Şanxay təşkilatında Azərbaycanın yeni statusu reallaşır...
![Image](/uploads/posts/2024-07/set.webp)
İlyas Hüseynov: “Mənə elə gəlir ki, bu təşkilat tərəfindən də Azərbaycanın müraciətinə müsbət rəy, cavab veriləcək, Azərbaycan ŞƏT-də müşahidəçi ölkə statusu əldə edəcək”
Azərbaycan Şanxay Əməkdaşlıq Təşkilatında (ŞƏT) müşahidəçi ölkə statusu almaq üçün müraciət edib. Bu barədə İran İslam Respublikasının ŞƏT Katibliyindəki milli əlaqələndiricisi Mehrdad Kiayevi "İzvestiya"ya deyib.
"Bir neçə ölkə, o cümlədən Kamboca, Şri-Lanka, Ermənistan, Banqladeş, Azərbaycan və digərləri təşkilata qoşulmaq üçün müraciət edib. Bu ölkələr (Banqladeşdən başqa) statuslarını dialoq tərəfdaşlığından müşahidəçiliyə dəyişmək istəyirlər. Biz, prinsipcə, bu məsələni gözdən keçirməyə, həmçinin müvafiq ərizəçilər və təşkilata üzv dövlətlərlə razılıq əsasında müəyyən nəticəyə gəlməyə hazırıq", - o deyib.
Onun sözlərinə görə, ölkələr əvvəlcə müşahidəçi olmalıdır və yalnız bundan sonra tamhüquqlu iştirakçı ola bilərlər.
Məlumat Xarici İşlər Nazirliyindən də təsdiqlənib.
Qeyd edək ki, Azərbaycan 2016-cı ildən ŞƏT-in tərəfdaşıdır.
“...Azərbaycan burda öz rolunu bir qədər də möhkəmləndirir”
Şanxay təşkilatında Azərbaycanın yeni statusunun reallaşması istiqamətində atılan addımın əhəmiyyətini, Azərbaycana gətirəcək dividendləri və sair məsələləri şərh edən politoloq İlyas Hüseynov “Bakı-Xəbər”ə “Azərbaycan Şanxay Əməkdaşlıq Təşkilatına müşahidəçi ölkə statusu almaq üçün rəsmən müraciət edib. Bundan əvvəl dialoq tərəfdaşı kimi çıxış edirdi. Bu təşkilat əsas etibarı ilə sosial-iqtisadi yönümlü olduğu üçün Azərbaycan siyasətçiləri, iqtisadçıları, ekspertlər belə proqnozlaşdırırlar ki, bu status Azərbaycan üçün dividendlər vəd edir. Çünki getdikcə dünya siyasətində qlobal Şimal və qlobal Cənub fenomenləri güclənir, Azərbaycan da öz geostrateji imkanlarından istifadə edərək Şimal və Cənub, Şərqlə Qərb arasında bağlantılarda yer almağa çalşır, dünya siyasi təhlükəsizlik dizaynında öz gücünü gücləndirir. Ərazi bütövlüyü və suverenliyini təmin etdikdən sonra Azərbaycana maraq çox böyükdür. Baxmayaraq ki, ölkəmiz həm Pakistanla qardaşdır, həm Çinlə strateji tərəfdaşlıq haqqında saziş imzalayıb, Rusiya ilə müttəfiqlik, qarşılıqlı fəaliyyəti var, qardaş Türkiyə ilə Şuşa bəyannaməsi, türk dövlətləri ilə “Qarabağ” bəyannaməsi imzalamış Azərbaycan həm də Avropanın enerji təhlükəsizliyində mühüm rol oynayır. Təsadüfi deyil ki, cənab Prezident İlham Əliyev Londonda keçirilən Avropa Siyasi Birliyinin 4-cü zirvə toplantısında iştirak edir. Bu da çox mühüm göstərici kimi qiymətləndirilir. Yəni balansın qorunması, iqtisadi faydaya əsaslanan əməkdaşlıq, tərəfdaşlıq münbasibətləri, müttəfiqlik haqqında ümumi rəylər, düşüncələr, mülahizələr ölkəmizin mövqeyini bir qədər də möhkəmləndirir”-deyə bildirdi.
İ.Hüseynovun sözlərinə görə, nə qədər iqtisadi səmərəyə yönəlmiş, iqtisadi koorperasiyanı gücləndirən addımlar atılacaqsa, bu, Azərbaycan xalqının rifahına xidmət edəcək. “Məhz bu baxımdan, ŞƏT-in gələcək gücünü, potensialını nəzərə alaraq Azərbaycan burda öz rolunu bir qədər də möhkəmləndirir. Mənə elə gəlir ki, bu təşkilat tərəfindən də Azərbaycanın müraciətinə müsbət rəy, cavab veriləcək, Azərbaycan ŞƏT-də müşahidəçi ölkə statusu əldə edəcək. Sonra isə baxacağıq, nəzarət mexanizmləri işə düşəcək, müşahidəçi statusu əldə etməyimiz Azərbaycan iqtisadiyatına nə qədər dividendlər verəcək, ticarət dövriyyəsi nə qədər artacaq, tranzit potensialımız nə cür inkişaf edəcək, hansı dinamik nəticələr əldə olunacaq, düşünürəm, buna uyğun da gələcək addımlar atıla bilər”-deyə İ.Hüseynov bildirdi.
İradə SARIYEVA