Azərbaycanın ardınca Türkiyə və Rusiya da “5 aprel” təhlükəsinə qarşı çıxdılar...
Ramil Hüseynov: “Qərbin sərgilədiyi yanaşma regionda gərginlik yaratmaq məqsədi güdür”
Məlum olduğu kimi, Brüsseldə Avropa Komissiyasının Prezidenti Ursula Fon der Lyayen, ABŞ Dövlət katibi Entoni Blinken və Ermənistan baş naziri Nikol Paşinyan arasında üçtərəfli görüş keçirilir. Görüşdə Ermənistana bir sıra yardımların ediləcəyi gözlənilir.
Azərbaycan tərəfi belə bir görüşlə bağlı təşəbbüsü əvvəldən pisləyib. Bununla bağlı ölkəmizin rəsmi mövqeyi ortadadır. Rusiya tərəfi də rəsmi səviyyədə görüşə mənfi münasibət bildirib. Rusiya prezidentinin mətbuat katibi Dmitri Peskov görüşü yaxından izləyəcəklərini və 5 apreldə atılacaq imzaların region üçün müsbət nəticə verməyəcəyini qeyd edib: “Biz bu görüşü çox böyük bir diqqətlə izləyəcəyik. Əvvəlki kimi hesab edirik ki, digər dövlətlərin regional işlərdə iştirakının artması müsbət nəticə verməyəcək”.
O cümlədən Türkiyə də buna mənfi prizmadan yanaşıb. Türkiyə Xarici İşlər Nazirliyinin aprelin 4-də yaydığı bəyanatında deyilir ki, regiondan kənar ölkələrin prosesə ədalətli, obyektiv yanaşması və zərər vurmaqdan qaçınması çox vacibdir: “Bu kontekstdə bəyan etməliyik ki, Ermənistan, Aİ və ABŞ arasında 5 aprel 2024-cü il tarixində keçirilməsi nəzərdə tutulan üçtərəfli görüş regiondakı münaqişənin həlli naminə zəruri tərəfsizlik şərtini pozacaq. Azərbaycanı danışıqlardan kənarda saxlayan bu addım sülhə xidmətdən ziyadə Cənubi Qafqazın geosiyasi münaqişə meydanına çevrilməsinə gətirib çıxaracaq”.
“Məhz bunun nəticəsidir ki, istər Türkiyə, istərsə də Rusiya Brüssel görüşünün keçirilməsini pisləyib”
Məsələ ilə bağlı “Bakı-Xəbər”ə açıqlama verən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynovun fikrincə, Qərbin sərgilədiyi yanaşma regionda gərginlik yaratmaq məqsədi güdür: “Bu da haqlı olaraq region dövlətlərinin narazılığına səbəb olur. Brüsseldə təşkil olunan görüş o qənaətə gəlməyə əsas verir ki, Qərb region dövlətlərinin mövqeyini nəzərə almaq istəmir. Qərb mövcud reallıqları, geosiyasi vəziyyəti və bölgənin özünəməxsus xüsusiyyətlərini nəzərə almadan addımlar atır. Rəsmi İrəvan Qərbi ən qısa zamanda Ermənistana gətirmək istəyir. Sanki Ermənistan heç bir digər təşkilatlarda təmsil olunmur. Unudurlar ki, Ermənistan KTMT hərbi blokunun, Avrasiya İqtisadi İttifaqının üzvüdür. Ən əsası, Ermənistanda Rusiyanın hərbi bazası var. Bütün bunları nəzərə almadan atılan kardinal addımlar regionda ciddi toqquşmalara səbəb ola bilər. Onsuz da iki ildir Ukraynada necə böyük faciələrin baş verdiyini hamımız görürük. Belə olan halda Ermənistanın qlobal güclər tərəfindən hərbi poliqona çevrilməsi, təbii ki, Azərbaycanı və digər region ölkələrini də narahat edir. Məhz bunun nəticəsidir ki, istər Türkiyə, istərsə də Rusiya Brüssel görüşünün keçirilməsini pisləyib. Təəssüflər olsun ki, digər region dövləti olan İran bununla bağlı mövqeyini ortaya qoymadı. Halbuki, Qərb Cənubi Qafqaza məhz Rusiya və İran üçün gəlir. Bunu bilməmək, görməmək mümkün deyil. Ancaq nədənsə, İran inadkarcasına susur. Rəsmi Tehran guya bilmir ki, Qərb Cənubi Qafqaza sülh və əminəmanlıq gətirmək üçün gəlmir?”.
Vidadi ORDAHALLI
