Ermənilər saxta erməni "genosidinə" "ekiztayı" tapdılar - yezidi soyqırımı...
Qasım Hacıyev: “Yezidi kürdlərə qarşı ən böyük diskriminasiya və assimilyasiya siyasətini Ermənistan həyata keçirib”
Saxta soyqırım iddiası ilə uzun illər dünyanın canını boğazına gətirən ermənilər, terror dövləti Ermənistan indi də yezidi soyqırımını gündəmə gətirib onun ətrafında manipulyasiya etməklə məşğuldur.
Başqa xalqlara qarşı gerçək soyqırımları qəbul etmək istəməyən Ermənistan nəhayət ki, öz qondarma”soyqırım”ına “əkiz bacı” tapdı. Azərbaycanlılara, eləcə də vaxtilə indiki Ermənistan
ərazisində yaşayan xalqlara qarşı soyqırım və deportasiya siyasəti həyata keçirən bu ölkədə yezidilərə (yezidi kürdlərə) “yas” tutulur. Yeri gəlmişkən, yezidiləri ən çox diskriminasiyaya məruz qoyan məhz Ermənistandır, bu ölkədə onların dillərinin, dinlərinin, milli kimliklərinin, mədəniyyətlərinin inkar edildiyi, erməniləşdirildiyi gizlin deyil. Onların yalnız sözdə milli, dini kimliyi var. Yezidiləri zorən erməniləşdirən və dinlərini Qriqoryanlaşdıran Ermənistan indi də yezidi soyqırımını gündəmə gətirir.
Məlum olduğu kimi, Ermənistan parlamenti avqustun 3-nün Sincarda yezidi soyqırımı qurbanlarının anım günü kimi qeyd olunması layihəsini birinci oxunuşda qəbul edib. Bu barədə erməni mediası məlumat yayıb.
Bu layihəni hakim “Mülki müqavilə” fraksiyasının yezidi deputatı Rüstəm Bakoyan təqdim edib.
“Ermənistan Respublikasının bayramları və anım günləri haqqında” qanuna dəyişiklik edilməsi barədə qanun layihəsi lehinə 88 səs toplayaraq yekdilliklə qəbul edilib.
“2014-cü il avqustun 3-də İraqın yezidilərin yaşadığı Sincar şəhərinə qondarma “İslam Dövləti” terror qruplaşmasının hücumları həyata keçirilib və burada üç mindən çox insan həlak olub.
Aclıq, susuzluq və dözülməz istilər nəticəsində dağlara sığınan minə yaxın insan həlak olub, 200 mindən çox yezidi qaçqın düşüb, 13-56 yaş arası 5000-ə yaxın qadın və qız qaçırılıb. İslamı qəbul etmək və cihadçılarla evlənmək sonuncuların sağ qalması üçün ilkin şərt olub”- xəbərdə belə deyilir.
Mətbuatın araşdırmasına görə, bəzi mənbələr yezidiləri kürd hesab edir, amma onların özləri bunu qəbul etmir. Kürd dilinin iki ana qrupundan biri olan kurmanc dilində danışırlar. 2001-ci ildə aparılmış rəsmi siyahıyaalmaya əsasən, Ermənistanda bu ölkənin vətəndaşı olan 40,620 nəfər yezidi kürd yaşayır .
“Ermənistan parlamentinin yezidilərlə bağlı belə bir qərar qəbul etməsi həqiqətən də riyakarlığın, ikiüzlülüyün son həddidir”
Ermənistan parlamentinin avqustun 3-nün Yezidi soyqırımı qurbanlarının anım günü kimi təsis edilməsi haqqında layihəni birinci oxunuşda qəbul etməsinə şərh verən AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev “Bakı-Xəbər”ə bildirdi ki, bu, Ermənistan parlamentinin indiyə qədər qəbul etdiyi saxta qərarların, həyata keçirdiyi tədbirlərin davamıdır. “Türkə, müsəlman dünyasının əleyhinə olan nə kimi təbliğat üsulları varsa hamısından istifadə edirlər. Birinci növbədə həm özlərinin tarixdə etdikləri soyqırımları pərdələməyə, gizlətməyə cəhdlər göstərirlər, həm də özlərinin tərəfini saxlayanlara bir mesaj ötürürlər. Bununla belə görüntü yaratmaq istəyirlər ki, guya Ermənistan humanist addımlar atır, başqa millətlərin xeyrinə qərarlar qəbul edir. Bütün bunlar gözdən pərdə asmaq üçündür”-deyə Q.Hacıyev qeyd etdi.
Q.Hacıyevin sözlərinə görə, tək millətlilik ermənilərdə daha güclüdür, bu gün Ermənistanda yaşayan əhalinin 98 faizdən artığı yalnız haylardır. “Hətta 1 faiz etnik yezidi kürd saxlamışdılar, onların da yarıdan çoxunu assimliyasiya ediblər, onları erməniləşməyə məcbur ediblər. Yezidi kürdlərə qarşı ən böyük disskriminasiya və assimilyasiya siyasətini Ermənistan həyata keçirib. Yezidilərin bütün hüquqlarını pozublar, onları ən ümdə insani hüquqlarından məhrum ediblər, onlar təhdid olunur, ələ salınır, alçaldılır. Ermənistanda onların heç bir hüquqları, mülkiyyətləri belə yoxdur. Ermənistan parlamentinin yezidilərlə bağlı belə bir qərar qəbul etməsi həqiqətən də riyakarlığın, ikiüzlülüyün son həddidir. Ermənilərin yezidilərin dərdini çəkməsi qeyri-səmini, gülünc görsənir. Bütün dünya bilir ki, harada müharibə gedirsə, orada insanlar ölür. Heç kəs insan ölümünün tərəfdarı deyil”-deyə bildirən Q.Hacıyevin sözlərinə görə, Azərbaycan ərazisində soyqırımlar, qətliamlar törədən, azərbaycanlılara qarşı deportasiya və genosid aktı, kütləvi qırğınlar törədən, abidələrə qarşı vəhşilik edən Ermənistanın yezidi soyqırımı ilə bağlı qərar qəbul etməsi çox absurddur. “Fikrimcə, Ermənistan bununla özünün yeni məkrli niyyətini gerçəkləşdirmək və qondarma “erməni soyqırımı” ilə yezidi soyqırımını paralel təbliğ etmək istəyir ki, bəlkə nəsə əldə edə bildi. Bu, erməni riyakarlığının növbəti üzüdür. Ermənistanın məqsədi olmasa belə bir addım atmazdı. Yezidi soyqırımı ətrafında manipulyasiya etməklə öz məkrli niyyətlərini büruzə verir.
Yezidi kürdlərin mədəniyyətini, irsini məhv edən, onların izini itirən Ermənistanın bu gün onlarla bağlı belə bir addım atması bir araya sığmır”-deyə bildirən Q.Hacıyev əlavə etdi ki, bu gün ermənilərin və Ermənistanın dünya tərəfindən ciddi şəkildə islah olunmasına ehtiyac var.
İradə SARIYEVA
