Rus sülhməramlılarına yeni status verilə bilər - minatəmizləmə...
Mübariz Göyüşlü: “ANAMA Rusiya silahlı qüvvələrinin minaaxtarma, minatəmizləmə sahəsindəki təcrübəsindən yararlanmaq istəyirsə, yəqin bu, ümumi işin xeyrinə olar”
Rusiya sülhməramlılarının Xocalıda minatəmizləmə əməliyyatlarına cəlb olunması ilə bağlı layihə var. Bunu Azərbaycan Minatəmizləmə Agentliyinin İdarə Heyətinin sədri Vüqar Süleymanov 4 Aprel - Beynəlxalq Mina Xəbərdarlığı və Mina Təhlükəsi ilə Mübarizəyə Yardım Gününə həsr olunmuş mətbuat konfransında deyib.
Onun sözlərinə görə, Rusiya sülhməramlılarının prosesdə istirakı planlaşdırılır: "Hazırda həmin minatəmizləyənlərin texniki avadanlıqları, alətləri və itləri akkreditasiya prosesindədir. Aprelin 6-da akkreditasiya yekunlaşacaq. Onlar Xocalıda minatəmizləmə əməliyyatına başlayacaqlar".
“Amma gərək rus sülhməramlıları da Azərbaycanın yaratdığı bu şəraitdən sui-istifadə etmək fikrinə düşməsinlər, missiyaları başa çatdıqda ərazimizi tərk etsinlər”
Məsələyə şərh verən Müasir İnkişaf Birliyinin sədri Mübariz Göyüşlü “Bakı-Xəbər”ə açıqlamasında qeyd etdi ki, ANAMA minatəmizləmə sahəsində ixtisaslaşan, peşəkar şəkildə bu işi həyata keçirən bir qurumdur. “Əgər ANAMA Rusiya silahlı qüvvələrinin minaaxtarma, minatəmizləmə sahəsindəki təcrübəsindən yararlanmaq istəyirsə, yəqin bu, ümumi işin xeyrinə olar. Yəni belə bir qərar verilibsə, hesab edirəm ki, faydasız olmaz. Amma gərək rus sülhməramlıları da Azərbaycanın yaratdığı bu şəraitdən sui-istifadə etmək fikrinə düşməsinlər, missiyaları başa çatdıqda ərazimizi tərk etsinlər.
Bilirsiz ki, böyük dövlətdir, bu sahədə Rusiya silahlı qüvvələrinin çox böyük təcrübəsi var. Düzdür, ərazilərimizin minalardan təmizlənməsi prosesinin 90 faizini Azərbaycan özü həyata keçirir. Çox təəssüf ki, biz bir çox xarici dövlətlərin, beynəlxalq birliyin bu istiqamətdə dəstəyini görə bilmirik. Mina problemi bütün dünyanı narahat etməli bir problemdir və hər bir dövlət bu sahədə öz dəstəyini göstərərsə bu ümumi işin xeyrinə olar. Amma dünyanın aparıcı dövlətləri və təşkilatları Azərbaycanın mina probleminə biganə yanaşırlar. Belə bir məqamda təcrübəli dövlətlərin aidiyyəti qurumlarının bu işdə dəstəyi faydalıdır. Çünki azad olunmuş ərazilərimiz nə qədər minalardan tez təmizlənərsə, tezliklə quruculuq bərpa işləri gedər və keçmiş məcburi köçkünlər də öz yurdlarına qayıdarlar. Torpaqlarımızın minalardan tez bir zamanda təmizlənməsi təhlükəsizliyimiz baxımından da çox mühümdür, əhəmiyyətlidir”-deyə M.Göyüşlü bildirdi.
Digər tərəfdən, M.Göyüşlü hesab edir ki, Rusiya sülhməramlılarının bu fəaliyyət çərçivəsində ölkəmizdə bir qədər artıq qalmaq ehtimalı elə də xoş qarşılanmayacaq. “İctimai rəydə belə bir fikir var, Rusiya sülhməramlıları 2025-ci ildə ərazimizi tərk etməmək üçün minatəmizləmə əməliyyatlarına qatılırlar ki, burada bir qədər artıq qalsınlar. Halbuki, üçtərəfli bəyanata görə, onların Azərbaycanda missiyası 2025-ci ildə başa çatır və həmin müddətdə onlar ölkəni tərk etməlidirlər.
Xüsüsən də onların bu fəaliyyəti Xocalıda həyata keçirmələri ictimaiyyət tərəfindən müsbət qarşılanmaya bilər. Çünki Xocalı Azərbaycan üçün həssas bir yerdir. Xocalı soyqırımında Rusiyanın 366-cı motaatıcı alayının xüsusi iştirakı olub. Bu xəbəri oxuyarkən bir vətəndaş olaraq məndə qeyri-ixtiyari olaraq 366-cı alayın assosiasiyası yarandı. Bu baxımdan, sanki bir narahatlıq yarandı. Könül istərdi ki, Rusiya sülhməramlıları Azərbaycanı, bütövlükdə Rusiya qoşunları Cənubi Qafqazı tərk etsinlər. Cənubi Qafqazda heç bir xarici dövlətin hansısa bir hərbi qüvvəsinin olması, qalması arzuedilən deyil. İstəyirik ki, sakitlik, sabitlik olsun. Azərbaycan dövləti artıq 3+3, Qafqaz Evi formatını, ideyasını təklif edib. Bu rellaşsa çox yaxşı olar. İstərdim ki, Rusiya sülhməramlıları Qarabağ ərazisini tərk etsin. Bizim deməyimiz başqadır. Amma bu məsələ bir dövlət siyasətidir. Azərbaycan dövləti bunu məsləhət görürsə, demək belə lazımdır. Bu mərhələdə minaaxtarma və minatəmizləmə prosesində bunun əhəmiyyəti var. Yəqin ki, növbəti mərhələlərdə rus sülhməramlılarının buradan tam çıxarıldığını görə bilərik, buna inanıram. Hesb edirəm ki, Rusiya üç Cənubi Qafqaz ölkəsi ilə əməkdaşlıq ruhunda davranmalıdır. Zatən Azərbaycanla əməkdaşlıq ruhunda davranır. Bu əməkdaşlıq ruhunun içində də iqtisadi, ticari, mədəni, elm və təhsil istiqamətində çalışmalar üstünlük təşkil etməlidir”-deyə M.Göyüşlü qeyd etdi.
İradə SARIYEVA
