Ermənistan Avropa Sülh Fonduna rəsmi üzvlük müraciəti etdi...
Ramiyyə Məmmədova: “Ermənistanı belə quruma üzv etmək Avropanın sülh yanaşmasının nədən ibarət olduğunu açıq büruzə vermiş olacaq”
Ermənistan Avropa İttifaqına onun Avropa Sülh Fondunun benefisiarları siyahısına daxil edilməsi xahişi ilə müraciət edib, Milli Assambleyanın Avropaya inteqrasiya daimi komissiyasının rəhbəri Arman Yeqoyan “Yeni perspektivlər və Ermənistanın Avropaya inteqrasiyası üçün problemlər” mövzusundakı çıxışında bunları deyib:
“Bu, texniki yardımdan tutmuş öldürücü olmayan silahların tədarükünə qədər müxtəlif növ təhlükəsizlik yardımını təmin edən başqa bir təhlükəsizlik mexanizmidir. Hazırda bu məsələ müzakirə olunur. Ümid edirəm ki, Ermənistan bu mexanizmin bir hissəsi olacaq”.
Eqoyan həmçinin bildirib ki, Aİ-Ermənistan Tərəfdaşlıq Şurası bu yaxınlarda əməkdaşlığın bütün sahələrində daha iddialı birgə prioritetləri nəzərdə tutan yeni Aİ-Ermənistan tərəfdaşlıq gündəliyinin hazırlanması barədə qərar qəbul edib:
“Söhbət siyasi sənəddən gedir, o da hazırda işlənmə mərhələsindədir. İşlərin cari ilin may-iyun aylarında başa çatdırılması gözlənilir”.
Ermənistan kimi işğalçı və regionu qana sürükləyən bir ölkənin sülhü tərənnüm edən - Avropa Sülh Fondu kimi quruma üzv olmaq perspektivi nə dərəcədə real görünür?
Politoloq Ramiyyə Məmmədova “Bakı-Xəbər”ə açıqlamasında bildirdi ki, Ermənistanın yürütdüyü siyasətə görə daxilində bir xof, qorxu yaranıb: “Özünə sığına biləcəyi bir qapı axtarır. Gümanı hara gəlirsə ora müraciət edir. Ermənistan 44 günlük müharibədən sonra öz gələcək perspektivini hələ də müəyyən edə bilməyib ki, sülh müqaviləsi bağlasın, yoxsa revanşa hazırlaşsın. Ermənistanın son zamanlar Avropa institutlarına yaxınlaşmaq cəhdi də bundan doğur. Bu gün Ermənistan özünə havadar bildiyi Fransa kimi dövlətin əlinə oynayır. Ermənistan yaxşı anlayır ki, Avropa ölkələri onu sona qədər dəstəkləyə bilməz. Bu gün Gürcüstan Avropa Birliyinə üzv olmaq istəyir. Bu yöndə nələr etsə də, onu NATO və Aİ-yə qəbul etmirlər. Ermənistan isə Rusiyanın açıq forpostudur. Rusiya hərbi bazaları hələ də Ermənistandadır. Onun Qərbə doğru yön götürməsi Rusiyanı qıcıqlandırır. Ermənistan rəsmiləri ölkəni Avropanın cənginə verməyə çalışırlar. Bu da baş arğısı yaradacaq. Azərbaycan kimi ölkə Avropa qurumları ilə balanslı siyasət yürüdür. Biz tərəfdaşlıq edirik, onlar isə tam inteqrasiya yolunu tuturlar. 44 günlük müharibə bütün dünyaya bir daha göstərdi ki, Ermənistan işğalçı ölkədir. Belə bir ölkənin Sülh Fonduna üzv olması absurd görünər. Onun belə qurumda üzvlüyü təmin olunarsa, onda belə çıxar ki, Avropa ölkələri öz maraqları naminə işğalçıya “sülh göyərçini” donu geyindirir. Bizimlə isə ikili standatlarla rəftar edirlər. Bu gün Brüsseldə keçirilən görüş bir daha sübut edir ki, Ermənistan marionet ölkə kimi əldə oynadılır. Bu da Ermənistan üçün yaxşı heç nə vəd etmir. Rusiya və İran bu mövqeyə görə Ermənistanı bacardığı qədər sıxacaq. Artıq yalnız qaldığını görən Ermənistan özünü sülhsevən kimi göstərməyə çalışır. Belə qurumlar artıq mahiyyəti üzrə fəaliyyətdən daha çox təzyiq ruporu kimi fəaliyyət göstərir. Belə münasibət də həmin qurumların nüfuzunu daha da aşağı salır. Ermənistanı belə quruma üzv etmək Avropanın sülh yanaşmasının nədən ibarət olduğunu açıq büruzə vermiş olacaq”.
Məhəmmədəli QƏRİBLİ
