Məktəbəqədər təhsilə onlayn qəbul səhifəsi açılan kimi dolur - valideynlər narahatdır…
![Image](/uploads/posts/2024-07/mektebeqeder.webp)
Elmin Nuri: “Onlayn qəbul zamanı müəyyən şərtlər əsas götürülür, belə ki, ərazi vahidinə görə bəzi tələblər var”
Uşaqlıq və məktəbəqədər yaş dövrü nəinki uşağın, həmçinin insan həyatının çox mühüm dövrüdür. Məhz bu dövrdə insanın sağlamlığı, onun xarakterinin və şəxsiyyətinin əsas cəhətləri formalaşır. Uşaqlıq dövründə qazanılan bilik, vərdiş və bacarıqlar böyük ölçüdə insanın bütün qalan ömrünü müəyyən edir.
Məktəbqədər hazırlıq kiçik yaşlarından uşaqda ətraf aləmə maraq yaradır, biliklərə və qarşıya qoyulmuş tapşırıqlara müstəqil həll yolu axtarmağa meyl formalaşdırır.
Övladını bağçaya qoymaq istəyən valideynlər üçün iki seçim var: dövlət və özəl bağçalar. Ancaq bu seçimlərdən istifadə imkanı heç də hər valideynə qismət olmur. Dövlət bağçalarında yer olmur, özəl bağçalarda isə qiymət hər ailənin büdcəsinə uyğun deyil. Məlumdur ki, bağçalara qəbul elektron qaydada həyata keçirilir. Övladını bağçaya yazdırmaq istəyən valideyn elektron şəkildə müraciət etsə də, valideynə ya “yer yoxdur”, ya da “gözləyin” cavabı verilir. Ancaq iddia olunur ki, boş qalmış yerlərə direktorlar müəyyən pul qarşılığında uşaq qəbul edirlər.
Səsləndirilən iddialarla bağlı Məktəbəqədər və Ümumi Təhsil üzrə Dövlət Agentliyinin Məktəbəqədər Təhsilin Təşkili şöbəsinin müdiri İlahə Rəsulova media nümayəndələrinə bildirib ki, bu kimi hallarla rastlaşan valideynlər agentliyə müraciət etməlidirlər. Mövzu araşdırıldıqdan sonra qayda pozuntusu olarsa, həmin bağça rəhbərliyi cəzalandırılacaq.
“Hər il məktəbəqədər təhsilə qəbul zamanı bu cür xoşagəlməz hallarla bağlı fikirlər yayılır”
Sosial Tədqiqatlar Mərkəzinin əməkdaşı, təhsil məsələləri üzrə tədqiqatçı Elmin Nuri “Bakı-Xəbər”ə açıqlamasında bildirdi ki, hər il məktəbəqədər təhsilə qəbul zamanı bu cür xoşagəlməz hallarla bağlı fikirlər yayılır: “Yaxşı olar ki, bu cür şikayətlər anonim şəkildə olmasın. Şikayətçi hansı bağçada bu cür halla qarşılaşıbsa onu tam şəkildə açıqlasın. Məlumat üçün deyim ki, son illər təhsil sektorunda baş verən neqativlərin qarşısının alınması istiqamətində müəyyən işlər görülür. Məktəbəqədər və Ümumi Təhsil üzrə Dövlət Agentliyi yaradıldıqdan sonra bağçalarda yoxlanışların sayı artıb. Nəticədə xeyli sayda bağça müdiri işdən azad edildi. Neqativ hal var ki, səhvi olanlar işdən azad edilir”.
Həmsöhbətimiz onu da əlavə etdi ki, onlayn ərizə qəbulu çox çətin prosesdir. Birbaşa valideyn tərəfindən aparıldığına görə bəzən uğursuz nəticələrə səbəb olur. Elektron qəbul 3 mərhələdən ibarət olur. Həmçinin, bunu edən şəxsin müəyyən texniki biliyi olmalıdır. Onu da deyim ki, onlayn qəbul zamanı müəyyən şərtlər əsas götürülür. Belə ki, ərazi vahidinə görə bəzi tələblər var. Valideynlər bu tələblərə cavab verə bilməyəndə haqsız şəkildə iradlar bildirir ki, sistem onun uşağını qəbul etmədi, ancaq filankəsin övladını pulla götürdülər”.
Günel CƏLİLOVA