İtkin sayılan şəhid Rəhim Rəsulovun qalıqları Sumqayıtda dəfn edildi
Birinci Qarabağ müharibəsində itkin düşən və 31 ildən sonra şəxsiyyəti müəyyənləşdirilən şəhid Rəsulov Rəhim Əlyar oğlunun nəşinin qalıqları bu gün Sumqayıt şəhər Şəhidlər xiyabanında dəfn edilib.
Vida mərasimində Sumqayıt Şəhər İcra Hakimiyyəti, hüquq-mühafizə orqanları, idarə, müəssisə, təşkilat rəhbərləri və ictimaiyyət nümayəndələri, müharibə veteranları, şəhidin qohumları və yaxınları iştirak ediblər.
Cənazə namazı qılınıb, dualar oxunub. Dəfn zamanı hərbi orkestrin müşayətilə Dövlət Himni ifa olunub və yaylım atəşi açılıb.
Şəhidin tabutuna bürünmüş Azərbaycan Bayrağı qardaşı Soltan Rəsulova təqdim edilib.
Qeyd edək ki, şəhid Rəsulov Rəhim Əlyar oğlu 1967-ci il dekabrın 19-da Sumqayıtda anadan olub. O, hərbçi olaraq Qarabağda gedən döyüşlərdə iştirak edib. 1991-ci il dekabrın 28-də Kərkicahan ərazisində düşmənlə gedən şiddətli döyüş zamanı hərbi xidmət borcunu yerinə yetirərkən şücaət göstərərək şəhidlik zirvəsinə ucalıb.
Rəhim Rəsulov Yevlax rayonunun Yedili kəndinin Şəhidlər xiyabanında naməlum şəhid kimi dəfn edilən şəhidlərimizindən biri olub.
