Ermənistan sülh sazişinin imzalanması üçün “hər şeyi edir” - inanaq?
Məhəmməd Əsədullazadə: “Tərəflər arasında sülh müqaviləsinin mətni üzrə fikir ayrılıqları qalmaqdadır”
“Azərbaycanla sülh müqaviləsinin imzalanması Ermənistan və bütövlükdə region üçün daha da ciddi sülh təminatları yaradacaq”. Bu barədə jurnalistlərə Ermənistanın baş nazirinin ofisinin rəhbəri Arayik Arutyunyan məlumat verib.
Onun sözlərinə görə, İrəvan Azərbaycanla sülh müqaviləsinin tezliklə imzalanması üçün hər şeyi edir.
O da məlumdur ki, baş nazir Nikol Paşinyan başda olmaqla, ən yüksək səviyyəli erməni rəsmiləri sülh sazişi ilə bağlı ard-arda açıqlamalar verirlər. İlk baxışdan belə təəssürat yaranır ki, Ermənistan sülh sazişinin imzalanmasına tələsir. Ancaq bəzi məqamlarda verilən sülh mesajları praktiki addımlarda özünü o qədər də göstərmir.
O baxımdan maraqlıdır, doğrudanmı Ermənistan sülh müqaviləsi üçün hər şeyi edir?
“Azərbaycanla normallaşma prosesi Paşinyanın mövqeyini gücləndirər və Avropanın buna dəstəyini artırar”
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadə bütün bunlara bir neçə prizmadan yanaşdı: “Azərbaycanla Ermənistan arasında aparılan danışıqlarda, əsasən də Almatı formatında keçirilən danışıqlarda müəyyən irəliləyişlər əldə edildi. Söhbət, əsasən Qazaxın 4 kəndinin işğaldan azad edilməsindən gedir. Bununla belə, xarici işlər nazirləri səviyyəsində aparılan danışıqlarda, sərhədlərin delimitasiyası və demarkasiyası ilə bağlı birgə komissiyanın işində mühüm irəliləyişlər var. Ancaq tərəflər arasında sülh müqaviləsinin mətni üzrə fikir ayrılıqları qalmaqdadır. Bunu Azərbaycan və Ermənistan xarici işlər nazirləri də vurğulayıb. İndi Azərbaycanla Ermənistan arasında çərçivə sazişi üzrə baza sənədinin hazırlanması istiqamətində iş gedir və Bakı COP29-a qədər belə bir sənədin imzalanmasında maraqlıdır. Yekun sülh sazişi müqaviləsi ilə bağlı fikir ayrılıqları var. Zəngəzur dəhlizi, sərhədlərin delimitasiyası ilə bağlı iki ölkə arasında müəyyən fikir ayrılıqları var. Məsələ ondadır ki, bütün bunlarla bağlı Ermənistanın müəyyən şərtləri var. Təbii ki, bu şərtlər qanunsuzdur. Ancaq bütün bunlara baxmayaraq, Ermənistan tərəfindən də müəyyən praqmatik açıqlamalar verilir. Ermənistan tərəfi sülhü gecikdirərsə, əlbəttə ki, proseslər Paşinyanın əleyhinə çevriləcək. Üstəlik, Ermənistan daxilindəki etirazlar da onun mövqeyinə təsir edir. Ona görə də Azərbaycanla normallaşma prosesi Paşinyanın mövqeyini gücləndirər və Avropanın da buna dəstəyini artırar. Görünən odur ki, Azərbaycan daha çox praktikada Ermənistanın mövqeyinə diqqət edir. O baxımdan hesab edirəm ki, siyasi iradə ortaya qoyulacaqsa, proses davamlı olarsa, əlavə əsassız şərtlərlə İrəvan çıxış etməzsə, o zaman iki ölkə arasında sülhün əldə edilməsi mümkündür. Deməyim odur ki, çox qısa zamanda yekun sülh sazişi imzalana bilər”.
Vidadi ORDAHALLI
