Antiterror tədbirlərindən sonra Azərbaycanın xarici siyasətdə ən böyük uğuru - Ermənistanın siyasəti iflas etdi…
![Image](/uploads/posts/2024-07/1721396950_baku-2.webp)
Samir Hümbətov: “Daha çevik siyasətə ərazilərimiz işğaldan azad olandan sonra başladıq”
Prezidentin Londona səfəri və həmin platformada Azərbaycanın iştirakı Prezident İlham Əlyevin uğurlu və çoxşaxəli xarici siyasətinin göstəricisi sayıla bilər. Avropa Siyasi Birliyinin 4-cü Zirvə toplantısı çərçivəsindən yayılan kadrlardan diqqəti mühüm məqam çəkir. Görünür ki, qeyri-rəsmi təmaslarda Avropa liderləri İlham Əliyevlə olduqca səmimi və mehriban görüşürlər. Qərbə yaxın siyasətçi kimi xarakterizə olunan Paşinyanla bağlı təmaslarda biz bunun şahidi olmuruq.
Prezidentin xarici səfərlərindən görünür ki, Azərbaycan yalnız Qərblə əməkdaşlıqla kifayətlənmir. Ölkə başçısının Astana səfəri, ŞƏT çərçivəsində səylər, Çinlə imzalanan srateji tərəfdaşlıq sazişi, Astanada Rusiya prezidenti ilə görüşü, Türkiyə-Pakistan formatında əməkdaşlıq, BRİKS-lə münasibətlərin güclənməsi buna misaldır. Son vaxtlar İranla münasibətlərin normallaşması, səfirliyin fəaliyyətinin bərpa olunması da diqqət çəkir.
Bütün bunlar onu deməyə əsas verirmi ki, münaqişədən sonra Azərbaycan daha qlobal xarici siyasət həyata keçirir, müxtəlif beynəlxalq platformalarda aktiv iştirak edir?
Siyasi şərhçi Samir Hümbətov “Bakı-Xəbər”ə açıqlamasında bildirdi ki, Azərbaycan xarici siyasət strategiyasını İkinci Qarabağ savaşından sonra qurmayıb: “Bu strategiya hətta 93 - cü ildən başlayaraq formalaşdırılmağa başlanıldı. Ancaq 2020 - ci ilə qədər Azərbaycan əraziləri işğal altında idi və bununla əlaqədar olaraq bəzi addımların atılmasını ya ləngidirdik, ya da zamanını gözləyirdik. Desək ki, sırf İkinci Qarabağ savaşından sonra bizim xarici siyasətimiz dəyişdi, yalan olar. Çünki biz BMT Təhlükəsizlik Şurasının qeyri-daimi üzvü olanda, ərazilərimiz işğal altında idi. Daha mütəşəkkil, daha çevik siyasətə ərazilərimiz işğaldan azad olandan sonra başladıq. Azərbaycan Afrika ilə də, Amerika ilə də, dünyanın müxtəlif ölkələri ilə də dərin əlaqələrin formalaşmasına start verdi. Bu əlaqələr həm də faydalı, nəticəyönümlü bir siyasətə çevrildi. Odur ki, Azərbaycan kifayət qədər uğur əldə edib. Düşünürəm ki, qarşıda hələ görməli olduğumuz işlər çoxdur. Hər halda, əldə etdiyimiz uğurlar da dörd il ərzində kifayət qədər olub və eyni zamanda enerji siyasətini də dərinləşdirib. Avropa ilə artıq həm daxili, həm də xarici siyasət formalaşdırılıb. Qurulan strateji xətt, xarici siyasət strategiyası çox mühüm ciddi əhəmiyyət kəsb edir. Yəni baş verənlər hadisə deyil, bu, uzun müddətə hesablanmış dərin, strateji hədəfdir. Burada dövlətin ortaya qoyduğu konsepsiya da önəmlidir. Amma eyni zamanda beynəlxalq xarici siyasətin təsir mexanizmlərini öz siyasətimizlə uyğunlaşdırmağa çalışdıq. Öz siyasətimizdə öz maraqlarımızın güdülməsi çox önəmlidir. Dövlətlərdə, adətən beynəlxalq münasibətlərdə belə bir anlayış var ki, öncəlik öz maraqlarına verilir. Ona görə də, düşünürəm ki, burda planlı, məqsədyönlü, faydalı bir strateji xətt həyata keçirilib. Bu gün uğurlarımız da xeyli artır. Hesab edirəm ki, Şanxay Əməkdaşlıq Təşkilatı da bu qəbildən olan strateji xəttə aiddir. Azərbaycanın orada təmsil olunması istər müşahidəçi, istərsə də digər statuslarda həmin ölkələrlə daha sıx, geniş əlaqələr qurmasına, geniş və mütəşəkkil siyasi - iqtisadi təhlükəsizlik layihələrinin icra edilməsinə, son nəticədə özünün təhlükəsizliyinin daha da möhkəmlənməsinə töhfə verə bilər”.
Məhəmmədəli QƏRİBLİ