Ermənistan Rusiyaya zərbə qalmır vurur, Kreml “genosid nağıllarından” hələ doymur...
Azər Həsrət: “Təəssüflər olsun ki, Rusiya ənənələrə sadiq qalaraq yenə də ermənilərin qondarma iddiasını ciddi şəkildə qəbul etdiyini nümayiş etdirir”
Rusiyanın Ermənistandakı səfirliyi öz Facebook səhifəsində qondarma erməni “soyqırımı” “qurbanları” ilə bağlı paylaşım edib. Burada iddia edilib ki, 24 aprel Osmanlı İmperiyasında erməni “soyqırımı” “qurbanlarının” “anım günüdür”. “Erməni xalqı ilə birlikdə yas saxlayırıq”- səfir yazıb.
Əlbəttə, rus səfirin yazdıqları normal qəbul edilə bilməz və olmayan bir məsələni bu qədər şişirtməyin, olmayan qurbanlara yas saxlayıb, göz yaşı tökməyin hansı məqsədə qulluq etdiyini anlamaq çətin deyil, amma çox ziyanlı tendensiyadır.
Rusiya bir yandan Ermənistanın üstündə Qərblə ölüm-dirim müharibəsi aparır, bir yandan Ukraynada ölüm-dirim savaşı verir, bir yandan dünyadan təcrid olunub, bir yandan Türkiyə kimi ölkə ilə ən yaxın münasibətləri saxlamaqla özünü xeyli dərəcədə bağlı vəziyyətdə sığortalaya bilir, bir tərəfdən Azərbaycan onun bölgədə ən etibarlı tərəfdaşına çevrilməkdədir, bir tərəfdən Azərbaycan Rusiyanın maraqlarına son dərəcə hörmətlə yanaşan bir ölkədir, bir tərəfdən Ermənistan artıq Rusiyadan qopub çıxıb getmək istəyir, amma Rusiya tərəfi hələ də saxta genosidə münasibət sərgiləyir. Saxta genosidlə bağlı Rusiya səfirinin bu canfəşanlığı bütün Rusiyanın Cənubi Qafqazı vahid bir təhlükəsizlik arenasına çevirmək siyasətinə zərbə vurur. Bu, türk xalqlarının, Mərkəzi Asiyanın, Azərbaycanın, Türkiyənin qəlbinə toxunur. Onlar bir ovuc ermənini saxta genosid məsələsində müdafiə etməklə böyük türk dünyasının heysiyyəti, maraqları ilə oynayır.
İndiki şəraitdə də Rusiyanın qondarma erməni genosidinə belə isti yanaşması Rusiya üçün buraxılan növbəti geosiyasi səhv deyilmi?
Düzdür, vaxtilə Zatulinin hazırladığı qondarma sənədə uyaraq Rusiya Duması qondarma “soyqırımı” tanıyıb, bu məlumdur.
Belə olsa da, heç olmasa indiki şəraitdə pərdəli hərəkət etsələr, bunu arxa plana atsalar daha yaxşı olar. Amerika da saxta genosidə görə Ermənistana can atır, onu dəstəkləyir, Rusiya da ABŞ-a qoşulub Ermənistanı dəstəkləməkdə davam edir. Bu çox böyük geosiyasi səhvdir. Heç olmasa eyibinizə kor olub çəkilib durun kənarda, sakit keçin bunun üstündən.
“...Artıq erməni nağıllarını arxa plana keçirməlidir”
Siyasi şərhçi Azər Həsrət “Bakı-Xəbər”ə “Rusiya, ümumiyyətlə, Ermənistanı əldən buraxmaq istəmir. Ona görə də hakimiyyətin münasibətini nəzərə almadan erməni xalqının rəğbətini qoruyub saxlamağa çalışır. Amma bir şeyi unudurlar ki, bu gün Rusiyaya olan münasibət sadəcə hakimiyyətin münasibəti deyil, bu bütün ermənilərin münasibətidir”-deyə bildirdi.
O hesab edir ki, ermənilər dünyada bircə dəfə Rusiyanın köməyindən məhrum oldular və başlarına gəlməyən qalmadı. “Əlbəttə, onlar bunu Rusiyaya bağışlamaq istəmirlər, ona görə də Rusiyadan qopub müstəqillik yoluna qədəm qoymağa çalışırlar. Belə bir şəraitdə də Rusiyanın uyğun davranması lazımdır. Amma təəssüflər olsun ki, Rusiya ənənələrə sadiq qalaraq yenə də ermənilərin qondarma iddiasını ciddi şəkildə qəbul etdiyini nümayiş etdirir. Belə bir şəraitdə, əlbəttə, Rusiya ictimai rəyinin önündə gedənlər, Rusiyanı idarə edənlər düşünməlidirlər. Bir tərəfdən qardaş Türkiyə ilə dostluq edib, digər tərəfdən ermənilərin saxta iddialarına haqq qazandırmaq olmaz, bu ikiüzlülükdür. Rusiya nəhayət ki, belə bir ikiüzlkülükdən imtina etməyi bacarmalı və bunun üçün özündə güc tapmalıdır, Türkiyə və Azərbaycanla doğrudan da səmimi dostluq münasdibətlərində qalmaq fikrindədirsə, artıq erməni nağıllarını arxa plana keçirməlidir. Əks təqdirdə biz Rusiyanı ikiüzlü kimi qəbul etmək məcburiyyətində qalacağıq”-deyə A.Həsrət vurğuladı.
İradə SARIYEVA
