Prezidentin növbəti qələbəsi - 4 kənd döyüşsüz qaytarıldı...
Ceyhun Məmmədov: “...Azərbaycan mərhələli şəkildə qarşısına qoyduğu məqsəd və hədəfə nail oldu”
2024-cü il aprelin 19-da Azərbaycan Respublikası və Ermənistan Respublikası arasında sərhəddə Azərbaycan Respublikası Baş nazirinin müavini Şahin Mustafayevin və Ermənistan Respublikası Baş nazirinin müavini Mqer Qriqoryanın sədrliyi ilə Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyası və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın səkkizinci görüşü keçirilib.
Görüş zamanı komissiyalar aşağıdakılar barədə razılığa gəliblər:
- Delimitasiya prosesinin ilkin mərhələsində Tərəflər sərhəd xəttinin ayrı-ayrı hissələrinin Sovet İttifaqı çərçivəsində onun süqutu dövrünə mövcud olduğu hüquqi cəhətdən əsaslandırılmış respublikalararası sərhədə uyğun olaraq Bağanis (ER) - Bağanıs Ayrım (AR), Voskepar (ER) - Aşağı Əskipara (AR), Kirants (ER) – Xeyrımlı (AR) və Berkaber (ER) - Qızılhacılı (AR) yaşayış məntəqələri arasında bilavasitə keçməsini razılaşdırıblar.
- Qərara alınıb ki, sərhəd xəttinin bu hissələrinin təsviri koordinatları yerdəki geodeziya ölçmələrinə əsaslanaraq dəqiqləşdirilməsi nəzərə alınmaqla tərtib edilsin və bu, Tərəflər arasında 15 may 2024-cü il müddətinədək müvafiq Protokol-təsvirlə sənədləşdirilərək razılaşdırılmalı və imzalanmalıdır.
- Razılaşdırılıb ki, Tərəflər sərhəd xəttinin razılaşdırılmış hissələrində öz sərhəd xidmətlərinin eyni vaxtda və paralel yerləşdirilməsi üçün tədbirlər görmək məqsədilə öz hökumətlərinə müraciət edəcəklər. Həmçinin razılaşdırılıb ki, delimitasiya prosesi tam başa çatana qədər Protokol-təsvirdə göstərilən sərhəd xəttinin hissələri delimitasiya edilmiş hesab olunsun.
- Paralel olaraq, Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi üzrə Komissiyanın Birgə fəaliyyəti haqqında Əsasnamə layihəsinin razılaşdırılması üzrə işin 1 iyul 2024-cü il müddətinədək başa çatdırılması və dövlətdaxili razılaşdırmalar prosesinə və müvafiq qaydada Tərəflərin dövlətlərinin qanunvericiliyinin tələblərinə uyğun olaraq Əsasnamənin təsdiqinə başlamaq barədə razılığa gəlinib.
- Tərəflər razılaşıblar ki, onlar delimitasiya prosesində 1991-ci il Alma-Ata Bəyannaməsinə əsaslanacaqlar. Tərəflər, həmçinin həmin baza prinsipini Əsasnamə layihəsində təsbit etmək barədə razılığa gəliblər (əgər gələcəkdə Azərbaycan Respublikası ilə Ermənistan Respublikası arasında sülhün və dövlətlərarası münasibətlərin qurulması haqqında Sazişdə başqa cür qərara gəlinərsə, o zaman Əsasnamənin müvafiq bəndi bu Sazişlə müəyyənləşdirilmiş prinsiplərə uyğunlaşdırılacaq).
- Tərəflər Əsasnaməni təsdiq etdikdən sonra növbəliliyi razılaşdırmaq və sərhədin bütün digər hissələrinin, o cümlədən anklav və eksklav məsələləri üzrə delimitasiya prosesini davam etdirmək barədə razılığa gəliblər.
Görüşün nəticəsində protokol imzalanmışdır. Növbəti görüşün keçirilməsi tarixinin və yerinin işçi qaydada razılaşdırılması qərara alınıb.
“Qeyd etmək lazımdır ki, cənab Prezidentin rəhbərliyi ilə həyata keçirilən uğurlu xarici siyasət nəticəsində biz 4 kəndimizin qaytarılmasına nail olduq. Əslində, bu müzakirələr xeyli vaxtdır aparılırdı. Azərbaycan çalışırdı ki, bu kəndlərin azad olunmasına nail olsun. Düzdür, Ermənistan daha çox vaxt udmağa çalışırdı. Amma Azərbaycan mərhələli şəkildə qarşısına qoyduğu məqsəd və hədəfə nail oldu, öz torpaqlarını da, 4 kəndini də geri qaytardı.
Eyni zamanda, bildiyimiz kimi, müəyyən məsələlər ətrafında da razılıq əldə edildi və razılıq da xüsusi önəm daşıyan razılıqdır. Yəni bu gün Ermənistan Azərbaycan münasibətlərinin tənzimlənməsi üçün düşünürəm ki, bu önəmli bir razılıqdır”.
Bu fikirləri Qazaxın 4 kəndinin - Bağanıs Ayrım, Qızılhacılı, Xeyrimli və Aşağı Əskipara kəndlərinin qaytarılması barədə Ermənistanla razılıq əldə edilməsinə münasibət bildirərkən millət vəkili Ceyhun Məmmədov “Bakı-Xəbər”ə deyib.
C.Məmmədovun sözlərinə görə, həmçinin tərəflər davamlı olaraq görüş barədə razılğa gəliblər. “Söhbət ondan gedir ki, tərəflər sonrakı dövrdə də davamlı olaraq görüşərək müəyyən məsələləri müzakirə edəcək”-deyə C.Məmmədov əlavə edib.
İradə SARIYEVA
