz monopolyalarını yaratmaqdır ki, bu ölkəni özlərinin forpostuna çevirsinlər. Halbuki, dünənə qədər o ölkə Rusiyanın forpostu idi. Marionet, tarixi, kökü olmayan bir dövlətdir. Elə bil söyüd kimi bir şeydir. Bu dövlətdən hamı Cənubi Qafqazda öz mövqeyini möhkəmlətmək üçün istifadə edir. 

Putin ortaya mövqe qoyub ki, Qarabağ Azərbaycan torpağıdır, Paşinyan hakimiyyətdən getməlidir, çünki artıq Paşinyanla barışa bilmir. ABŞ da öz siyasi mövqeyini Ermənistanda gücləndirməyə çalışır ki, Paşinyanın hakimiyyətinin ömrünü daha da uzatsın. Əslində, baş verənlər Azərbaycanın xeyrinədir. Amma Amerika kimi nəhəng bir dövlətin 10 minlərlə kilometr uzaqlardan gəlib Ermənistan ərazinə silah-sursat daşıması,   Ermənistan əsgərlərinin formasını geyinmiş hərbi qulluqçularını bu ölkədə yerləşdirməsi, təbii ki, Azərbaycan üçün heç də xoş deyil. Yəni bir aktyor öz rolunu başqa bir aktyora verib, bir hegemon dövlət digər hegemon dövlətin simasında Azərbaycana təzyiq və təsir göstərir. Əlbəttə, Amerikanın hərbi uçaqlarının Ermənistana enməsi, AB silahlı qüvvələrinin ora gəlməsi, onlara silah-sursat daşımısı, xüsusilə müasir silahlar gətirməsi həm də Azərbaycana təzyiq deməkdir. Amma cənab Prezidentin dediyi kimi, Azərbaycan öz mövqeyindən heç vaxt geri çəkilməyəcək. Bu gün  Azərbaycanın siyasi, iqtisadi, hərbi vəziyyəti kifayət qədər dayanıqlı bir formadadır”.

İ.Rüstəmli bildirdi ki, Ermənistan Statistika Komitəsinin yaydığı məlumat reallığı göstərir və ermənilərin oradan köç etməsi faktı var. “Ermənilərin Qərbi Zəngəzuru tərk etməsinin real səbəbləri var, onlar bu torpağın onlara aid olmadığını bilirlər. Onlar başa düşürlər ki, oradan çıxmaqları labüddür. Artıq onların kürkünə birə düşüb. Azərbaycan burada çox prinsipial mövqedən çıxış edir, digər tərəfdən də Rusiya “Zəngəzur dəhlizinin” açılmasının tərəfdarıdır. Açığı deyək ki, ermənilərin Ermənistan hakimiyyətinə inamı, etimadı yoxdur. Ermənilər ölməkdən qorxurlar. Onların Qərbi Zəngəzuru tərk etməsi, son bir ildə 18 min nəfər ermənin ordan köçüb başqa yerə getməsi qeyri-real deyil. Çünki onlar bilirlər ki, Azərbaycan nə deyirsə onu da edir. Azərbaycan qarış-qarış öz iradəsini yeridir və istəyinə çatır. Ermənilər çox yaxşı bilirlər ki, Qərbi Zəngəzur Azərbaycan torpağıdır. Dərk edirlər ki, uzun illər başqasının  evində-eşiyində oturublar və çıxıb getmək lazımdır. Ona görə də nə qədər üzüsulu çıxsalar, bir o qədər onların xeyrinədir”-deyə İ.Rüstəmli qeyd etdi.

İradə SARIYEVA