Gürcüstandan xırdabuynuzlu idxalı dayandırıldı - xeyri-ziyanı nə olacaq?..
Akif Nəsirli: “Ət idxalının azalması daxildə qiymətə təsir edə bilər”
Azərbaycan Qida Təhlükəsizliyi Agentliyi (AQTA) xırdabuynuzlu heyvanların Gürcüstandan Azərbaycana idxalına məhdudiyyət qoyub. Məhdudiyyətə səbəb Gürcüstanın Aşağı Kartli regionunda xırdabuynuzlu heyvanlarda taun xəstəliyinin qeydə alınmasıdır.
Qeyd edək ki, ötən il Azərbaycana 25 milyon 102 min dollar dəyərində 320 min 543 baş diri qoyun idxal edilib ki, bu da əvvəlki illə müqayisədə say baxımından 65% və ya 125.9 min baş, dəyər baxımından isə 58% və ya 9.2 milyon dollar artıq deməkdir. Məlumdur ki, Gürcüstan Azərbaycanın əsas xırdabuynuzlu heyvan idxalı bazarıdır. Belə ki, 2023-cü ildə Gürcüstandan ölkəyə 16 milyon 414 min dollar dəyərində 218 min 191 baş diri qoyun idxal edilib. Əvvəlki illə müqayisədə Gürcüstandan diri qoyun idxalı 24% və ya 42,3 min baş artıb. Ötən il Gürcüstandan Azərbaycana diri qoyun idxalı ölkəyə gətirilən ümumi qoyun idxalının 68%-nı təşkil edib.
AQTA tərəfindən qəbul edilən Gürcüstandan xırdabuynuzlu heyvanların idxalının məhdudlaşdırılması qərarı ölkədə ət bazarına necə təsir edəcək?
“Epidemioloji vəziyyətin qorunması üçün belə bir addımın atılması düzgündür”
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində bildirdi ki, Gürcüstanda xırdabuynuzlu heyvanlar arasında taun xəstəliyinin yayılması müşahidə olunur. Bu səbəbdən də ölkədə yoluxma təhlükəsi nəzərə alınaraq müvəqqəti olaraq Gürcüstandan xırda buynuzlu heyvanların idxalı məhdudlaşır: “Bu məhdudiyyət daxili bazarda müəyyən çətinliklər yarada bilər. Ancaq onu da nəzərə almaq lazımdır ki, Azərbaycana tək Gürcüstandan ət idxal olunmur. Çalışmaq lazımdır ki, digər ölkələrdən diri heyvanların idxalı artırılsın. Ət idxalının azalması daxildə qiymətə təsir edə bilər. Ətin qiymətində yüksək artım ola bilməz, çünki yay fəslinə daxil oluruq. Bu mövsumdə tərəvəz məhsullarına çox üstünlük verildiyi üçün ətin qiymətində inanılmaz dərəcədə bahalaşma baş verməyəcək”.
Həmsöhbətimiz hesab edir ki, epidemioloji vəziyyətin qorunması üçün belə bir addımın atılması düzgündür.
Günel CƏLİLOVA
