Naxçıvana baş nazir təyinatı ortaya yeni sual çıxardı...
Elçin Qurbanov: “Naxçıvanın bütün sahələrinin inkişafı ilə bağlı məsuliyyət bölgüsündə dediyiniz qurumların tandem şəklində koordinasiyalı fəaliyyəti lazımdır”
Aprelin 25-də Naxçıvan Muxtar Respublikasında Azərbaycan Prezidentinin səlahiyyətli nümayəndəsi Fuad Nəcəfli Prezidentin təqdimatına uyğun olaraq Naxçıvan Muxtar Respublikasının Baş naziri vəzifəsinə təyin edilmiş Ceyhun Cəlilovu Nazirlər Kabinetinin kollektivinə təqdim edib.
F.Nəcəfli qeyd edib ki, təyin edilmiş hər hansı bir dövlət məmuru öz işinin öhdəsindən gəlməli, dövlət başçısının qarşıya qoyduğu vəzifələri layiqincə icra etməlidir. Dövlət məmuru ətrafda ətalətin yaranmasına yol verməməli və öz üzərinə düşən vəzifələri vaxtında yerinə yetirməlidir.
F.Nəcəfli bildirib ki, Nazirlər Kabinetinin vəzifəsi sosial - iqtisadi proqramların vaxtında və keyfiyyətli icra edilməsidir. Ancaq bir çox hallarda müvafiq proqramların icrası zamanı gecikmələr yaşanırdı. Nazirlər Kabineti fəaliyyətini düzgün istiqamətdə qurmaqda çətinlik çəkirdi. Bu da Naxçıvan Muxtar Respublikasında bir sıra işlərin ləng getməsinə səbəb olurdu. Güman edirəm ki, artıq bu kimi hallar tez bir zamanda aradan qaldırılacaq, bütün gücümüzü, səylərimizi birləşdirib muxtar respublikanın inkişafına mühüm töhfələr verəcəyik.
Maraqlıdır, muxtariyyətin sosial - iqtisadi və mədəni - humanitar inkişafı və durumu üçün əsas məsuliyyəti kim daşıyacaq - baş nazir, yoxsa səlahiyyətli nümayəndə?
Audit üzrə ekspert Elçin Qurbanov “Bakı-Xəbər”ə açıqlamasında bildirdi ki,
Naxçıvan Muxtar Respublikası Konstitusiyanın 25-ci maddəsinin 4-cü hissəsində Naxçıvan Muxtar Respublikası Baş nazirinin vəzifəyə təyin edilməsi və azad edilməsi Naxçıvan Muxtar Respublikası Ali Məclisinin həll etdiyi məsələlərə aid edilib: “Həmin maddənin 5-ci hissəsinə əsasən, Nazirlər Kabinetinin tərkibini də Ali Məclis təsdiq edir. Naxçıvan Muxtar Respublikasının mənafeləri ilə bağlı olan bütün digər məsələlər Naxçıvan Muxtar Respublikası tərəfindən həll edilir, o halda ki, bu məsələlərin həlli Azərbaycan Respublikasının dövlət orqanlarının səlahiyyətlərinə aid edilməyib. Nəzərə çatdırmaq istəyirəm ki, NMR -da Azərbaycan Prezidentinin səlahiyyətli nümayəndəliyi Azərbaycan Respublikası Prezident Adminstrasiyasının struktur bölməsidir. Əməkdaşları isə Prezident Adminstrasiyasının əməkdaşlarıdır. Onun səlahiyyətləri Prezident tərəfindən müəyyən edilir. Əsasnaməyə əsasən, yerli icra hakdimiyyəti orqanları ilə digər hakimiyyət orqanlarını əlaqələndirmək, müvafiq nəzarəti həyata keçirmək, ictimai, sosial, iqtisadi vəziyyətlə əlaqədar ölkə başçısına məlumat vermək və prezident tərəfindən müəyyən edilən digər vəzifələri həyata keçirmək onun fəaliyyət istiqamətlərinə aiddir. NMR-nın Baş naziri vəzifəsini tutan şəxsi NMR-nın Ali məclisi təsdiq etdikdən sonra səlahiyyətlidir. Bu baxımdan da hesab edirəm ki, Naxçıvanın bütün sahələrinin inkişafı ilə bağlı məsuliyyət bölgüsündə dediyiniz qurumların tandem şəklində koordinasiyalı fəaliyyəti lazımdır. Böyük ehtimalla belə də olacaq. İqtisadi sahəyə aid məsələləri Baş nazir, sitasi məsələləri isə Nümayəndəlik həyata keçirəcək”.
Məhəmmədəli QƏRİBLİ
