YAP-ın namizədlər siyahısını gözləyənlərə sərt sual - özünüzə güvəniniz yoxdursa...
Təhmasib Novruzov: “Özünü millət vəkilliyinə layiq bilən siyasətçi və ya ictimai fəal belə ucuz mübarizə forması secməməlidir”
Seçki kampaniyasının namizədlərin imza vərəqələri əldə etmək üçün DSK-lara sənədlərini təqdim etmələri mərhələsi davam edir. Artıq 500-dən yuxarı namizədə imza vərəqələri verilib və onların bir çoxu imzatoplama kampaniyasına start verib.
Namizədin müdafiəsi üçün onun irəli sürüldüyü seçki dairəsinin ərazisində seçicilərin azı 450 imzası toplanmalıdır. Bir seçicinin birdən artıq namizədin müdafiəsi üçün imza atması mümkündür. İmza vərəqələrinin DSK-lara təqdim olunması üçün müddət avqustun 2-si saat 18-də bitəcək.
Hazırda isə seçkilərlə bağlı əsas nəzərlər həm də hakim Yeni Azərbaycan Partiyasının (YAP) deputatlığa namizədlər siyahısının necə olacağına yönəlib. Hakim partiya, hələ ki, öz siyahısını ictimaiyyətə təqdim etməyib. Mediada məlumatlar yayılıb ki, YAP-ın deputatlığa namizədlər siyahısı hakim partiyanın lideri, Prezident İlham Əliyevə təqdim edilib və bu gün (17 iyul-red.) yekun siyahının açıqlanacağı gözlənilir.
Bir çox müxalif və müstəqil namizədlər hələ də namizədliyini irəli sürməyib. Açıq etiraf edirlər ki, YAP-ın namizədlərinin elanını gözləyirlər. YAP-ın namizədlərindən bu qədər ehtiyat etmə nə dərəcədə doğru taktika sayıla bilər?
Azadlıq Hərəkatçıları İctimai Birliyinin sədri Təhmasib Novruzov “Bakı-Xəbər”ə açıqlamasında bildirdi ki, belə seçki taktikasını doğru saymır: “Bir siyasətçi, yaxud ictimai xadim hakim partiyanın namizədləri olacaq dairələrdən ehtiyatlanır və namizədliyini irəli sürəcəyi dairəni bundan sonra secməyi planlaşdırırsa, onun nə siyasi, nə ictimai fəaliyyəti müsbət dəyərləndirilə bilər. Məlum məsələdir, hansı dairədən YAP- ın nisbətən zəif nümayandəsi namizəd olacaqsa, həmin dairədən millət vəkilliyinə namizədliyini irəli sürəcək. Halbuki, əsl millət vəkili məhz güclü namizədlə mubarizəni daha effektli hesab etməlidir. Güclü namizəd üzərində qələbə ona daha böyük nüfuz, imic qazandırar. Məglub olarsa da, güclü namizədə məglub olar və bu, onun imicinə xələl gətirməz. Ona görə də, hesab edirəm ki, sözün həqiqi mənasında özünü millət vəkilliyinə layiq bilən siyasətçi və ya ictimai fəal belə ucuz mübarizə forması secməməlidir”.
İstər 44 günlük Vətən müharibəsində, istərsə də ondan sonrakı dönəmdə əldə olunan tarixi qələbələr xalqın hazırkı hakimiyyətə inamını daha da gücləndirib: “Etiraf etməliyəm ki, indiki vəziyyətdə YAP-la başa-baş mübarizə aparmağa qadir olan siyasi qüvvə mən görmürəm. Bizim bəzi müxalif namizədlərimiz və siyasi təsisatlarımız hakmiyyətə müxaliflik deyil, düşmənçilik edirlər. Bu da onların cəmiyyət arasındakı nüfuzlarına ciddi xələl gətirir. Hesab edirəm ki, bu seçkidə müxalifətin YAP-a qalib gəlmə şansı yoxdur. Onlar çox az sayda namizədlə parlamentdə təmsil oluna bilərlər. Bundan artıq nəyinsə olacağına inanmıram”.
Qeyd edək ki, yazı çapa hazırlanarkən, YAP-ın siyahısının hazır olduğu ilə bağlı məlumat yayıldı.
Məhəmmədəli QƏRİBLİ
